Veitingaumsögn

 - Veitingastaður:  PHO Vietnam Restaurant,  Suðurlandsbraut 6,  Reykjavík

 - Réttir:  Grísakótelettur og lambakótelettur

 - Verð:  1890 - 3990 kr.

 - Einkunn: **** (af 5)

  Móðir mín á erfitt með gang eftir að hún fékk heilablóðfall.  Vinstri hluti líkamans lamaðist.  Öllum til undrunar - ekki síst læknum - hefur henni tekist að endurheimta dálítinn mátt í vinstri fót.  Nægilegan til að notast við göngugrind.  Henni tekst jafnvel að staulast afar hægt um án grindarinnar. 

  Þetta er formáli að því hvers vegna ég fór með hana á PHO Vietnam Restaurant.  Hún er búsett á Akureyri en brá sér í dagsferð til borgarinnar.  Henni þykir gaman að kynnast framandi mat.  Ég ók með hana eftir Suðurlandsbraut og skimaði eftir spennandi veitingastað með auðveldu aðgengi fyrir fatlaða.  Vietnam Restaurant virtist vera heppilegt dæmi.  Ég ók upp á gangstétt og alveg að útidyrahurðinni.  Þar hjálpaði ég mömmu út úr bílnum og sagði henni að ég yrði eldsnöggur að finna bílastæði. 

  Mamma var ekki fyrr komin út úr bílnum en ungur brosmildur þjónn staðarins spratt út á hlað, studdi hana inn og kom henni í sæti.  Aðdáunarverð þjónusta.  Þetta var á háannatíma á staðnum;  í hádegi.

  PHO Vietnam Restaurant er fínn og veislulegur staður. 

  Ég fékk mér grillaðar grísakótelettur.  Mamma pantaði sér grillaðar lambakótelettur.  Meðlæti voru hvít hrísgrjón,  ferskt salat og afar mild súrsæt sósa í sérskál.  Á borðum var sterk chili-sósa í flösku.  Við forðumst hana eins og heitan eld.  Þóttumst ekki sjá hana.  

  Réttirnir litu alveg eins út.  Þess vegna er undrunarefni að minn réttur kostaði 1890 kr. en lambakóteletturnar 3990 kr.  Vissulega er lambakjöt eilítið dýrara hráefni.  Samt.  Verðmunurinn er ekki svona mikill.

  Kóteletturnar litu ekki út eins og hefðbundnar kótelettur.  Engin fituarða var á þeim.  Fyrir bragðið voru þær dálítið þurrar.  Vegna þessa grunar mig að þær hafi verið foreldaðar.  Sem er í góðu lagi.  Ég var hinn ánægðasti með þær.  Mömmu þóttu sínar aðeins of þurrar.  Að auki fannst henni þær skorta íslenska lambakjötsbragðið;  taldi fullvíst að um víetnamskt lamb væri að ræða.  Ég hef efasemdir um að veitingastaður á Íslandi sé að flytja til Íslands lambakjöt yfir hálfan hnöttinn.  Nema það sé skýringin á verðmuninum.

  Kóteletturnar,  þrjár á mann,  voru matarmiklar.  Hvorugu okkar tókst að klára af disknum. 

  Að máltíð lokinni sagði ég mömmu að hinkra við á meðan ég sækti bílinn.  Er ég lagði aftur upp á stétt sá ég hvar brosandi þjónn studdi mömmu út.  Annar en sá sem studdi hana inn.  Til fyrirmyndar.

Athugasemdir

[Stefán (IP-tala skráð) 4.9.2018 kl. 07:31]

Ég hef borðað á þessum ágæta stað þegar ég hef verið á Íslandi. Þykir maturinn þar góður, verðið hagstæðara en á veitingastöðum reknum af fégráðugum íslendingum og svo er þjónusta og framkoma fólks frá Asíu yfirleitt mun betri en hjá íslendingum.

[Sigurður I B Guðmundsson, 4.9.2018 kl. 09:48]

Við hjónin fórum í Mathöllina Granda í gær og kom staðurinn okkur skemmtilega á óvart. Fengum okkur mat á stað sem heitir Lax. Mæli með þessum stað.

[Jens Guð, 5.9.2018 kl. 00:38]

Stefán,  ég veit ekki hvort að það voru sömu eigendur en fyrir kannski tveimur árum keypti ég þarna hádegismat til að taka með.  Þá valdi maður tvo rétti af mörgum fyrir um það bil 1100 kall.  Það dæmi er ekki lengur í gangi.

[Jens Guð, 5.9.2018 kl. 00:39]

Sigurður I B,  takk fyrir ábendinguna.  Ég ætla að tékka á Lax.

[Sigurður Bjarklind (IP-tala skráð) 5.9.2018 kl. 06:49]

Við hnjónin vorum nokkra daga á Ísafirði í sumar. Í Nettoklasanum þar er Tælenskur veitingastaður. 3 réttir og glás af hrísgrjónum á 1500 kr. Mjög góður og mikill matur. Og brosandi þjónusta.

[Sigurður Bjarklind (IP-tala skráð) 5.9.2018 kl. 06:50]

Úps! Við hjónin!

[Jens Guð, 5.9.2018 kl. 11:12]

Sigurður Bjarklind,  ég fer árlega til Ísafjarðar.  Snæði þá ætíð hjá þessum tælenska stað. 

[Stefán (IP-tala skráð) 6.9.2018 kl. 18:45]

Reyndar sýnist mér að flokka megi verðið á lambakótelettunum undir okurverð, ef maður skoðar málið og myndina betur.

[Jens Guð, 6.9.2018 kl. 20:11]

Stefán,  að minnsta kosti er verðið á lambakótelettunum  einkennilegt í samanburði við verðið á grísakótelettunum.