Íslenskir launþegar eru ofdekraðir

  "Tölur ljúga ekki," sagði vinnufélagi minn í álverinu í Straumsvík þegar talið barst að helför gyðinga á tímum nasista í Þýskalandi.  Hann var nasisti og veifaði pappírum sem sýndu að gyðingum fækkaði lítið sem ekkert á árum seinni heimsstyrjaldarinnar.  

  Þetta var á fyrri hluta áttunda áratugarins.  Löngu fyrir daga tölvu,  internets og wikipedíu.  

  Í dag er auðvelt að fletta upp á netsíðum og kanna áreiðanleika ýmissa fullyrðinga.  Gleypa þær hráar eða kafa dýpra í dæmið.  Allt eftir því hverju menn vilja trúa.

  Á netsíðu fjármálaráðuneytisins er upplýst að laun á Íslandi séu þau hæstu í heimi.  Sem dæmi er tekið að læknar á Íslandi séu með hálfa aðra milljón í mánaðarlaun.  Á sama tíma lepji læknar í nágrannalöndum dauða úr skel. Með herkjum nái þeir að nurla saman launum sem í besta falli eru þriðjungi lægri.  Annað eftir því. Íslenskt heilbrigðiskerfi ku vera það besta í heimi.  Til samanburðar er heilbrigðiskerfið í Albaníu það versta í samanlagðri Evrópu og Asíu.  Mörgum ljósárum á undan eða eftir því íslenska (eftir því hvort átt er við sjúklinga eða fjárfesta).

  Gott ef satt er.  Ég veit ekkert um þetta.  Hinsvegar þekki ég marga Íslendinga sem nýverið hafa flutt frá Íslandi til hinna Norðurlanda.  Þeir halda því fram að þeir eigi í fyrsta skipti á ævinni afgang í seðlaveskinu um mánaðarmót.  Þeir kaupi sér húsnæði og lán lækki við hverja afborgun.  Þeir kaupa sér bíla og hafa það óvænt gott fjárhagslega.  Tölur ljúga ekki.  En einhver lýgur.

 

Hæstu launin á Íslandi

Athugasemdir

[Stefán (IP-tala skráð) 14.12.2015 kl. 08:32]

Það er mikill landflótti frá Íslandi núna, einfaldlega vegna þess að grasið er grænna hinumegin. Hins vegar hífir yfirstéttin á Íslandi meðallaun verulega upp, t.d. alþingismenn, ráðherrar og starfsólk Fjármálaráðuneytis. Slíkt fólk lifir í vellystingum á kostnað ellilífeyrisþega, öryrkja og leigjenda sem eru hornrekur í samfálaginu.