Ofbeldishrottum klappað á kollinn

  Ofbeldishrottar dæla í smáskilaboðum (sms) grófum hótunum yfir konur sem þeir ofsækja.  Konur sem hafa sagt skilið við þá eftir að þeir hafa beitt þær hrottafengnu ofbeldi.  Þeir eyðileggja eigur kvennanna.  Skemma bíla þeirra.  Kveikja jafnvel í þeim.  En lögregla,  sýslumenn og dómstólar aðhafast fátt sem ekkert.  Ofsóknirnar standa yfir dögum saman, vikum saman, mánuðum saman og árum saman.  Gögn týnast á skrifstofum.  Renna út á tíma.  Og hver vísar á annan.

  Í fullkomnum heimi væru ofsóknir af þessu tagi kæfðar strax í fæðingu.  Ofbeldismaðurinn stöðvaður þegar í stað.  Hann snöfurlega settur í nálgunarbann.  Brot á nálgunarbanni myndi umsvifalaust kosta hrottann vist á bak við lás og slá.  Þolandinn þyrfti ekki að óttast neitt.  Lögregla,  sýslumenn og dómsstólar myndu slá skaldborg um þolandann.  Hann væri í skjóli.  Hrottinn væri skilyrðislaust úrskurðaður hættuleg ógn við samfélagið.  Hann er fárveikur og samfélagsleg ógn.  Úrhrak.  Illmenni.  Sadisti.  Það eru mannréttindi að engin kona þurfi að búa við ótta og því síður hótanir og ofbeldi.  

  Í fullkomnum heimi eru konur ekki beittar ofbeldi.  Það er auðvelt að láta það rætast.  Eina sem til þarf er hugarfarsbreyting hjá lögreglu, sýslumönnum og dómurum.  Kannski stjórnmálamönnum líka.  

  Af hverju er það ekki þannig?    

Staðfesti nálgunarbannið

Athugasemdir

[Hugrún Jónsdóttir (IP-tala skráð) 8.9.2015 kl. 20:54]

Það sem ég skil ekki, er að ef þetta væru tvær ókunnugar manneskjur og önnur þeirra færi að ráðast svona á hina með stöðugu andlegu og líkamlegu ofbeldi og áreiti, þá væri þetta mikið alvarlegri glæpur í augum laganna. Gerir fólk sér almennt ekki grein fyrir því að með því að kippa örygginu algerlega undan fótunum á þeim sem lenda í heimilisofbeldi, þá eru afleiðingarnar mikið alvarlegri og meira langvarandi.

[Jens Guð, 8.9.2015 kl. 21:10]

Hugrún,  þetta er svoooo rétt hjá þér.  

[Þorvaldur S (IP-tala skráð) 9.9.2015 kl. 17:43]

Í fullkomnum heimi skiptu löggur, sýslumenn og dómarar engu máli. Þeir væru ekki til. Engum dytti í hug að beita ofbeldi. Ástæðan fyrir því að löggur sýslumenn og dómarar eru til er sú að fullkominn heimur er ekki til. Það er því fullkomlega ástæðulaust að kenna löggum, sýslumönnum og dómurum um tilefni tilveru þeirra. En í ófullkomnum heimi verða að vera löggur, sýslumenn og dómarar, vegna þess að til eru þeir sem bera sakir á aðra að ófyrirsynju. Því þurfa þeir líka vernd.

Nú er ég ekki að segja að svo sé í þessu umrædda máli; þvert á móti er það fullsannað að Erlendur Eysteinsson á það skilið sem hann fær. En hann fær það að rannsökuðu máli og óyggjandi er leitt í ljós að hann á það skilið.

[Jens Guð, 9.9.2015 kl. 18:02]

Þorvaldur,  þetta er góður punktur hjá þér.  Annar punktur er að fullkominn heimur verður að vera dálítið ófullkominn.  Algjörlega hnökralaus heimur er ófullkominn.