Hlý og notaleg plata

   - Titill:  White Lotus

  - Flytjandi:  Hilmar Garðarsson

  - Höfundur laga og texta:  Hilmar Garðarsson

  - Einkunn: ****

  Að því er ég best veit er "White Lotus" önnur plata Hilmars Garðarssonr.  Hún er lágstemmdari og fábrotnari en "Pleased to Leave You" sem kom út 2004.  Núna er kassagítar eina hljóðfærið.  Ýmist lipurlega plokkaður eða nett "strömmaður".  Engir stælar.  Allt eins og beint af kúnni.  Það er líkast því að maður sé staddur á ljúfum tónleikum heima í stofu hjá Hilmari.  Söngröddin er dökk og þægileg; afslöppuð, vögguvísuleg (í jákvæðustu merkingu) og þíð.

  Við fyrstu spilanir runnu lögin dálítið saman.  Öll hæg og vinaleg; söngur og undirleikur í svipuðum gír.  Ég hugsaði:  "Gott væri að lauma lágværu orgeli undir eitt lag og snyrtilegum munnhörpuleik undir annað".  Við frekari hlustun féll ég frá þessari hugleiðingu.  Eftir því sem ég kynntist lögunum betur og sérkennum þeirra þá vil ég hafa þau eins og þau eru.  Platan er heilsteypt eins og hún er; alúðleg og ljúf.  Sterkasta lagið er hið gullfallega "Miss You".  Fast á hæla þess er lokalagið, "Nótt".

  

         

Athugasemdir

[Stefán (IP-tala skráð) 19.12.2017 kl. 17:59]

Maður sem klæðist svona líka fallegum Hendrix bol ætti allavega að hafa vit á gítarleik ... og þegar bætist svo við sítt hár og leðurjakki, þá hefði ég nú giskað á rokkara, en ekki kassagítar. Persónulega kann ég t.d. alltaf best við Neil Young með rafmagnsgítar.

[Jens Guð, 20.12.2017 kl. 08:04]

   Stefán,  Hilmar skartar flottasta húðflúri sem ég hef séð af Bob Marley.  Pabbi hans,  Garðar Harðar, er blúsgúrú Austfjarða.  Hefur verið að blúsa með Bjögga Gísla.