Hvenær hefst skítkastið?

11.5.2016 | 19:07

Hvenær hefst skítkastið?

Frá því að fyrstu menn kynntu framboð sitt til embættis forseta Íslands í komandi kosningum hefur allt verið á kurteisum nótum og hófstillt. Frambjóðendum og stuðningsmönnum þeirra liggur gott orð til keppinauta.

Þessi notalega stemmning hefur ekkert breyst þó að frambjóðendur hætti við framboð - hver á fætur öðrum - og aðrir bætist í hópinn. Í dag eru frambjóðendur fjórtán. Sama og fótboltalið með þremur varamönnum.

Kosningabaráttan er í reynd ekki hafin. Ætla má að þriðjungur til helmingur frambjóðenda helltist úr lestinni. Sumir gefast upp þegar nálgast lokadag til að skila inn gögnum. Aðrir fá þann úrskurð kjörnefndar að undirskriftalistar meðmælenda þeirra séu ófullnægjandi. Þar séu of mörg nöfn fólks undir kosningaaldri. Einnig skálduð nöfn. Enn fremur nöfn fólks sem hefur líka skrifað undir meðmælalista fyrir aðra frambjóðendur. Þar með ógilt sína undirskrift.

Þegar til kasta kemur stendur slagurinn á milli 7 - 9 manns. Næstu skoðanakannanir munu sýna hreyfingu á fylgi. Fylgi við Guðna Th. dalar í næstu könnunum. Það er útilokað að hann haldi 69% fram á síðasta dag. 30 - 40% eru raunhæfari tölur þegar upp er staðið.

Ég spáði strax DOddssyni rauðvínsfylgi (12 - 18%) sem styrkist þegar kosningabaráttan hefst af fullum krafti. Það hefur gengið eftir til þessa. Hann gæti endað í 20 - 25%.

Fylgið sem dalar hjá Guðna Th. færist yfir á Andra Snæ fremur en DOddsson. Óákveðnum mun fækka.

Minnki bilið á milli Guðna Th. og DOddssonar meira en ég er að spá hér þá er næsta víst að eitthvað af því skilar sér aftur til baka frá Andra Snæ. Ef skoðanakannanir sýna verulega minni stuðning við Guðna Th. til samanburðar við fylgi DOddssonar þá hópast andstæðingar DOddssonar aftur á Guðna Th. af praktískum ástæðum. Svona er pólitík.

Stærsti óvissuþátturinn snýr að því hvernig staðið verður að kosningabaráttu þegar hún hefst af fullum þunga. Ég veit ekki til að Guðni Th. hafi fjársterkan bakhjarl í túnfætinum hjá sér. DOddsson hefur kvótakóngana í sínu liði - með fullar hendur fjár eftir arðgreiðslur í milljörðum. Spurning hvort að Björk og/eða Sigur Rós hlaupi rösklega undir bagga hjá Andra Snæ.

Frambjóðendur munu áfram tala um keppinauta sína af kurteisi og virðingu. Líka stuðningsmenn þeirra. Svona almennt. Mykjudreifari netmiðilsins sáluga amx.is er í startholum. Það verður spennandi að fylgjast með.

Á sínum tíma tryggðu Bjórgúlfur Guðmundsson og meðreiðarsveinar hans sigur Ólafs Ragnars með sérlega klaufalegri auglýsingaherferð gegn framboði hans. Allskonar svoleiðis getur gerst. Líka eitthvað annað.

Mitt atkvæði er akki rígfast í hendi. Helst vil ég kjósa marga. Eiginlega flesta. Kannski kem ég sjálfum mér svo mjög á óvart að undrun sætir. Ég er samt ákveðinn í að kjósa engan sem gerir út á óþverralegt skítkast. Það passar ekki virðuleika mínum.

	Guðni með tæplega 70% fylgi
Ábyrgðarmaður færslu Tilkynna um óviðeigandi tengingu við frétt

Meginflokkur: Stjórnmál og samfélag | Aukaflokkar: Fjölmiðlar, Spil og leikir, Viðskipti og fjármál | Breytt 30.5.2016 kl. 05:43 | Facebook

Athugasemdir

Og ef eða ef ekki þá má búast við að ef eða þá ekki nema ef guð lofar!!!

