Dráp og morð

  Ríkismorð eru áhugavert fyrirbæri.  Þau eru á undanhaldi víðast í heiminum. Nema í frumstæðum þriðja heims löndum þar sem mannréttindi eru almennt fótum troðin á flestum sviðum. Á Íslandi voru ríkismorð lögð af samkvæmt lögum 1928.  

  Svo skemmtilega vill til að iðulega fer saman stuðningur við ríkismorð og barátta gegn fóstureyðingum.  Rök gegn fóstureyðingum eru hin bestu:  Líf hefur kviknað.  Það er glæpur gegn mannkyni að breyta því.  Lífið er heilagt.  Í helgri bók segir að eigi skuli mann deyða né girnast þræl náungans.  Hinsvegar eru fóstureyðingalæknar réttdræpir,  rétt eins og margir aðrir glæpamenn.  

  Margir baráttumenn gegn fóstureyðingum - á forsendum heilags réttar til lífs - eru hlynntir hernaðaraðgerðum úti í heimi sem slátra börnum, gamalmennum og öðrum óvinum.  Ekkert að því.  

  Í Arkansas-ríki í Bandaríkjum Norður-Ameríku hafa embættismenn dregið lappir til margra ára við að drepa fanga.  Þeir hrukku upp við það á dögunum að lyf sem sljákkar í föngum við morð á þeim er að renna út á dagsetningu.  Þá var spýtt í lófa og nokkrir myrtir fyrir hádegi.  Það væri vond meðferð á verðmætum að nota ekki tækifærið á meðan lyfið er virkt.

  Önnur saga er að þetta næstum því útrunna lyf er bölvað drasl. Það er svo lélegt að margir fangar hafa verið pyntaðir til dauða.  Eða réttara sagt upplifað sársaukafullt dauðastríð í allt að 43 mínútur.  Margt er skemmtilegra en það.

  Embættismannakerfið er ekki alltaf hið skilvirkasta.  Hvorki á Íslandi né fyrir vestan haf.  Auðveldasta væri að skjóta vonda kallinn.  Næst auðveldast væri að gefa honum svefntöflu.  Þá væri hann rænulaus þegar hann er myrtur.

  Enn einn flöturinn eru lög sem kveða á um að sá réttdræpi megi velja sér draumamáltíð áður en hann er myrtur.  Þetta er galið.   Til hvers að tefja drápið um 20 mínútur eða 30 á meðan kvikindið gúffar í sig hamborgara eða KFC kjúklingabita?  Já,  glæpamenn hafa einfaldan og ömurlegan matarsmekk.  Það er reyndar kostur í þessu samhengi.       

    

        

Fjórða aftakan á viku

Athugasemdir

[Arnar Bj. (IP-tala skráð) 28.4.2017 kl. 20:22]

Merkilegt hvað samúðin og væntumhyggjan blossar upp meðal fólks þegar kemur að viðurstyggilegstu mannverum á jörðinni. Síðan þegar kemur að röngum hópum, eins og t.d. konum sem eru ófriskar þá er engin samúð með að leyfa lífinu að halda áfram. 

Hvers konar viðbjóð af mannkyni erum við að búa til?

[Sigurður I B Guðmundsson, 28.4.2017 kl. 20:34]

Ætli Erdogan viti af þessu???

[Wilhelm Emilsson, 29.4.2017 kl. 01:03]

Bjöggi og félagar góðir þarna!

"Já, glæpamenn hafa ömurlegan matarsmekk." 

[Wilhelm Emilsson, 29.4.2017 kl. 01:39]

Og Dead Kennedys flottir.

[Stefán (IP-tala skráð) 29.4.2017 kl. 11:16]

Ríkismorð á Íslendi felast í því að svelta heilbrigðiskerdið. Mér skilst að núna vanti eina 12 milljarða þar inn til að gera það þolanlegt. Fyrir nú utan það hvað er mikill skortur á hjúkrunarfræðingum. Gæði þjóðfelaga eru gjarnan metin út frá því hversu góð heilbrigðisþjónusta er. Bara sú gífurlega upphæð sem Vaðlaheiðargöng kosta umfram áætlun hefði náð að bjarga miklu fyrir heilbrigðiskerfið. Þetta lika rándýra gæluverkefni þeirra Kristjáns Möller og Steingríms J Sigfússonar. Voru menn að kaupa sér atkvæði ?

[Jens Guð, 29.4.2017 kl. 18:51]

Arnar,  ég get ekki kvittað undir að ófrískar konur séu í röngum flokki.  

[Jens Guð, 29.4.2017 kl. 19:05]

Wilhelm,  Dead Kennedys voru og eru flottastir.  Leiðinlegt að uppgjör þeirra endaði í rándýrum málaferlum sem Jello Biafra tapaði.

"Illska" með Ævintýri var flott lag og hefur elst vel.  Á sínum tíma þótti mér hart og hvellt trommusándið til vansa á annars góðum trommuleik.  Nokkrum árum síðar kom pönkið til sögunnar og svona trommusánd varð algengt.  Skerpir á drífandi rokkgírnum.

[Jens Guð, 29.4.2017 kl. 19:21]

Stefán,  upphæðin sem vantar inn í heilbrigðiskerfið er aðeins rösklega 2% af þeim peningum sem erlendir ferðamenn skilja eftir í hagkerfinu á Íslandi í ár.  Þetta er spurning um það hvert peningarnir eiga að fara.  2 milljarðar úr ríkissjóði eru á leið í kínverskan aflandsbanka.  6 milljarða króna land Vífilsstaða er selt Garðabæ með 90% afslætti.  Ríkiskirkjan fær 5 milljarða úr ríkissjóði í ár.  Þetta er allavega.   

[Stefán (IP-tala skráð) 29.4.2017 kl. 22:34]

Er ekki einhver Eingeyjarættarfnykur af öllu sem selt er ( eða gefið ) í Garðabænum Jens ? Veit ekki, en hinsvegar er það morgunljóst að þeir frændur Bjarni og Benedikt hafa Óttar Proppe heilbrigðisráðherra í vasanum svo að hann er úr öllum ham, eða þannig. Mér var reundar sagt í dag að Proppe sé frændi þeirra ?

[Wilhelm Emilsson, 29.4.2017 kl. 23:21]

Takk fyrir svarið, Jens. Ég er sammála þér um trommusándið. Ef ég hefði verið pródusentinn hefði ég mildað það aðeins. 

[Jens Guð, 1.5.2017 kl. 13:21]

Stefán,  það eru jól hjá Engeyjarættinni á hverjum degi núna.  Stjórnmáladeild ættarinnar hefur aldrei verið í jafn góðri aðstöðu til að moka úr ríkissjóði í alla vasa ættarmótsins.

[Tobbi (IP-tala skráð) 1.5.2017 kl. 21:51]

Það er náttúrlega þvættingur, og ekki þér samboðið að fara með annað eins fleipur, að á Íslandi séu Tyrkir réttdræpir og afar ólíklegt að svo hafi nokkurntímann verið. Sjá um þetta til dæmis: https://www.visindavefur.is/svar.php?id=5718

[Jens Guð, 2.5.2017 kl. 08:34]

Tobbi,  takk fyrir ábendinguna.  

[Steini (IP-tala skráð) 2.5.2017 kl. 13:28]

Hjúkk að leiðrett sé með tyrkjana áður en illt hlaust af.