Hleypt í brýnnar - kjánalegar augabrúnir

  Augabrúnir eru til gagns og gaman.  Þær vernda augun.  Koma í veg fyrir að sviti leki frá enni ofan í augu.  Skerpa á andlitsdráttum.  Hýsa orma sem bora sig ofan í húðina á augabrúnasvæðinu.  Þeir halda varnarkerfi líkamans í æfingu.  Engir sleppa við þessa orma.  Það er kostur.

  Margt fólk - aðallega konur - litar augabrúnir svartar.  Eins og með fleiri fegrunaraðgerðir verður þetta fíkn hjá sumum. Fólk hefur tilhneigingu til að ganga lengra og lengra í áranna rás.  Þá er oft gripið til þess ráðs að láta húðflúra augabrúnir á sig.  Varanleg lausn og góð út af fyrir sig.  Verra er að ekki er öllum gefið að hafa hemil á sér þegar út í það er farið.  Margir sækja í alltof langar augabrúnir eða alltof sverar.  Hérlendis eru blessunarlega húðflúrstofur mannaðar fagfólki.  Í útlöndum er það ekki alltaf tilfellið.  Í Suðurríkjum Bandaríkja Norður-Ameríku er kallinn sem reddar hlutunum stórtækur í húðflúri.  Hann er sjaldan smámunasamur þegar kemur að því að hafa augabrúnirnar nákvæmlega samhverfar.

  Kannski segir eitthvað að hlutfallslega margir sem skarta bjánalegum húðflúruðum augabrúnum hafa setið í fangelsi. 

  Algeng útfærsla er að augabrúnir séu húðflúraðar fyrir ofan augabrúnasvæðið.  Það á að túlka glaðværan persónuleika.  Oftar er raunveruleikinn sá að þetta túlkar kjánalegan persónuleika.  Sumt sem virkar tímabundið töff á "flippuðu" ungmenni verður hræðilega aulalegt á miðaldra eða eldri manneskju.        

 

Athugasemdir

[Sigurður I B Guðmundsson, 13.2.2017 kl. 19:28]

Ætli Bjarni Fel. viti af þessu!!!!

[Stefán (IP-tala skráð) 13.2.2017 kl. 22:05]

Egill Skallagrímsson gat hleypt annari augabrúninni upp á mitt enni án aðstoðar. Gott ef nafni hans Ólafsson getur það ekki líka, en meistri Bjarni Fel leikur á þá og er kominn með augabrýr sem ná yfir ennið.

[Ásthildur Cesil Þórðardóttir, 14.2.2017 kl. 08:20]

Oh my god, hahahaha.  

[Jens Guð, 15.2.2017 kl. 19:30]

Sigurður I B,  hann veit ekki af þessu.  Ekki segja honum.

[Jens Guð, 15.2.2017 kl. 19:33]

Stefán,  ég man af afi hélt því fram að hann væri afkomandi Egils.  Til sönnunnar bar hann fyrir sig þennan hæfilega:  Að hleypa annarri augabrún upp á mitt enni og hitt niður á kinn.  Reyndar var lítil hreyfing á augabrúnum afa þégar hann setti sig í þessar stellingar.

[Jens Guð, 15.2.2017 kl. 19:33]

Ásthildur Cesil,  takk fyrir innlitið.