Sigurður I B Guðmundsson, 11.5.2016 kl. 19:53

Gat ekki betur séð en skítkastararnir hafi verið komnir á góðan skrið gagnvar Ólafi og ekki síður Dorrit, dróg eðlilega mjög úr þegar hann hætti við að hætta við að hætta, mögulega eru mestu skítkastararnir bara sáttir eins og er og hafa sig því hæga!

Bjarni Gunnlaugur (IP-tala skráð) 11.5.2016 kl. 22:56

Frábært lag! Maður hverfur aftur í barnæsku. Það var eins og gerst hafi í gær! :)

"Ég skal mála allan heiminn, elsku mamma." Ég man að Svavar Gests spilaði þetta lag einu sinni og bætti svo við: "Mundu eftir að þvo penslana þegar þú ert búin, elskan."

Wilhelm Emilsson, 11.5.2016 kl. 23:27

Skemmtilegur þáttur um Eldhús meistaranna og viðmælendurnir hressir!

Wilhelm Emilsson, 11.5.2016 kl. 23:37

Þú ert auðvitað að spyrja hvenær skítkastið hefjist á góða fólkið.

Góða fólkið má auðvitað, einsog þú gerir, halda áfram að skíta á vonda kallinn Davíð Oddsson.

Richard Ulfarsson (IP-tala skráð) 12.5.2016 kl. 05:48

Heyrðu. Tókstu ekki eftir þegar Davíð tilkynnti framboðið og Guðni gekk til hans og sagði: Gangi þér ve, En svo bætti hann við: En ekki of vel Helvítis skítkastari bara.

Jósef Smári Ásmundsson, 12.5.2016 kl. 06:29

Ástþór er vanur skítkastari og hundleiðinlegur að auki og svo er eitthvað af veiku fólki þarna sem líklega hefur ekki orku í skítkast, en það er algjörlega morgunljóst að Guðni h mun rúlla þessum kosningum upp og verða farsæll, elskaður og dáður forseti. Spái því að Andri Snær, Davíð og Halla gefist upp og dragi framboð sín til baka.

Stefán (IP-tala skráð) 12.5.2016 kl. 08:18

En í alvöru talað þá er nokkuð víst að við fáum mikið skítkast þegar nær líður kostningum.

Sigurður I B Guðmundsson, 12.5.2016 kl. 11:21

Skítkastið er löngu byrjað, sýnu öflugast í Davíð en við því var að búast. Einna helst að stuðningsmenn Guðna og Andra kasti minnst skít hvorir í aðra, en stuðningsmenn beggja kasta skít í Davíð og öfugt.

ls (IP-tala skráð) 12.5.2016 kl. 14:10

Sigurður I B, gott ef ekki.

Jens Guð, 12.5.2016 kl. 17:45

Bjarni, voru það nokkuð frambjóðendur eða stuðningsmenn þeirra sem köstuðu skít í ÓRG og frú?

Jens Guð, 12.5.2016 kl. 17:51

Wilhelm, þetta er ljúf barnagæla. Mig minnir að hún sé sænsk að uppruna.

Jens Guð, 12.5.2016 kl. 17:53

Wilhelm, Eldhús meistaranna klikkar ekki.

Jens Guð, 12.5.2016 kl. 17:53

Richard, eru frambjóðendurnir ekki allir gott fólk?

Jens Guð, 12.5.2016 kl. 17:54

Jósef Smári, ég heyrði þetta og hló við.

Jens Guð, 12.5.2016 kl. 17:55

Stefán, Ástþór rekur upp stór augu ef hann rekst á þessa lýsingu þína.

Jens Guð, 12.5.2016 kl. 17:58

Sigurður I B (#8), það er hætt við því þegar svona margir eru í framboði.

Jens Guð, 12.5.2016 kl. 17:59

ls, er það nokkuð skítkast? Ég á við að einhverjir draga fram að Guðni Th. hafi greitt atkvæði með síðasta Icesave-samningnum og átt sæti í samninganefnd Íslands vegna umsóknar um ESB-aðild. Aðrir saka Andra Snæ um andóf gegn virkjunum og stóriðju. Enn aðrir rifja upp þátttöku DOddssonar í Írak-stríðinu, einkavæðingu og tilteknar embættisfærslur sem Seðlabankastjóri. Það er ekki skítkast. Það er umræða.

Skítkast er að kalla frambjóðendur fábjána, aumkunarverða, lygara, svikara, nasista eða fasista, nauðgara, landráðamann og vonda manneskju að auki.

Jens Guð, 12.5.2016 kl. 18:19