Broslega heimskir glæpamenn

 

  Það er ekki öllum gefið að vera farsæll glæpamaður.  Bara  sumum.  Einkum siðblindum með greind yfir meðaltali.  Þeir sniffa kók,  ganga ungir í stjórnmálaflokka,  taka þátt í félagsstarfinu,  komast til áhrifa,  einkavinavæða sjálfa sig og sína,  ræna banka og orkufyrirtæki innanfrá og hafa það assgoti gott.  Hvort sem er utan eða innan Kvíabryggju eða Tortólaeyja.  Þetta eru fagmenn.

  Hinir eru fjölmennari:  Nautheimsku götukrimmarnir.  Þeir eru amatörar.  Ágætir fulltrúar heimsku krimmanna er par í Ohio í Bandaríkjum Norður-Ameríku.  Það rændi banka. Karlinn ekki í fyrsta skipti.  Hann afplánaði nýverið fimm ára vist í fangelsi fyrir bankarán.

  Parið komst yfir töluverða fjármuni í bankaráni.  Það uppveðraðist af árangrinum.  Tók af sér fjölda sjálfsmynda og póstaði þeim inn á Fésbókarsíður sínar.

  Lögreglan samkeyrði myndir úr öryggismyndavél bankans við ljósmyndir á Fésbók (einskonar "gúgl").  Þar blöstu við ljósmyndir af glæpaparinu hampandi ránsfengnum.

  Í dómsal spurði forvitinn dómari hvernig það hefði dottið í hug að auglýsa glæpinn á Fésbók.  Karlinn svaraði því til að þau væru ekki Fésbókarvinir lögreglunnar.  Hún hefði ekki átt að sjá myndirnar.

  

   

    

Athugasemdir

[Ásthildur Cesil Þórðardóttir, 29.9.2015 kl. 21:39]

Mér líkar eiginlega betur við svona krimma en þessa sem múta krökkum með bjór fyrir atkvæði og verða síðar pólitíkusar sem stunda jafnvel enn stærri mútur.

[Anna Sigríður Guðmundsdóttir, 30.9.2015 kl. 00:54]

Sammála Áshildur mín. Það þykir víst líklegt til árangurs að færa kosningaaldurinn niður í 16 ár?

Þannig að það sé alveg öruggt að kjósendur séu ekki einu sinni sjálfráða og sæmilega fullþroska ábyrgir einstaklingar þegar þeir kjósa heimsstjórnina? Bera þá foreldrarnir ábyrgð á atkvæði ósjálfráða unglinga, sem ekki hafa þekkingu, þroska og sjálfstæði til að meta sinn atkvæðisrétt á grundvelli raunverulegrar sjálfsforræðis-fullorðinsábyrgðar?

Er einhver sem getur útskýrt svona ábyrgðarleysi flokksformanna, sem ætla að færa lýðræðið í hendur ósjálfráða 16 ára barna?

M.b.kv.

[Ásthildur Cesil Þórðardóttir, 30.9.2015 kl. 09:19]

Nei vegna þess að það er enginn ábyrgð, ekkert frekar en núna, forystusauðir okkar bera aldrei neina ábyrgð á neinu.  Og gettu hvort börnin láti segja sér hvern eigi að kjósa.  

[Jens Guð, 30.9.2015 kl. 17:53]

Ásthildur Cesil (#1),  ég tek undir það.

[Jens Guð, 30.9.2015 kl. 18:10]

Anna Sigríður,  reynsla erlendis frá sýnir að 16 ára fólk fer ekkert verr með kosningarétt sinn en þeir sem eldri eru.  Ungt fólk er viljugra til að skoða alla möguleika.  Það er gagnrýnna á framgöngu stjórnmálamanna.  Snýr hiklaust baki við þeim sem standa ekki undir væntingum.

  Margt eldra fólk umgengst stjórnmál eins og fótbolta.  Það stendur með uppáhaldsliðinu sínu sama hvað á dynur.  Kýs sinn flokk eins og belja sem ratar alltaf á sinn bás. 

[Tobbi (IP-tala skráð) 3.10.2015 kl. 22:58]

Jens!

Fróðlegt væri að fá nánari upplýsingar um þessar virtu rannsóknir og erlendu reynslu sem þú vísar til, því þær hljóta að vera virtar og viðurkenndar því annars væri ekki mark á þeim takandi, svo sem hvar þær hafa birst.

Þannig væri sérlega ánægjuríkt ef þær hefðu ekki birst á vefmiðlum á borð við Baggalút eða Infoportalurin.

[Jens Guð, 6.10.2015 kl. 23:11]

Tobbi,  kosningaaldur hefur farið og fer stöðugt lækkandi.  Í dag er kosningaaldur 16 ár víða um heim.  Til að mynda í Austurríki,  Króatíu,  Argentínu,  Svartfjallalandi,  Brazilíu,  Serbíu og Níkaragúa.  Einnig til ríkisþings í mörgum þýskum sambandsríkjum.  Líka í nokkrum breskum sjálfstjórnarsvæðum.  Að ógleymdum tveimur tugum norskra sveitastjórna.  Það má telja með kosningar um sjálfstæði Skotlands.

 

Hvarvetna ríkir gríðarlega mikil hamingja með 16 ára kosningaaldurinn.  Ekki hefur orðið vart við neikvætt nöldur yfir því (umfram það er kosningaldur var lækkaður úr 35 árum og síðar hægt og bítandi neðar og neðar).  Því síður að einhver/jir berjist fyrir hærri kosningaaldri.   Þvert á mót.  Víða um heim er rífandi áhugi fyrir því að feta í fótspor áðurnefndra sem búa við farsælan 16 ára kosningaaldur.    

 

  Ýmsir hafa skoðað þetta og greint.  Þar á meðal Torfi H. Tulinius og Stein Ringer.   

  Þing Evrópuráðs hvetur ríki ESB til að sameinast um 16 ára kosningaaldur.  Reynsla af slíku er svo góð.