Sjónvarpsþátturinn Útsvar

 

  Spurningakeppnin Útsvar hefur til fjölda ára verið einn vinsælasti dagskrárliður Sjónvarpsins.  Þar hefur margt hjálpast að:  Skemmtilegar og fjölbreyttar spurningar,  góðir spyrlar og ágæt sviðsmynd, svo fátt eitt sé nefnt.    

  "Ef það er ekki bilað þá þarf ekki að gera við það," segir heilræðið.  Þetta hefðu embættismenn Sjónvarpsins mátt hafa í huga.  Þess í stað réðust þeir á haustmánuðum í að stokka rækilega upp.  Látum vera að skipt hafi verið um spyrla.  Hugsanlega var það að frumkvæði fráfarandi spyrla,  Sigmars og Þóru.  Þau stóðu vaktina með glæsibrag í áratug.

  Verra er að sviðsmyndinni hefur verið kollvarpað ásamt fleiru.  Ekki endilega til hins verra.  Kannski jafnvel til bóta.  Vandamálið er að fastgróinn fjölskylduþáttur þolir illa svona róttæka breytingu á einu bretti.  Svoleiðis er margsannað í útlöndum.  Ekki aðeins í sjónvarpi.  Líka í útvarpi og prentmiðlum.  Fjölmiðlaneytendur eru afar íhaldssamir.

  Gunna Dís og Sólmundur Hólm eru góðir og vaxandi spyrlar.  Það vantar ekki.

  Tvennt má til betri vegar færa.  Annarsvegar að stundum eiga sumir keppendur til að muldra svar.  Þá er ástæða til að skýrmæltir spyrlar endurtaki svarið.  Hitt er að í orðaruglinu er skjárinn af og til of stutt í nærmynd.  Það er ekkert gaman að fylgjast með keppendum horfa á skjáinn hjá sér.  Þetta verður lagað,  ætla ég.  

 

Athugasemdir

[Sigurður I B Guðmundsson, 21.10.2017 kl. 17:27]

Er ekki skatturinn með útsvarið!!!

[Stefán (IP-tala skráð) 22.10.2017 kl. 10:24]

Eitt er á hreinu, að RUV er með langbestu og vönduðustu dagská allra íslenskra sjónvarps og útvarpsstöðva og líka trúverðugasta fréttaflutninginn.  

[Jens Guð, 23.10.2017 kl. 08:27]

Sigurður I B,  jú! 

[Jens Guð, 23.10.2017 kl. 08:27]

Stefán,  ég kvitta undir það.