Hvað veldur aðgerðarleysi lögreglunnar?

  Í forsætisráðherratíð eyðibýlisbóndans Sigmundar Davíðs Gunnlaugssonar gat hann hvergi um frjálst höfuð strokið.  Ókunnugir menn frá erlendum glæpastofnunum eltu hann hvert fótmál.  Ekki aðeins hérlendis heldur hertu þeir eftirförina í hvert skipti sem hann brá sér til útlanda.  Það var oft.  Hvert sem drengurinn leit - og það var víða - þá sá hann skuggalega menn með sólgleraugu, hatt og í frakka með uppréttan kraga gægjast fyrir horn.  Stundum voru þeir með pínulítinn sjónauka.  Svo lítinn að hann sást ekki.  Stundum með faldar myndavélar.  Oft sáust þeir ekki.  Bara skugginn af þeim.  Í hrottalegustu tilfellum brugðu þeir sér í kattarlíki.

  Samtímis þurfti forsætisráðherrann að þola innbrot í síma sinn, talhólf og tölvur.  Líka Play Station tölvuna.  Innbrotin voru svo gróf og ruddaleg að tölvufróðustu menn landsins treysta sér ekki til að staðfesta þau.  Hinsvegar leggja þeir með þunga áherslu á að menn reyni af öllum kröftum að venja sig af því að opna tölvupóst merktan XXX porno.    

  Hvað veldur aðgerðarleysi lögreglunnar í málinu?  Við erum að tala um ósvífinn glæp gegn æðsta ráðamanni þjóðarinnar.  Hafa glæpamenn hana í vasanum?  Stendur hún kannski á bak við þetta?   Eru geimverur blandaðar í málið?  Er maðurinn í lífshættu?    

      

Sjaldan verið óumdeildur

Athugasemdir

[Sigurður I B Guðmundsson, 13.9.2016 kl. 12:52]

Kæmi mér ekki á óvart að "Jón spæjó Laddason" sé maðurinn á bak við þetta!!

[Jens Guð, 13.9.2016 kl. 15:05]

Sigurður I B,  hann er einn af þeim sem liggja undir grun.  

[Vilhjálmur Örn Vilhjálmsson, 14.9.2016 kl. 07:31]

XXXPorno - V A R L A. Það dónalegasta sem við fundum í tölvunni voru 4000 myndir af gömlum húsum þar sem ytra byrðinu hafði verið flett af. Svo hafði hann lesið Fornleif oftar en Moggann.

[Vilhjálmur Örn Vilhjálmsson, 14.9.2016 kl. 07:32]

Djöff... nú sendi ég óvart undir nafni... Nú verður George Soros æfur og RÚV borgar mér ekki laun um næstu mánaðarmót.

[Stefán (IP-tala skráð) 14.9.2016 kl. 08:03]

... og hvað með ,, Snatann hans " svokallaða sem var dreginn út af bensínstöð í Skagafirði til að verja hugsanlegar árásir. Mér sýnist ,, Snatinn " urra vel í takt með formanninum umkomulausa. 

[Stefán (IP-tala skráð) 14.9.2016 kl. 10:22]

Samkvæmt fjölmiðlum í dag er Þórólfur KS stjóri meira að segja hættur að styðja SDG, sem gerir þá kumpána SDG og Gunnar Braga enn einagraðri í flokknum. Meiri naglasúpan þessi Framsóknarflokkur. 

[Jens Guð, 14.9.2016 kl. 15:42]

Vilhjálmur Örn,  takk fyrir fróðleiksmolana.

[Jens Guð, 14.9.2016 kl. 15:43]

Stefán,  bensíntitturinn er svo brattur að hann íhugar að verða varaformaður flokksins.