Eggjahræra

  Uppskriftin er fyrir fjóra.  Hún miðast við að eggjahræran sé ein í boði.  Það er að segja ekki hluti af hefðbundnum enskum eða skoskum morgunverði ásamt pylsum, beikonstrimlum, bökuðum baunum, grilluðum tómatsneiðum, steiktum sveppum,  ristuðu brauði og einhverju svoleiðis.

  Heppilegast er að vera með fjórar pönnur.

12 brúnegg

160 gr beikonkurl

160 ml rjómi

Rammíslenskt smjör

salt og pipar 

4 flöskur af kældu hvítvíni

  Beikonkurlið er léttsteikt á einni pönnu.  Á meðan eru eggin skrúbbuð hátt og lágt (til að ná af þeim músaeitrinu).  Að því loknu er skurnin brotin og innihaldið látið gusast ofan í djúpa glerskál.  Rjómanum er hellt út í.  Beikonkurlinu er sturtað með.  

  Áður en þessu er hrært vandlega saman skal vænni smjörklípu skellt með látum á hverja pönnu.  Nægilega stórri til að hún komi til með að fljóta yfir allan pönnubotninn.  Pönnurnar eru látnar volgna.  Þegar smjörið hefur bráðnað er hrærunni hellt yfir pönnurnar.  Örlítið er skerpt á hitanum.  Samt ekki mikið.  Salti og pipar er stráð yfir.  Bara smá.  Fylgist spennt með hrærunni steikjast.  Áður en hún nær að steikjast í gegn er slökkt undir pönnunum.  Síðan er tekið til við að þamba hvítvínið á meðan hræran fullsteikist.  Að því loknu er hún tilbúin.  Þá verður kátt í kotinu.

          

„Hanga á Facebook-síðum almennings“

Athugasemdir

[Jóhann Elíasson, 30.11.2016 kl. 14:44]

Ég held ég myndi klára mig af þessu öllu saman, sérstaklega þessu með hvítvínið...

[Jens Guð, 30.11.2016 kl. 15:40]

Jóhann,  svona eggjahræru snæðir enginn þurrbrjósta.  Hún á betra skilið.

[Sigurður I B Guðmundsson, 30.11.2016 kl. 16:40]

Má hafa heimalagað rauðvín í staðinn fyrir hvítvínið og egginn úr mínum "dekurhænum"??

[Jens Guð, 30.11.2016 kl. 17:34]

Sigurður I B,  þumalputtareglan er sú að rauðvín sé þambað með dökkum mat (dökku kjöti, súkkulaðitertum...) en hvítvín með ljósum mat (hvítu kjöti, fiski...).  Ef litrófið er óljóst kemur bjór vel undan vetri.  Svo eru það undantekningar.  Til að mynda er rauðvín heppilegra með ostum.  Svo og heimalagaða rauðvínið þitt með eggjum úr dekurhænum.  Eggjarauðan er, jú, töluvert dekkri í eggjum úr dekurhænum.  Ég þekki þetta;  fæddur og uppalinn innan um hamingjusamar haughænur í útjaðri Hóla í Hjaltadal.    

[Anna Sigríður Guðmundsdóttir, 30.11.2016 kl. 18:30]

Sæll Jens. Gott að fá þessa uppskrift að Íslenskum kerfispólitískum flokkaklíku-hræringi. Spurning hvort við mannskepnurnar séum nægilega vistvænar hugarfars/siðferðis-vitsmunaverur, þegar kemur að reglugerðum falda heimsveldis-banka-valdsins?

Verst hvað það verður vandræðalegt fyrir samtryggingar-svikastjórnsýsluna verslunareinokandi, ef kemur í ljós næstu daga að ekki verði eggjaskortur hjá samtryggingareinokunar-verslunarklíkunum? Skipulögð embættistoppa-árás?

Sum hvít egg eru pínulítil og hálffull af vatni þegar þau hafa verið harðsoðin?

Þess vegna kaupi ég helst brúneggin. En í dag voru þau brúnegg ekki í boði hjá Bónus og Krónunni?

Var frekar þreytt og nennti ekki að fara í fleiri búðir í dag, til að finna egg sem standa undir mínum neytendakröfum, þ.e.a.s. gátu-útskýringunni: FULLT HÚS MATAR.

M.b.kv.

[Jens Guð, 1.12.2016 kl. 13:38]

Anna Sigríður,  takk fyrir skemmtilegar vangaveltur.  Þegar ég var 14 ára þá borðaði ég í fyrsta skipti egg úr verksmiðjubúi.  Það var í bandarísku herstöðinni á Miðnesheiði.  Þau voru algjörlega bragðlaus í samanburði við eggin úr haughænunum á æskuheimili mínu í útjaðri Hóla í Hjaltadal.

[Anna Sigríður Guðmundsdóttir, 2.12.2016 kl. 23:12]

Jens minn. Verksmiðjubú eru ekki hátt skrifuð hjá mér. Ég er svona smábúskapar-stuðningskerling. En ég skil og veit vel að slíkur smábúskapur annar ekki eftirspurn nútímans. Og það þurfum við víst öll að reyna að skilja.

Og ekki get ég hugsað mér hagnað af að fara illa með skepnur. Hvorki mannskepnur né aðrar skepnur.

Sköllóttar gamlar hænur eru víst ekki flottari né nytsamari heldur en sköllóttir gamlir og spilltir ráðuneytisstjórnar-karlar.

Er ekki eðlilegt að missa fiðrið þegar aldurinn færist yfir skepnurnar fjölbreytilegu hér á Móður Jarðar tilverunni? Ekki litist mér nú vel á að slátra öllum gömlu og sköllóttu körlunum, vegna skepnuverndunar-reglugerða?

En ég er nú óttalega vitlaus hænuhaus, og hef ekkert vit á hvað er raunverulega rétt né hvað er raunverulega rangt.

M.b.kv.

[Jens Guð, 3.12.2016 kl. 09:22]

Anna Sigríður,  hænur halda þéttu fiðri alveg fram á síðasta dag.  Það er að segja í heilbrigðu umhverfi við heilbrigðar aðstæður.