Græðgi og frekja

  Á sjöunda áratug síðustu aldar bryddaði veitingastaðurinn Askur upp á ýmsum nýjungum.  Þar á meðal að börn borðuðu frítt.  Það var auglýst með orðunum:  "Ókeypis fyrir börn í fylgd með foreldrum."  Þessu var vel tekið.  Þar á meðal af roskinni frú og miðaldra karlmanni.  

  Að lokinni veglegri veislumáltíð var komið að greiðslu.  Frúin tilkynnti að þau þyrftu aðeins að borga fyrir hennar mat.  Barnið borði frítt.  

  Þjónninn hváði og mótmælti.  Hann sagði:  "Þessi fúlskeggjaði miðaldra maður getur ekki talist vera barn."   

  "Jú,  hann er barnið mitt,"  svaraði frúin ákveðin og reiðileg á svip.  "Börn borða frítt í fylgd með foreldrum."

  Vopn voru slegin úr höndum þjónsins.  Til viðbótar vildi hann forðast leiðindi,  skv. reglunni um að kúnninn hafi alltaf rétt fyrir sér.  Honum var samt misboðið.  En lét gott heita.

  Í þann mund sem mæðginin stigu út um dyrnar þá brá þjónninn við snöggt.  Hann hljóp á eftir þeim með sleikibrjóstsykur á lofti og kallaði hátt - til að allir í troðfullum veitingastaðnum heyrðu:  "Barnið á að fá sleikibrjóstsykur!  Öll dugleg börn sem klára matinn sinn fá sleikibrjóstsykur í verðlaun!"

Hér fá börnin frítt að borða

Athugasemdir

[Ásthildur Cesil Þórðardóttir, 19.10.2015 kl. 18:06]

Hahaha flottur á því.  

[Axel Jóhann Hallgrímsson, 19.10.2015 kl. 19:03]

Góður þessi!

Auðvitað er ekkert frítt. Það er bara fyndið þegar flennistórt letur á umbúðum orgar á mann að 25% eða einhver tiltekinn hluti af innihaldinu sé ókeypis! Meintur ókeypis hluti vörunnar er auðvitað inni í verðinu á þeim hluta hennar sem sagt er að greitt sé fyrir. Flóknara er það nú ekki. En þetta trikk selur.

[Jens Guð, 21.10.2015 kl. 19:29]

Ásthildur Cesil,  takk fyrir innlitið.  

[Jens Guð, 21.10.2015 kl. 19:30]

Axel Jóhann,  kúnninn borgar allt þegar upp er staðið.