Af hverju páskaegg strax eftir jól?

  Mörgum var illilega brugðið á dögunum þegar fullorðinn maður gekk í skrokk á páskaeggjum í verslun vestur á Seltjarnarnesi.  Ekki vegna ofbeldisins.  Það er alvanalegt að páskaegg séu mölbrotin.  Ekki síst á Seltjarnarnesi.  Viðbrögðin beindust fyrst og fremst að því að páskaegg væru komin í verslanir mörgum mörgum vikum fyrir frjósemishátíðina.

  Fólk var hneykslað.  Jafnvel reitt.  Aðallega samt undrandi.  Ótal spurningar vöknuðu.  Vangaveltur teygðu verulega á athugasemdaþráðum við Fésbókarfærslur og blogg.  

  Ég kannaði málið.  Snéri mér eldsnöggt og fumlaust að afgreiðsludömu í matvöruverslun.  Yfirheyrði hana frá öllum hliðum.  Hún mælti:

  Það er ágæt sala í páskaeggjum þetta langt fyrir páska.  Verslanir eru að mæta eftirspurn.  Páskaegg eru vinsæl tækifærisgjöf.  Þau eru ekki til sölu næstu níu til tíu mánuði eftir páska.  Mjög algengt er að fólk grípi með sér páskaegg til útlanda.  Þá er verið að gleðja þarlenda ættingja og vini með íslensku páskaeggi.  Íslensku páskaeggin eru miklu veglegri og betri en útlend.  Útlend páskaegg eru aðeins á stærð við hænuegg.  Þau eru ekkert skreytt.  Bara pökkuð inn í mislitan álpappír.  

  Því má bæta við að víða erlendis er súkkulaðikanínum hampað sem frjósemistákni umfram súkkulaðiegg.  Þær eru ekkert merkilegri.  Að vísu súkkulaðimeiri og fallegri fyrir augað.  Komast þó ekki með tærnar þar sem glæsileg íslensk páskaegg hafa hælana.

      

Athugasemdir

[Jóhannes (IP-tala skráð) 21.3.2017 kl. 08:21]

"Verslanir eru að mæta eftirspurn".  Verslanir geta einnig búið til eftirspurn eða m.ö.o. gerviþörf.  Sú staðreynd er eitt af því sem er kennt á viðskiptasviði á fyrstu árum menntaskóla.

[Sigurður I B Guðmundsson, 21.3.2017 kl. 16:29]

Þetta rifjaðist upp fyrir mér þegar ég las þetta hjá þér: Hér er gott að vera sagði flugan þegar hún datt oní sykurkrúsina!!

[Jens Guð, 21.3.2017 kl. 17:23]

  Jóhannes,  ég kannast við þetta.  Lærði fagið og vann á auglýsingastofum í hálfan annan áratug.  Reyndar eru margir fletir á málinu.  Einn er sá að flest sem fólk kaupir utan brýnustu nauðsynja (matur, svefnaðstaða, föt...) er gerviþörf.  

  Annan flöt má finna með því að skoða fræg dæmi um gerviþörf.  Til að mynda fótanuddtæki sem seldust í tugþúsundatali á sínum tíma - í kjölfar vel heppnaðrar auglýsingaherferðar/markaðssetningar (eftir að hafa árum saman áður selst dræmt).  Út af fyrir sig þurfti enginn á þessu tæki að halda.  Enda döguðu tækin - lítið sem ekkert notuð - snarlega uppi í geymslukompum.  

  Það sem réði skyndilegu sölusprengjunni var þetta:  Það tókst að gera tækið að "fullkominni" jólagjöf handa öldruðum foreldrum og/eða afa og ömmu.  Stærðin á jólapakkanum var góð.  Bar áru veglegrar jólagjafar.  Verðið var eins og best var á kosið: Ekki hátt en þó yfir mörkum nísku.  Tækið sjálft bar hlý skilaboð um að gefanda væri umhugað um vellíðan og heilsu viðtakanda.

  Tækið fyllti fullkomlega upp í þörf.  Það er þörf fyrir gerviþörf.

  Mátum þetta við páskaeggin.  Þegar við heimsækjum ættingja og vini í útlöndum þá höfum við þörf fyrir að færa þeim eitthvað séríslenskt.  Ég hef gripið með mér Brennivín,  Egils Malt,  íslenskar hljómplötur og helling af íslensku sælgæti.  Ég hef aldrei heimsótt vini eða ættingja í aðdraganda frjósemishátíðarinnar.  En það blasir við mér hvað íslenska páskaeggið fyllir fullkomlega upp í (gervi)þörfina.  

  Til gamans:  Fullorðin kona sem á afmæli um páskana tjáði mér að hún væri búin að fá nóg af páskaeggjum.  Allflestar afmælisgjafir hennar hafa alla hunds- og kattatíð verið páskaegg.  Blessunarlega í ýmsum stærðum.  

[Jens Guð, 21.3.2017 kl. 17:24]

Sigurður I B,  vel orðað hjá flugunni.

[Jósef Smári Ásmundsson, 21.3.2017 kl. 18:03]

Þau hljóta að verða farin að stropa þegar páskarnir ganga í garð.

[Jens Guð, 22.3.2017 kl. 04:16]

Jósef Smári,  eru þau ekki best þannig?