Það er flugmaðurinn sem talar

  Þegar skroppið var til Amsterdam á dögunum þá flaug ég með flugfélaginu Wow.  Það geri ég alltaf þegar því er við komið.  Fyrstu árin voru flugfreyjur Wow uppistandarar.  Þær reittu af sér vel heppnaða brandara við öll tækifæri sem gafst.  Eðlilega gekk það ekki til lengdar.  Það er ekki hægt að semja endalausa brandara um björgunarbúnað flugvélarinnar,  útgönguleiðir og svo framvegis.  Því síður er boðlegt að endurtaka sömu brandarana oft þar sem fjöldi farþega ferðast aftur og aftur með Wow.

  Ennþá er létt yfir áhöfn Wow þó að brandarar séu aflagðir.  Ein athugasemd flugmannsins kitlaði hláturtaugar farþega á leið frá Amsterdam.  Hún kom svo óvænt í lok þurrar upptalningarþulu.  Þið kannist við talanda flugmanns í hátalarakerfi.  Röddin er lágvær, blæbrigðalaus og mónótónísk:  "Það er flugmaðurinn sem talar.  Við fljúgum í 30 þúsund feta hæð... Innan skamms verður boðið upp á söluvarning.  Upplýsingar um hann er að finna í bæklingi í sætisvasanum fyrir framan ykkur.  Í boði eru heitir og kaldir réttir,  drykkir og úrval af sælgæti. Mér finnst Nóa kropp best!"  

      

Verið er að skoða töskur mannsins

Athugasemdir

[Stefán (IP-tala skráð) 13.4.2016 kl. 12:14]

Jens, hefur þú verið svo heppinn að lenda ekki í flugvél með þingflokksformanni Framsóknarflokksins sem á það til að gjósa um borð ? 

[Jens Guð, 13.4.2016 kl. 22:01]

Blessunarlega hef ég sloppið við æludýrið.

[Stefán (IP-tala skráð) 14.4.2016 kl. 08:12]

Gott, en þessi þingflokksformaður Framsóknarflokksins er líka klárleg á leið út af þingi nema að hann færi sig yfir í Vinstri Græna á ný, ef þeir þá vilja taka við honum. Aumingja Ásmundur Einar Daðason.