Glæsileg ljóðabók

  Fyrir helgi gaf bókaútgáfan Skrudda út ljóðabókina Ástkæra landið.  Höfundur er söngvarinn og söngvaskáldið Ólafur F. Magnússon.  Einnig þekktur sem farsæll og frábær læknir,  baráttumaður fyrir umhverfisvernd og verndun gamalla húsa,  borgarfulltrúi og besti borgarstjóri Reykjavíkur. 

  Útgáfuhófið var í Eymundsson á Skólavörðustíg.  Ég man ekki eftir jafn fjölmennu útgáfuhófi.  Það var troðið út úr dyrum.  Bókin seldist eins og heitar lummur. 

  Að því kom að Ólafur gerði hlé á áritun.  Þá fékk hann Ómar Ragnarsson og Guðna Ágústsson til að ávarpa gesti.  Allir fóru þeir á kostum.  Reittu af sér brandara á færibandi.  Gestir lágu í krampa af hlátri.  Svo sungu Ólafur og Guðlaug Dröfn Ólafsdóttir fallegt lag við undirleik gítarsnillingsins Vilhjálms Guðjónssonar.     

  Ólafur yrkir á kjarnyrtri íslensku í hefðbundnu formi stuðla, höfuðstafa og endaríms.  Hann tjáir ást sína á fósturjörðinni og náttúrunni.  Einnig yrkir hann um forfeðurna,  fegurð og tign kvenna, kærleikann og bjartsýni.  En líka um dimma dali sem hann hefur ratað í.  Þá deilir hann á efnishyggju og rétttrúnað.  Hér er sýnihorn:

Ástkæra landið

Ástkæra landið, elskaða þjóð,

ást mín til þín er hjartanu kær.

Ég einlægt vil fagna feðranna slóð

og færa til nútíðar söguna nær.

Áarnir traustir, sem tryggðu vorn hag,

við tignum þá, heiðrum og fullveldið dýrt.

Við mærum þá alla hvern einasta dag.

Enn ber að þakka, við kveðum það skýrt.

_____________________________________________________________

Uppfært 18.9.2019:  Áskæra landið er í 1. sæti á sölulista Eymundsson.  

Athugasemdir

[Sigurður Bjarklind (IP-tala skráð) 17.9.2019 kl. 07:09]

Það er gott til þess að vita. Ég hef alltaf haft á tilfinningunni að hann hafi verið stunginn í bakið í borgarpólitíkinni.

[Stefán Guðmundsson (IP-tala skráð) 17.9.2019 kl. 19:35]

Fjölhæfur listamaður hann Ólafur F rétt eins og annar fyrrum borgarstjóri, Jón Gnarr. Tvímælalaust bestu borgarstjórar Reykjavíkur síðustu áratugi. Dagur umferðarhnúntur og Holu Hjálmar hefðu betur lært eitthvað af þeim.  Mikið mætti nú annars Jón Valur Jensson vera ánægður ef hann gæti hnoðað saman svona góðum kveðskap, en auðvitað er ekki hægt að ætlast til þess að öll ljóðskáld séu læsileg. 

[Jens Guð, 17.9.2019 kl. 20:14]

Sigurður Bjarklind,  hann var ofsóttur og lagður í einelti.  Bæði af andstæðingum og "samherjum".  Það var ljót aðför.  Ólafur er góður maður, hreinskiptinn og trúr sínum góðu hugsjónum. 

[Jens Guð, 17.9.2019 kl. 20:15]

Stefán,  Jón Valur er alveg ágætlega hagmæltur. 

[Stefán Guðmundsson (IP-tala skráð) 17.9.2019 kl. 20:56]

Einhverjir hafa kallað JVJ Leirulækjar-Fúsa í mín eyru, kanski þá ekki bara fyrir kveðskapinn ? 

En dýrt er kveðið hjá gamla lækninum og borgarstjóranum.

[Jón Valur Jensson, 18.9.2019 kl. 03:26]

Þá Ólafi er hrósað, í einum gellur:

"Ólæsilegur er Jón! það er satt!"

Viðrar hér sína rætni og rellur,

rennur samt óðar á bossann flatt.

Er Stefáns meinbægni í stuðla fellur,

stríðsmanninn sjálfan það naumast fær glatt!

[Jósef Smári Ásmundsson (IP-tala skráð) 18.9.2019 kl. 06:46]

Þeir eru ágætlega hagmæltir báðir tveir, Ólafur og Jón Valur. Eigum við ekki bara að láta þá eiga það sem þeir eiga, Stefán. Ólafur ku líka verið ágætis lagasmiður. reyndar ekki á minni Klassík- og Prog línu en það er nú bara spurning um tónlistarsmekk.

[Sigurður I B Guðmundsson, 18.9.2019 kl. 08:42]

Þú kemur víða við Jens!

[Stefán Guðmundsson (IP-tala skráð) 18.9.2019 kl. 13:46]

Vel gert hjá þér Jón Valur, en Ólafur F hefur samt vinninginn.

