Furðufugl

  Ég hitti mann í gærkvöldi.  Ég spurði:  "Ertu búinn að ákveða hvað þú kýst í haust?"  Hann svaraði því neitandi.  Hinsvegar væri hann búinn að ákveða hvað hann kysi ekki:  "Enga manneskju sem hefur falið gjaldeyri í skattaskjóli.  Engan flokk sem hefur að geyma manneskju með tengsl við skattaskjól."

  Ég benti manninum á að enginn hafi viljandi geymt gjaldeyri í Money heaven.  Það hafa þeir allir vottað.  Gjaldeyrinn er og var aðeins falinn þar vegna hlálegs misskilnings einhverra amatörgutta í Landsbankanum.  Enginn hafi hagnast á þessu.  Þvert á móti.  Allir töpuðu nánast allri sinni eigu á þessu brölti.  Engu að síður borguðu allir samviskusamlega alla skatta og gjöld til Íslands af þessum gjaldeyri.  Meira að segja heldur ríflega.  Samt þurftu þeir þess ekki vegna þess að enginn vissi af földu peningunum.  Þar fyrir utan kostuðu menn milljónir króna í að stofna allskonar afætulandsfélög,  dótturfyrirtæki og vafninga til að hylja slóðina.  Eintómur kostnaður á kostnað ofan.

  Við þessa fróðleiksmola æstist kunninginn.  Hann kvaðst héðan í frá (klukkan var að ganga níu) ætla að segja upp áskrift á fjölmiðlum sem tengjast Money heaven.  Hann ætli að hætta að lesa fríblöð, hlusta á útvarp og horfa á sjónvarpstöðvar í eigu fólks með peninga í skattaskjóli.  Því síður muni hann kaupa símaþjónustu frá þessu fólki.  

  Hann hélt áfram:  "Inn á mitt skuldsetta heimili mun aldrei koma vara frá Matfugli,  Mata,  Síld & Fiski eða Salathúsinu."  

  Nú var mér öllum lokið.  Þvíklík sérviska.  Ég kvaddi vininn með þeim orðum að eina ljósið í myrkrinu væri að ekki séu fleiri svona furðufuglar eins og hann á kreiki.  

  

       

   

Er nafn ráðherra í gögnunum?

Athugasemdir

[Elín Sigurðardóttir (IP-tala skráð) 29.4.2016 kl. 10:10]

Furðulegur náungi.  Af hverju vill hann ekki bjarga Bjarna Ben þegar mikið liggur við?  

http://eyjan.pressan.is/frettir/2011/08/15/vidskiptasaga-bjarna-ben-tugmilljarda-tap-eftir-vidskiptaaevintyri-med-milestone/

[ls (IP-tala skráð) 29.4.2016 kl. 10:23]

En verslar hann í Bónus? 

[Sigurður I B Guðmundsson, 29.4.2016 kl. 11:07]

Man þegar fólk sagði upp áskrift að Mogganum í stórum stíl vegna óánægju þegar Davíð Oddsson gerðist ritstjóri þar. Í dag heyri ég ekkert um að fólk hafi sagt upp áskrift að Stöð 2 þrátt fyrir að eigandinn Ingibjörg Pálma eigi fé í skattaskjólum!! Já, furðufuglarnir eru líklega útdauðir eða fluttir til Noregs!!

[Stefán (IP-tala skráð) 29.4.2016 kl. 11:35]

Flott innlegg hjá þér hér að ofan Sigurður I B. Ég tel það siðleysi hjá fólki að segja ekki upp áskriftum hjá 365. Eins hjá auglýsendum sem auglýsa þar. 

[Ásthildur Cesil Þórðardóttir, 29.4.2016 kl. 14:38]

 Aldeilis er ég steinhissa á þessum ágæta manni.  

[Grímur Kjartansson (IP-tala skráð) 29.4.2016 kl. 18:42]

Á miðvikudagskvöld fyrir viku þá birtist frétt á mbl.is

í kjölfar hennar þá ákvað ég að segja upp áskrift minni af Morgunblaðinu ef sú frétt mundi birtast í prentuðu útgáfunni og ég hef verið áskrifandi lengur en Ólafur Ragnar hefur verið forseti Íslands.

en fréttin kom aldrei á pappír.

[Jens Guð, 29.4.2016 kl. 20:07]

Elín,  í framhjáhlaupi var bótasjóði Sjóvár rænt.  Ævintýri með turnbyggingu í Dubai kolféll. Allt í klúðri hjá Icehot 1.  En menn hafa orðið ráðherrar af minna tilefni.    

[Jens Guð, 29.4.2016 kl. 20:08]

Is,  er eitthvað gagnrýnisvert við Bónus?

[Jens Guð, 29.4.2016 kl. 20:32]

Sigurður I B,  það er sennilega rétt hjá þér að furðufuglarnir séu flognir til Noregs.

[Jens Guð, 30.4.2016 kl. 19:30]

Stefán,  ég tek undir það.

[Jens Guð, 30.4.2016 kl. 19:30]

Ásthildur Cesil,  takk fyrir að pósta pistlinum á Facebook og hlý orð.

[Jens Guð, 30.4.2016 kl. 19:31]

Grímur, hvaða frétt var það?

[Anna Sigríður Guðmundsdóttir, 1.5.2016 kl. 00:19]

Er ekki öruggast fyrir sérvitringa að kjósa bara alls ekki neitt, því það er svo hættulegt að kjósa gallað, mennskt og breyskt fólk í þessum heimi "fullkominna" kjósenda?

M.b.kv.

[Ásthildur Cesil Þórðardóttir, 1.5.2016 kl. 09:34]

Góð skrif eiga að fara víðar 

[Jens Guð, 1.5.2016 kl. 19:53]

Anna Sigríður,  það skal ekki bundið við sérvitringa að kjósa ekki neitt heldur alla.  Það kemur upp vandræðaleg staða ef enginn kýs neitt.

[Jens Guð, 1.5.2016 kl. 19:53]

Ásthildur Cesil,  takk fyrir það.