Davíð Bowie 1947-2016

  Margir hafa hvatt mig til að blogga um feril heiðnu bresku poppstjörnunnar Davíðs Bowie.  Ég hef ekki spurt en dettur í hug að það sé vegna fráfalls hans í gær.  Aðrir hafa undrast að enga minningargrein um hann sé að finna á þessari bloggsíðu.  

  Nú að kvöldi næsta dags hefur verið fjallað um Bowie og feril hans fram og til baka í helstu fjölmiðlum.  Ekki síst á Rás 2.  Fáu er við að bæta.  Nema að kveða niður draugasögu um framburð Íslendinga á nafninu Bowie.  Hann er Báví.  Illar tungur flissa að þessu og halda því fram að réttur framburður sé Bóí.  

  Staðreyndin er sú að enskumælandi meðreiðarsveinar Bowies eru ekki á einu máli.  Sumir brúka íslenska framburðinn.  Til að mynda bandaríski gítarleikarinn hans,  Steve Ray Vaughan.  Sumir aðrir tala um Bóí. Þar fyrir utan megum við Íslendingar kalla hvaða útlending sem er hvaða nafni sem okkur hugnast.  Kinnroðalaust höfum við kallað Juan Carlos fyrrverandi Spánarkonung Jóhann Karl. Við tölum aldrei um The Beatles heldur Bítlana.  Bruce Springsteen köllum við Brúsa frænda.  Þannig mætti áfram telja.

  Annað:  Bowie var og er oft kallaður kameljón.  Það er villandi.  Kameljón breytir um lit til að laga sig að umhverfinu.  Bowie hinsvegar breytti ítrekað um lit til að skera sig frá umhverfinu.

  Þó að ég hafni kameljónstilvísunni þá segir sitthvað um litskrúðuga lagaflóru Davíðs að í morgun taldi ég 23 lög sem jafn margir aðdáendur póstuð á Fésbók sem sitt uppáhalds Bowie-lag.   

 

  

  Í stað þess að skrifa og bæta við enn einni minningargrein um Bowie og endurtaka flóð greina um feril hans vitna ég hér í nokkra punkta af Fésbók:

  "Mér finnst eins og rokkið sé dáið og hugur minn er í hálfa stöng...bless Bowie"

 - Bubbi (Björn Jónsson)  

  "Sumir segja hann vera goðsögn áttunda áratugarins, en það er vægt til orða tekið.  Hann hefur verið einn af fremstu og áhugaverðustu listamönnum heims í næstum fimm samfleytta áratugi."

  - Rakel Andradóttir 

  "Þú kenndir mér svo ótrúlega margt en það mikilvægasta er örugglega það að ef þú mátt vera David Bowie þá hlýt ég að mega vera ég sjálfur."

  - Óskar Zowie (Óskar Þór Arngrímsson)

  "Low og Heroes voru toppurinn fyrir mig.  Þær breytt því hvernig ég hugsaði um músík."

  - Trausti Júlíusson   

  "Og hann var ekki einu sinni leiðinlegur þægar hann var leiðinlegur."

  - Ísak Harðarson

  "Djöfull er nýja Bowie platan góð maður!"

  - Sigurjón Kjartansson

David Bowie látinn

Athugasemdir

[Sigurður I B Guðmundsson, 11.1.2016 kl. 21:08]

Mikill listamaður fallinn frá. 

[Stefán (IP-tala skráð) 12.1.2016 kl. 08:40]

Sköpun og framsækni David Bowie gerði hann svo sannarlega að alveg einstökum listamanni, sem átti engan sinn líka: Tónskáld, ljóðskáld, söngvari, hljóðfæraleikari, leikari, leikhúsmaður, fatahönnuður, tískuhönnuður og tónlistarstefnuhönnuður. Það má segja að hann hafi verið fremstur á meðal jafningja á flestum þessum sviðum, eða eins og Halldór Ingi Andrésson orðaði það svo vel í gær, að David Bowie hafi tekið við af The Beatles að vera á undan öðrum í tónlist. Ég hef alltaf litið þannig á að það hafi einmitt verið út af því sem Bowie var oft kallaður kameljón, frekar en að það hafi verið út af því að hann var sífellt að skipta um útlit og klæðaburð. Samt smell passar það auðvitað við kvottveggja. Listsköpun meistarans var slík og svo fjölbreytileg að fólk spurði hvert annað í gær, hvaða Bowie hélst þú mest upp á ? Hver var þinn uppáhalds Bowie ?  Meistari David Bowie var í raun Complete listamaður og frábær manneskja.      

[Helgi Armannsson (IP-tala skráð) 12.1.2016 kl. 22:58]

Ég sel það ekki dýrara en ég keypti það

http://beforeitsnews.com/celebrities/2016/01/the-satanic-david-bowie-pushing-the-satanic-agenda-through-his-songs-2474176.html

[Jens Guð, 13.1.2016 kl. 12:35]

Sigurður I B,  ég tek undir það.

[Jens Guð, 13.1.2016 kl. 12:36]

Stefán,  takk fyrir fróðleikinn.

[Jens Guð, 13.1.2016 kl. 12:36]

Helgi,  þetta er skemmtileg pæling.

[Gunnar Th. Gunnarsson, 17.1.2016 kl. 22:49]

Sjálfsagt er það mismunandi eftir landssvæðum hvernig Bowie er borið fram, en ef menn vilja bera nafnið fram eins og David Bowie gerir það sjálfur, þá ferð þú með fleipur, hr. grasalæknir.

Hann ber nafnið sitt nefnilega fram með ó-i, með örlitlu o-hljóði í bland.

[Gunnar Th. Gunnarsson, 17.1.2016 kl. 22:51]

Þetta átti auðvitað að vera í þt. "bar nafnið sitt fram". 

[Jens Guð, 18.1.2016 kl. 08:47]

Gunnar Th.,  í gegnum tíðina hefur Bowie ítrekað sagst vera óviss um "réttan" framburð á Bowie.  Sjá til dæmis:  https://www.youtube.com/watch?v=YlJbufRxh4s

[Gunnar Th. Gunnarsson, 18.1.2016 kl. 12:33]

Hann notaði ó-ið í heimildamyndinni á RUV um daginn