Af hverju?

  Leiðtogi Norður-Kóreu heitir Kim Jong-Un.  Hann er klikkaður.  Á ekki langt að sækja það. Þetta einkenndi pabba hans og afa.  Úr fjarlægð er greining á klikkun hans ekki auðveldlega skilgreind af nákvæmni.  Hún einkennist af ofsóknarkennd,  vænisýki og einhverju svoleiðis.  Vegna þessa nær hann ekki góðum svefni.  Eins og gengur.  Liggur andvaka flestar nætur.  Þjáist líka af þvagsýrugigt.  Er leiðandi frumkvöðull í hárgreiðslu sem kallast kústur.  Er í fjölmiðlum heimalands skilgreindur kynþokkafyllsti karlmaður heims og vitnað í útlenda "Baggalúts"-síðu því til sönnunnar.

  Kim Jong-Un er sakaður um að hafa látið myrða bróðir sinn.  Það væri ekki frétt nema vegna þess hvernig að því var staðið.  Tvær konur - önnur víetnamísk, hin frá Indónesíu - drápu hann með eitruðum nálum og eiturúða á flugvelli í Malasíu.  

  Af hverju var hann ekki drepinn í kyrrþey svo lítið bar á?  Af hverju að drepa hann í Malasíu?  Af hverju að fá til verksins útlendar konur?  Af hverju á flugvelli undir vökulum augum eftirlitsmyndavéla?  Þessum spurningum verður seint svarað.  Vegir Kim Jong-Uns eru órannsakanlegir.

  Það ku lengi hafa setið í Kim Jong-Un að bróðir hans fékk í afmælisgjöf á 16. ári ferð í tívolí í Japan.  Dagur hefndar hlaut að renna upp.  Þar að auki hafði brósi hvatt til þess að í N-Kóreu yrði tekið upp kínverskt markaðskerfi.     

  Ein tilgátan er sú að morðið eigi að vera skilaboð til allra í Kóreu og allra í heiminum:  Enginn sé óhultur og hvergi.  Ekki einu sinni nánustu ættingjar Kim Jong-Uns.  Hann hefur líka látið drepa háttsettan föðurbróður.  Einnig fræga kærustu sem var vinsæl leik- og söngkona.  Sú hefur ekki látið það hafa áhrif á feril sinn nema að óverulegu leyti.  

         

  

Myrtur af útsendurum bróður síns

Athugasemdir

[Ásthildur Cesil Þórðardóttir, 16.2.2017 kl. 10:48]

Já hann er dálítið svona svipuð týpa og sumir sem ég hef heyrt um, nema þeir hafa ekki einræðisvald, þó einn reyni það reyndar en býr óvart í landi sem er skilgreynt lýðræðisríki með starka stjórnarskrá.  Þó segja hans nánustu aðstoðarmenn að hann sé hafinn yfir lög og reglur. 

[Stefán (IP-tala skráð) 16.2.2017 kl. 17:54]

Þessi augljóslega brjálaði einstaklingur þarna í þessu heimsins lokaðasta ríki, má greinilega ekkert aumt sjá án þess að drepa það.

[Jens Guð, 19.2.2017 kl. 15:00]

Ásthildur Cesil,  freki kallinn finnst víða.

[Jens Guð, 19.2.2017 kl. 15:00]

Stefán,  svo virðist vera.