[Jens Guð, 18.9.2019 kl. 18:55]

Stefán (# 5),  Ólafur F. er virkilega gott ljóðskáld.  Merkilegt að hann skuli ekki hafa byrjað að yrkja ljóð fyrr en á sjötugsaldri 2013.

[Jens Guð, 18.9.2019 kl. 18:57]

Jón Valur,  góður!

[Jens Guð, 18.9.2019 kl. 19:01]

Jósef Smári,  Ólafur er fyrirtaks lagahöfundur.  Sum laga hans fara í humátt að klassík, svo sem barokk.  Enda hlustar hann mikið æá klassík.  

[Jens Guð, 18.9.2019 kl. 19:01]

Sigurður I B (# 8),  ég er út um allt!

[Þorsteinn Siglaugsson, 18.9.2019 kl. 19:22]

Ólafur er ágætur maður. En ef ég ber saman þau tvö kvæði sem hér eru birt, í færslu og athugasemdum, hefur Jón Valur klárlega vinninginn.

[Stefán Guðmundsson (IP-tala skráð) 18.9.2019 kl. 19:24]

Handónýt borgarstjórn og aðrir handónýtir borgarfulltrúar ættu að fá reynsluboltann Ólaf F til að koma viti fyrir mannskapinn, sem ekki ræður við nokkurn skapaðan hlut, hvort sem er umferðaröngþveiti eða sundurgrafinn miðbæ og svo vill þessi mannskapur neyða grasi og káli ofan í borgarbörnin á meðan stórsteikurnar fljóta um Ráðhúsið. 

[Lífsréttur, 18.9.2019 kl. 22:45]

Vísutetur tileinkað Stefáni:

Upp er risinn óðfræðingur 

einkar glöggr að sínu mati.

Skáldið hvert nú sælt hér syngur

slíks með rós í hnappagati.

[Jón Valur Jensson, 18.9.2019 kl. 22:50]

Úpps, en kom frá mér.

[Stefán Guðmundsson (IP-tala skráð) 19.9.2019 kl. 08:15]

Takk fyrir að reyna Lífsréttur, en þessi vísa finnst mér stirðbusaleg - Takk samt kærlega og meira svona.

[Jón Valur Jensson, 19.9.2019 kl. 12:50]

.

Palladóma djarfur setur

drengur fram og sprettir glæstir.

En hvort Stefán stirða getur

stöku ort, það vita fæstir.

[Stefán Guðmundsson (IP-tala skráð) 19.9.2019 kl. 14:10]

Nokkuð góð hjá þér þessi Jón Valur, en vonandi truflar þessi vísnagerð þín þig ekki frá málgagni þínu, Útvarpi Sögu.  

[Jens Guð, 19.9.2019 kl. 17:29]

Stefán (# 9),  þeir hafa ólíkan stíl.  Báðir góðir.  

[Jens Guð, 19.9.2019 kl. 17:30]

Þorsteinn, þeir eru hvor öðrum betri.  

[Jens Guð, 19.9.2019 kl. 17:31]

Stefán (# 15),  Ólafi er sárt saknað úr embætti borgarstjóra.  

[Jón Valur Jensson, 20.9.2019 kl. 10:49]

Bót á vísunni: að bæta við upphrópunarmerki í lok 2. línu:

drengur fram og sprettir glæstir!

[Stefán Guðmundsson (IP-tala skráð) 21.9.2019 kl. 10:24]

Þetta er fallega ort hjá þér Jón Valur og upphrópunarmerkið segir mikið um einlæga aðdáun þína.

[Jón Valur Jensson, 21.9.2019 kl. 11:43]

Upphrópunarmerkið var hvorki til fegurðarauka né til að votta þér neina aðdáun í þínum slapplegu bragfræðiálitum, heldur til að undirstrika það við hugsanlega fattleysingja, að vitaskuld voru fyrstu tvær línurnar greinilegt oflof af því tagi sem kallast háð.

Svo blasir við, að þú getur ekkert ort þér til viðréttingar.

[Stefán Guðmundsson (IP-tala skráð) 21.9.2019 kl. 20:59]

Það er nokkuð augljóst að ég svara ekki fyrir mig með vísum, enda hef ég ekki smekk fyrir slíku. Hins vegar les ég reglulega góðar ljóðabækur eftir þér mun fremri skáld Jón valur. Í sérstöku uppáhaldi hjá mér eru ljóðskáldin: Steinn Steinarr, Snorri Hjartarson, Stefán Hörður Grímsson, Hannes Sigfússon, Jón úr Vör, Vilborg Dagbjartsdóttir, Þorsteinn frá Hamri, Hannes Pétursson, Ingibjörg Haraldsdóttir, Dagur Sigurðarson, Megas, Ólafur Haukur Símonarson, Þórarinn Eldjárn, Sigurður Pálsson, Steinunn Sigurðardóttir, Ísak Harðarson, Einar Már Guðmundsson, Gyrðir Elíasson, Ingunn Snædal, Eyþór Árnason.