Gott að vita

   Tímareimin í bílnum mínum var komin á tíma.  Ég hringdi í nokkur bifreiðaverkstæði.  Spurði hvað skipti á tímareim kosti.  Heildarverð með öllu.  Verðin reyndust mismunandi.  En öll eitthvað á annað hundrað þúsund.  Af einhverri rælni álpaðist ég til að leita á náðir "gúgglsins".  Fann þar nokkrar jákvæðar umsagnir um Bifreiðaverkstæði Jóhanns í Hveragerði.  Þar á meðal að verðlagning sé hófleg.

  Næsta skref var að hringja þangað.  "Vinnan kostar 35 þúsund," var svarið sem ég fékk.  "Þú getur sjálfur komið með varahlutina sem til þarf ef þú ert með afslátt einhversstaðar."

  Ég var ekki svo vel settur.  Spurði hvort að ég gæti ekki keypt þá hjá honum.  Jú, ekkert mál.  "Þá verður heildarpakkinn um 70 þúsund."

  Ég var alsæll.  Brunaði austur fyrir fjall.  Þegar til kom reyndist vélin miklu stærri en venja er í bíl af mínu tagi.  Fyrir bragðið tók vinnan klukkutíma lengri tíma en tilboðið hljóðaði upp á.  

  Er ég borgaði reikninginn var þó slegið til og tilboðið látið standa.  Endanlegur heildarreikningur var 68 þúsund kall.  

  Tekið skal fram að ég hef engin tengsl við Bifreiðaverkstæði Jóhanns.  Vissi ekki af tilvist þess fyrr en "gúgglið" kynnti það fyrir mér.

  Af þessu má læra:  Nota tæknina og "gúggla".  Fyrir mismuninn á fyrstu tilboðum og því síðasta er hægt að kaupa hátt í 200 pylsur með öllu í Ikea.  Samt langar mig ekkert í pylsu.

 

 

Athugasemdir

[Stefán (IP-tala skráð) 7.9.2017 kl. 13:42]

Þekki aðeins til þessa verkstæðis og hef bara heyrt jákvæðar umsagnir um það. Okrarar á svona vinnu geta bara étið það sem úti frýs. Það verður fróðlegt að sjá hvernig hausttilboð verða núna á dekkjaverkstæðum með tilkomu Costco, t.d. á N1 verkstæðum.

[Sigurður I B Guðmundsson, 7.9.2017 kl. 16:02]

Ég heyrði auglýsingu á útvarpi Sögu frá Nicoli um að athuga að skipta um tímareim. Ég dreif mig þangað en var þá sagt að það væri engin tímareim í mínum bíl!!!

[Jens Guð, 7.9.2017 kl. 18:01]

Stefán, verðmunur er ótrúlega mikill á milli verkstæða.  Full ástæða til að vekja athygli á því.    

[Jens Guð, 7.9.2017 kl. 18:03]

Sigurður I B,  þarna hefur einhver ruglast á húddi og skotti glæsikerrunnar.   

[Erla Magna Alexandersdóttir, 7.9.2017 kl. 20:12]

þessir strákar hafa aldrei verið í blöðum- auglyst eða komið ser á framfæri nema með frábærri þjónustu og engu okri- sanngjörnu verði- með bros á vör ! og fullt af góðum kúnnum !

[Stefán (IP-tala skráð) 7.9.2017 kl. 22:02]

Hvað ætli sé drukkið á Verkstæði Kynnisferða ?

[Jens Guð, 9.9.2017 kl. 09:46]

Erla Magna,  gott orðspor er besta auglýsingin.

[Jens Guð, 9.9.2017 kl. 09:48]

Stefán,  það er von að þú spyrjir.  Það er eitthvað rugl í gangi á þeim bænum.  Til að mynda hafa þeir boðað stórhækkað fargjald með flugrútunni.

[Stefán (IP-tala skráð) 9.9.2017 kl. 10:52]

Kynnisferðir á árinu: ,, Hálftómar flugrútur ", ,, Virða rútubann í miðbænum að vettugi " ölvaður rútubílstjóri ", glæfralegur framúrakstur rútu ", segja upp starfsmönnum ", ,, framkvæmdastjóri segir af sér ". 

[Jens Guð, 9.9.2017 kl. 18:13]

Stefán,  assgoti er ferilsskrá Kynnisferða orðin skrautleg upp á síðkastið.