Einkennilegt háttalag strætóbílstjóra í myrkri, þoku og snjó

18.2.2016 | 19:44

Einkennilegt háttalag strætóbílstjóra í myrkri, þoku og snjó

Sumt fólk á ekki að umgangast börn. Það skilur ekki börn. Þau fara í taugarnar á þeim. Það þekkir ekki eitt barn frá öðru. Í þeirra augum er þetta allt sami skríllinn. Alveg eins og hjá rasistum sem setja alla blökkumenn undir sama hatt; sjá engan mun á þeim.

Mér var illa brugðið við fréttir af 14 ára stjúpdóttur Guðmundar Brynjólfssonar, djákna og vinar míns á Eyrarbakka. Krakkinn tók í gærkvöldi strætó til Selfoss. Á leiðinni skipti stelpan um sæti. Við það missti bílstjórinn stjórn á sér. Það rann á hann æði. Hann sturlaðist, froðufelldi og spangólaði. Henti stelpunni umsvifalaust út á guð og gaddinn. Skipti engu þó að úti væri niðamyrkur, svartaþoka, snjór og hálka.

Hann hafði ekki hugmynd um það hvort að barnið væri með farsíma, myrkfælið eða þokkalega búið til útiveru.

Sem betur fer tókst stelpunni að ná símasambandi við foreldrana. Guðmundur ók í humátt að Selfossi. Hún hafði þá í fimm mínútur brölt í átt að Eyrarbakka í flughálku og myrkri. Köld, hrakin og niðurlægð.

Bílstjórinn réttlætir ójafnvægi sitt og uppákomu með því að kvöldið áður hafi stelpa fært sig á milli sæta. Hann taldi hugsanlegt að um sömu stelpu væri að ræða. Sem var þó ekki. Þá viti hann dæmi þess að krakki hafi sett fót upp á sæti. Að auki hafi krakki eitt sinn sýnt honum putta. Þarna var mælirinn fullur. Til viðbótar hafi Litla-Hraun verið í nágrenni. Hún hefði getað leitað þar skjóls síðar um kvöldið. Miðaði hann þá við gömul ytri landamæri Litla-Hrauns.

Nú er málið "í ferli" hjá Strætó.

	14 ára hent út úr strætó
Ábyrgðarmaður færslu Tilkynna um óviðeigandi tengingu við frétt

Meginflokkur: Löggæsla | Aukaflokkar: Heilbrigðismál, Mannréttindi, Stjórnmál og samfélag | Breytt 19.2.2016 kl. 03:30 | Facebook

Athugasemdir

Almáttugur algóður hjálpi öllum þessum brengluðu, sturluðu og siðblindu stjórum, á öllum stjórnsýslustigum siðblindrar lögleysu Íslands og víðar.

Hvernig er forsvaranlegt að henda varnarlausu barni út á Guð og gaddinn? Og sleppa svo við afleiðingar af þeim ólöglega glæp, og halda bara áfram við sama starf?

Flest allir sturlast ef stjórnsýslan í efstu þrepum stúkureglu-klíknanna glæpsamlegu komast upp með sitt glæpsamlega siðleysi! Enginn mannlegur og siðferðislega heilbrigður einstaklingur þolir svona glæpastýringu klíku-stúku-bræðra endalaust, án þess að sturlast yfir í ómennskuna óverjandi. Þetta vita "héraðs/hæstaréttar-lögverjendur"?

Eintómur hrl-spillingarskítur í dómstólum "réttarríkisins" svokallaða?

Svei öllum misviturlegum verkum, þessara illra afla þjónandi riddara-reglu-stúkustjórum heimvaldaníðsins!

M.b.kv.

Anna Sigríður Guðmundsdóttir, 18.2.2016 kl. 21:12

Gott að vita að þetta mál ásamt 100 öðrum séu "í ferli"!!

Sigurður I B Guðmundsson, 18.2.2016 kl. 22:25

Foreldrar meiga nú samt margir hverjir alveg ala börnin sín aðeins betur upp!

Bjarni Gunnlaugur (IP-tala skráð) 19.2.2016 kl. 00:27

Hvað gerðu hinir farþegarnir í vagninum .Kom engin stúlkunni til varnar ?

V. Steinthorsson (IP-tala skráð) 19.2.2016 kl. 00:42

Já, hvað með hina farþegana. Þetta er eiginlega efni í aðra frétt. En gæti bílstjórinn ekki bara hafa verið að horfa á einhverja ofbeldismynd í snjallsímanum?

Jósef Smári Ásmundsson, 19.2.2016 kl. 07:10

Engar slæmar fréttir af bílstjórum sem starfa undir nafni Strætó koma mér lengur á óvart.

Stefán (IP-tala skráð) 19.2.2016 kl. 08:17

Já þetta er sennilega allt í ferli... áleiðis að Litla Hrauni.

Ásthildur Cesil Þórðardóttir, 19.2.2016 kl. 09:18

Það er undarleg árátta fólks að telja strætóbílstjóra aldrei bregðast rétt við. Oft á tíðum gengur fólk svo fram af bístjórum að þeir bregðast við á þann eina hátt sem óstýrilátir skilja.

Heimir Lárusson Fjeldsted, 19.2.2016 kl. 10:39

Með því til dæmis að kasta 14 ára krakka út um kvöld í vondu veðri einhversstaðar út á víðum velli?

Ásthildur Cesil Þórðardóttir, 19.2.2016 kl. 12:34

Auðvitað ekki Ásthildur.

Heimir Lárusson Fjeldsted, 19.2.2016 kl. 12:55