Heilsuátak Stónsara

  Óregluiðnaðurinn hefur átt um sárt að binda síðustu árin.  Þetta byrjaði með því að gítarleikari The Rolling Stones,  Keith Richards,  hætti á gamals aldri að nota eiturlyf.  Áður var hann stórtækur neytandi þeirra í hálfa öld.  Hann hélt sig ekki við eitthvert eitt eiturlyfið heldur hellti þeim öllum í sig sem hann komst yfir.

  Keith gafst upp á dópinu vegna þess að honum þótti eiturlyfin sem eru í boði í dag vera léleg.  Útþynnt drasl.

  Þessu næst fékk whisky-iðnaðurinn kjaftshögg er hann hætti að þamba daglegan skammt. Hann hætti að drekka áfengi,  að eigin sögn.  Hefur síðan aðeins drukkið hvítvín og bjór.  Nú er það sígarettuiðnaðurinn sem fær höggið.  Í október hætti hann að reykja búðarsígarettur.  Segist vera hættur að nenna því.  Ekki hefur komið fram hvort eða hvað hann reykir í staðinn.  

  Í fréttum er haldið fram að hann hafi reykt 19 pakka á dag.  Það stenst ekki skoðun.  Mestu strompar ná ekki að reykja nema 4 eða 5 pakka á dag.  Hver sem rétt tala er þá finnur sígarettuiðnaðurinn fyrir heilsuátaki Keiths.  Hann segir að mun auðveldara hafa verið að leggja heróínneyslu á hilluna en retturnar.   

 

Athugasemdir

[Sigurður I B Guðmundsson, 15.2.2020 kl. 10:34]

Hver hefði trúað því að Keith Richards gæti orðið fyrirmynd í einhverri mynd!!!!

[sigurður bjarklind (IP-tala skráð) 15.2.2020 kl. 13:57]

Hann hlýtur að deyja fljótlega ef hann er hættur að marínera sig. 

[Stefán Guðmundsson (IP-tala skráð) 16.2.2020 kl. 18:56]

Ég held að KEEF spjari sig í gegn um öll þessi átök, bara ef hann tekur ekki upp á þvi að gerast vegan. 

[Jens Guð, 16.2.2020 kl. 19:26]

Sigurður I B,  þetta hefði einhvertíma þótt með ólíkindum.

[Jens Guð, 16.2.2020 kl. 19:27]

Sigurður Bjarklind,  þetta hlýtur að vera sjokk fyrir líkamsstarfsemi mannsins.

[Jens Guð, 16.2.2020 kl. 19:33]

Stefán,  spurning hvort að það verði næsta skref hjá honum.