Manna- og hundanafnanefnd ríkisins kaghýdd einu sinni einu sinni enn

  Engin íslensk ríkisnefnd hefur verið rassskellt jafn oft og Manna- og hundanafnanefnd ríkisins.  Enda eru fáar nefndir hins opinbera til jafn mikillar óþurftar.  Samt eru margar um hituna.  Sennilega fjögur til fimm þúsund.  Ýmsar faldar á bak við nöfn eins og "aðgerðahópur",  "greiningardeild",  "starfshópur" og eitthvað svoleiðis.

  Rökin fyrir tilvist ríkisrekinnar manna- og hundanafnanefnd eru þau helst að foreldrum sé ekki treyst til að velja boðlegt nafn á barn sitt og hund.  Ríkisreknir starfsmenn séu nauðsynlegir til að standa vakt gegn vondum nöfnum.  Ríkisrekna nefndin vill ekki að stúlka heiti því fallega nafni Blær.  Þess í stað skal hún heita Himinbjört Snót.  Eða Hugljúf Þrá. 

  Nú hefur innanríkisráðuneytið flengt Manna- og hundanafnanefnd ríkisins vegna harðvítugrar andstöðu við nafnið Harriet.  Fram til þessa tókst manna- og hundanafnanefnd ríkisins til margra ára að hindra að Harriet-systkinin væru skráð hjá Þjóðskrá undir öðrum nöfnum en Stúlka og Drengur.  Samkvæmt úrskurði innanríkisráðuneytisins í dag er bull Manna- og hundanafnanefnd ógilt.  Harriet-systkinin mega héðan í frá vera skráð Harriet í stað Blíða Þúfa og Kaktus Þyrnir.

  Í vörn fyrir Manna- og hundanafnanefnd ríkisins hefur verið bent á að nefndin starfi eftir lögum.  Hún sé ekki sek um neitt.  Hún sé bara að vinna sína þægilegu og vel launuðu innivinnu.  

  Þetta er rétt.  Hinsvegar hefur enginn neytt neinn til að taka sæti í þessari óþurftarnefnd fáránleikans.  Þar fyrir utan berst nefndin á hæl og hnakka gegn því að vera lögð niður.  Vitaskuld.  Það segir sitt.  

  Ég skora á innanríkisráðherra,  frú Nordal,  að leggja Manna- og hundanafnanefnd ríkisins niður snarlega í haust er þing kemur saman.  - Þrátt fyrir harða andstöðu Bernhards Lambrechts,  Michaels Holtsmans,  Frances Welding,  Ethans Prezynas og fleiri við að slakað verði á ströngustu kröfum um rammíslensk mannanöfn. 

       

Athugasemdir

[Ásthildur Cesil Þórðardóttir, 29.8.2015 kl. 07:39]

algjörlega sammála

[Jósef Smári Ásmundsson, 29.8.2015 kl. 08:40]

Ég skal hundur heita ef þessi mannanafnanefnd verður ekki lögð niður.

[Ásthildur Cesil Þórðardóttir, 29.8.2015 kl. 09:58]

Og þó fyrr hefði verið.  

[Jósef Smári Ásmundsson, 29.8.2015 kl. 10:22]

Bíddu, hvað meinarðu Ásthildur. Er Jósef Smári ekki nógu gott nafn

[Ásthildur Cesil Þórðardóttir, 29.8.2015 kl. 14:29]

Meinti nú reyndar hunda og mannanafnanefnd, en mér datt svona í hug að segja koddu greyið Jobbi minn, svona karlinn hahaha

[Hjóla-Hrönn, 29.8.2015 kl. 17:01]

Ég bretti upp ermarnar og ætlaði að taka slaginn þegar frumburðurinn fæddist.  En nei, skráning í þjóðskrá rann smurt í gegn.  Enda einhver annar búinn að nefna sinn dreng Kolmar.  Nafnið heyrði ég fyrst á Ísafirði, en það var piltur sem hét Kolbeinn Sumarliði en aldrei kallaður annað en Kolmar.  Blessuð sé minning hans, fórst ungur á sjó.

Hekluskottið heitir bara Hekla, fyrri fjölskylda nefndi hana og við bara sátt með það ágæta Íslenska nafn.

Ég var afar ósátt við Hrannar nafnið þegar ég var unglingur, Hrönn rímar við tönn.  Hrönn skögultönn var stundum sönglað til að skaprauna mér.  Þar til ég fór í tannréttingar, þá var ekki lengur hægt að gera grín að colgate brosinu.

[#×+=% (IP-tala skráð) 29.8.2015 kl. 17:39]

Endilega leggja niður mannanafnanefnd, og í leiðinni að afnema umferðalöginn og svo á fólk að fá að stafsetja að vild.

aDnad vearti erki EdliGEtr

[Jens Guð, 29.8.2015 kl. 19:44]

Ásthildur Cesil (#1),  takk fyrir það.

[Jens Guð, 29.8.2015 kl. 19:46]

Jósef Smári,  það er dálítið bratt að taka upp nafnið Hundur - þó að málefnið sé gott.

[Jens Guð, 29.8.2015 kl. 19:59]

Hjóla-Hrönn,  ég þekki margar nöfnur þínar.  Bæði skólasystur mínar og í vinahópi.  Ég hef aldrei orðið var við uppnefni eða útúrsnúning á nafninu.  En krakkar máta oft rím við nöfn.  Sjálfur hef ég heyrt útfærsluna Jens sjéns og Jenni penni.  Þegar rokksöngleikurinn Jesús Kristur Guð varð vinsæll var ég um tíma kallaður Jens Kristján Guð.  Það styttist í Jens Guð.  Ég kunni því vel.     

[Jens Guð, 29.8.2015 kl. 20:03]

#×+=%,  umferðarlög eru samræmd alþjóðleg og virka vel.   Manna- og hundanöfn lúta öðrum lögmálum.  Til að mynda valda þau ekki umferðarslysum.  

[Ásthildur Cesil Þórðardóttir, 29.8.2015 kl. 20:30]

Systur mínar kölluðu mig stundum Íja kríja pottara pía.  Já ég var nefnilega kölluð Íja af fjölskyldunni og nánum vinum.  

[Jens Guð, 1.9.2015 kl. 21:49]

  Ásthildur Cesil,  í fljótu bragði átta ég mig ekki á því hvernig nafn þitt getur verið stytt í Íju.  

[Ásthildur Cesil Þórðardóttir, 2.9.2015 kl. 16:56]

Nei það er saga að segja frá því.  Þegar ég var lítil eignaðist ég galla, sem reyndar var ekki algegnt þá, gallinn var með teyjum sem fóru undir stígvélin, og ég hafði það að leik þegar ég var komin úr tallanum að "láta hann labba" og segja hér kemur Íja gangandi.  Ég kallaði sjálfa mig Íju og það nafn festist við mig, þannig að af fjölskyldu og nánum vinum er ég alltaf kölluð Íja.  

[Jens Guð, 2.9.2015 kl. 17:33]

[Ásthildur Cesil Þórðardóttir, 2.9.2015 kl. 18:16]

Jamm