Framsókn þarf þrjá ráðherrastóla

  Framsóknarflokkurinn logar stafna á milli.  Eins og gengur.  Flokksmenn þora ekki lengur að "læka" við vitlausar Fésbókarfærslur.  Þeim sem hefur orðið slíkt á er hvergi vært.  Það er hringt í þá og lesið yfir hausamótunum á þeim.  Ekkert "elsku mamma" heldur er tekið í hnakkadrambið á þeim og þeir hristir og hrærðir uns allur vindur er úr þeim.  

  Nú er gerð sanngjörn krafa um að Sigmundur Davíð verði ráðherra.  Helst forsætisráðherra með 19 aðstoðarmenn.  Annars verður engin sátt.  Aðeins ófriður og illindi.  Sigurður Ingi hlaut ekki nema 40 atkvæðum meira í formannsslagnum.  Aðeins 817 kjósendur Framsóknarflokksins í NA-kjördæmi strikuðu yfir nafn Sigmundar.  Hann á þess vegna skýlausa kröfu um ráðherraembætti.  Það er eina leiðin til að hann verði glaður.

  Þetta þýðir að Framsókn þarf þrjú ráðherrasæti í komandi ríkisstjórn.  Formaðurinn og varaformaðurinn sitja vitaskuld fyrir.  Þetta getur orðið vandamál.  Stærsta vandamálið er það er alls óvíst að Framsóknarflokkurinn verði í ríkisstjórn.  Þá verður langt í að gleði ríki á eyðibýli á NA-landi.

   

Krefjast sætis fyrir Sigmund

Athugasemdir

[Axel Jóhann Hallgrímsson, 7.11.2016 kl. 10:05]

Það er lágmark að maðurinn sem bjargaði Íslandi og lét alla þjóðina, í stað hrægammasjóðanna eins og lofað var,  borga leiðréttingar á lánunum þeirra sem skuldsett höfðu sig upp í rjáfur, fái ráðherraembætti, hvort sem Framsókn verður í ríkisstjórn eður ei.

Svo hefði Framsókn þar fyrir utan litlu eða engu fylgi tapað hefði Sigmundur leitt flokkinn í kosningunum. Simmi var nefnilega búinn að hanna kosningabaráttu sem gat ekki klikkað. Sennilega átti að mjólka kröfuhafa bankanna "aftur" og þá um leið hann og hans konu. Hvað gera menn ekki fyrir þjóð sína? En svo var óvænt brugðið fyrir hann fæti og því nefndi hann þessa áætlun sína ekki við nokkurn mann, fyrr en eftir kosningar.

[Ásthildur Cesil Þórðardóttir, 7.11.2016 kl. 15:20]

Auðvitað verður hann að fá forsætisráðherrastólinn svo við getum haldið á þar sem frá var horfið, með Bjarna Ben og Ólöfu Von Panama í sínum sætum, helst kúlulánadrottninguna líka og Sigfúr Joð.  Þannig getum við aldeilis borið höfuð hátt í öðrum löndum.  

[Axel Jóhann Hallgrímsson, 7.11.2016 kl. 16:01]

Það var með ólíkindum Ásthildur hvernig Von Panama hjúin í Sjálfstæðisflokknum sluppu gersamlega við alla umræðu um sín mál í aðdraganda kosninganna. Sennilega á Sigmundur mesta sök á því, hann sá til þess með framkomu sinni að athygli fjölmiðla fór aldrei af honum.

[Ásthildur Cesil Þórðardóttir, 7.11.2016 kl. 19:14]

Sammála því, karlgreyið er algjörlega út úr öllu korti.  Ég vil fá umræðu um þessi skötuhjú og þeirra aðild að aflandsreikningum.  

[Jens Guð, 10.11.2016 kl. 06:52]

Axel Jóhann (#1),  það var snjöll hernaðartækni að hanna öfluga og árangursríka kosningabaráttu en halda henni vandlega leyndri fyrir flokknum og því síður hrinda henni í framkvæmd.   

[Jens Guð, 10.11.2016 kl. 06:53]

Ásthildur Cesil, þú ert með þetta!

[Ásthildur Cesil Þórðardóttir, 11.11.2016 kl. 11:10]