Færeyskur húmor

  Færeyingar eru góðir húmoristar.  Þeir eiga auðvelt með að koma auga á eitthvað spaugilegt.  Þegar þeim dettur í hug eitthvað sprell þá framkvæma þeir það þrátt fyrir að stundum kalli það á mikla vinnu og fyrirhöfn.  Dæmi:

  Rétt utan við höfuðborgina,  Þórshöfn,  er risastór saltgeymsla eyjanna niður við sjó.  Þegar ekið er til eða frá Þórshöfn þá liggur þjóðvegurinn ofan við saltgeymsluna.  Þak hennar blasir við vegfarendum.  Einn mánudagsmorgun blasti við þeim að einhver eða einhverjir höfðu málað snyrtilega og fagmannlega stórum stöfum á þakið orðið PIPAR. 

  Þétt austur af Þórshöfn er Nólsey.  Hún tilheyrir sveitarfélaginu Þórshöfn.  Hún skýlir höfninni í Þórshöfn fyrir veðri og vindum.  Íbúar eru hátt í 300.  Margir þeirra vinna í Þórshöfn. 

  Í Færeyjum hefur til átta ára verið rekinn sumarskóli í kvikmyndagerð.  Í ár er hann starfræktur í Nólsey.  Af því tilefni brugðu tveir vinir á leik og settu í gær upp risastórt skilti á eyjunni með orðinu NÓLLYWOOD.  Framkvæmdin tók marga daga og var dýr.  En vinirnir segja að þetta sprell eigi að endast í mörg ár.

  Eins og glöggt má sjá á myndinni hér fyrir neðan þá er skiltið afrit af frægasta skilti í Los Angeles í Bandaríkjum Norður-Ameríku.  Neðst til vinstri á myndinni sést hús.  Af því má ráða hver stærð skiltisins er. 

 

Athugasemdir

[Sigurður I B Guðmundsson, 4.7.2018 kl. 18:08]

Aður en ég varð eldriborgari kunni ég tvo færeyska brandara en núna kann ég engan!!!

[Jens Guð, 5.7.2018 kl. 11:00]

Sigurður I B,  ég kenni þér þessa í staðinn:

  -  Þjónn!  Það liggja tvær augnlinsur ofan á súpunni minni!

  -  Hvar?  Hvar?

 ----------------------------------------------

  Dani kom inn í Vesturkirkjuna.

  -  Prestur,  ég vil skipta um nafn.  Þú getur umskírt mig.

  -  Svo, hvað heitir þú?

  -  Hans Hommi

  -  Guð minn góður.  Ég skil,  ég skil.  Hvaða nafn viltu taka upp?

  -  Karl Hommi

----------------------------------------------

  Húsbóndinn mætir óvenju snemma heim og kemur að konunni allsnakinni. 

  -  Hvað er í gangi?

  -  Ég er að fara í bæinn að mótmæla?

  -  Er það jafnréttisbarátta?

  -  Nei,  ég ætla bara að láta alla í bænum vita að maðurinn minn sé svo nískur að hann bannar mér að kaupa ný föt?

  -  Og hvað?  Ætlar þú að ganga ber niður í bæ?

  -  Já,  alla leið niður að Vagli!

  -  Og framhjá Eikar-bankanum og allt?

  -  Já!

  -  Heppilegt.  Taktu þetta umslag með þér og renndu því inn um bréfalúguna hjá Eik.      

[Sigurður I B Guðmundsson, 5.7.2018 kl. 13:26]

 Nú rifjast upp fyrir mér þessir: Þjónn, þjónn það eru flugur í súpunni minni. Hvað er þetta maður sagði þjóninn þú pantaðir flugnasúpu! Svo var það homminn sem gat ekki rassgat!!

[Stefán (IP-tala skráð) 8.7.2018 kl. 13:45]

Stærsti færeyski brandarinn er samt auðvitað sá, að færeyingar eru fremri íslendingum á flestum sviðum. Færeyingar eiga gott heilbrigðiskerfi, en á Íslandi er heilbrigðiskerfið í molum. Lítil eyturlyfjaneysla er í Færeyjum á meðan íslendingar eru að drepa sig í stórum stíl á ofneyslu eyturlyfjum, ekki hvað síst ungt fólk. Ef færeyingar vilja vera í eyturlyfjaneyslu flytja þeir til Danmerkur, en eyturlyf eru seld út um allt á Íslandi og fólk pantar sér dóp eins og pizzur á netinu. Viðskiptalega eru færeyingar íslendingum mun fremri og græða tundum verulega á mistökuum íslendinga í viðskiptalífinu,s.s. á viðskiptabanni Gunnars Braga á rússa. Færeyingar hljóta stundum að hlæja sig máttlausa að allri heimskunni sem viðgengst á Íslandi. 

[Jens Guð, 8.7.2018 kl. 17:24]

Sigurður I B,  núna kannt þú til samans 5 færeyska bramdara!

[Jens Guð, 8.7.2018 kl. 17:26]

Stefán,  ég tek undir hvert orð - nema að Færeyingar hlæja ekki að Íslendingum.  Varðandi suma hluti þá hafa þeir samúð með Íslendingum.