Smásaga um mann

  Bjössi gengur léttfættur niður Skólavörðustíg.  Á miðri götunni mætir hann manni.  Þeir heilsast ekki.  Þeir þekkjast ekki.  Engir aðrir eru á ferli.  Ekki þarna.  Samt er klukkan 5 að morgni.  

  Bjössi heldur áfram för.  Kominn niður í Austurstræti rekst hann á vinnufélaga.  Áreksturinn er svo harkalega að þeir falla í götuna og kútveltast þar í góða stund.  Eftir að hafa rúllað fram og til baka bera þeir kennsl á hvorn annan.  Þeir brölta á fætur, faðmast og knúsast.

  Í þann mund sem ástandið er að verða erótískt spyr Bjössi:  "Hvað er að frétta?"   Vinnufélaginn lætur ekki koma að tómum kofa hjá sér.  Hann romsar óðamála: "Húsasmiðjan er með afslátt á blómum.  Allt upp í 50%.  Verkfæralagerinn er með opið til klukkan 5 á sunnudögum.  Í útlöndum var maður tekinn af lífi af því að allir voru orðnir leiðir á honum.  Íslendingar þurfa að skapa 60 þúsund ný störf næstu 30 árin.  Þjóðverjar eru farnir að kaupa hús í Færeyjum.  Einn keypti 3 hús á einu bretti.  Bítillinn og barnagælan Paul McCartney bregst hinn versti við ef einhver kallar Heather stjúpdóttur hans.  Þá skipar hann höstuglega að hún sé kölluð dóttir hans.  Hún sé jafn mikil dóttir hans og þær sem hann hefur eignast í hjónabandi.  Hann ættleiddi hana er hann tók saman við mömmu hennar,  Lindu.  Atvinnuleysi á Íslandi fer lækkandi.  Skiptar skoðanir eru á vindorkurafmagni.  Hafrannsóknarstofa leggur til minni þorskafla.  Minni þorskafli var upphaf kvótakerfisins á níunda ártugnum.  Sælgætisgerðin Nói Síríus er ósátt við að yfirvöld mismuni samkeppnisstöðu erlendra og innlendra framleiðenda með ofurtollum á hráefni.   EZ túpressan er þarfaþing á öllum heimilum.  Hún fullnýtir allt innihald túpu,  hvort sem er kaviar,  tannkrem, olíulitir eða annað. Fyrirhugað er slitlag á Dettifossveg.  Tónlistarmaðurinn Benni Hemm Hemm er frá Hólum í Hjaltadal.  John Lennon var ekki ættrækinn.  Enda ekki alinn upp af foreldrum sínum heldur kuldalegri frænku.  Frænkunni gaf hann höll.  Líka systrum sínum tveimur.  Í höllinni bjuggu systurnar ásamt fjárhaldsmanni og fleirum.  Þegar John Lennon var myrtur gerði ekkjan,  Yoko Ono,   sér lítið fyrir og sparkaði systrunum og liðinu í kringum þær út úr húsinu.  Bensínsölu í Verslun Haraldar Júl hefur verið hætt á Sauðárkróki.  Nasdaq vísitalan lækkaði um hálft prósent í gær."  

  Þegar hér er komið sögu bugast Bjössi undir tíðindunum.  Hann brestur í grát með miklum hljóðum.  Vinnufélaginn fattar strax að staðan er sorgleg.  Hann brestur einnig í grát og grætur miklu hærra en Bjössi.  Fær að auki blóðnasir.  Þeir ganga svo í sitthvora áttina án þess að kveðjast.  Hávær grátur þeirra bergmálar um næstu götur og vekur útlendinga í nálægum hótelum.     

              

Athugasemdir

[Jónas Ómar Snorrason, 18.6.2020 kl. 05:59]

Verst var að þeir vöktu helv. yndislegu útlendingana. Annars minnti sagan á Kalla biskup þegar hann mætti í sveitina forðum sem krakki. Bóndinn spurði hann hvað væri að frétta úr borgini, Kalli hugsaði sig um, svaraði síðan, krónan er fallin. Hafði heyrt foreldra sína minnast eithvað á það.

Þessi saga þín er eðal!!! 

[sigurður bjarklind (IP-tala skráð) 18.6.2020 kl. 06:04]

Það sker sig nú úr þetta með bensínsöluna hjá Halla Júl. Það veldur grátkastinu.

[Sigurður I B Guðmundsson, 18.6.2020 kl. 10:14]

Ég fékk kökk í hálsinn við að lesa þetta en grét þó ekki. En ef það hefði komið eitthvað neikvætt um CCR lofa ég engu!!!

[Jens Guð, 18.6.2020 kl. 16:01]

Jónas,  takk fyrir það og takk fyrir skemmtilega sögu af Kalla.

[Jens Guð, 18.6.2020 kl. 16:01]

Sigurður Bjarklind,  ég tek undir það.

[Jens Guð, 18.6.2020 kl. 16:02]

Sigurður I B,  ég skil það.

[Stefán (IP-tala skráð) 18.6.2020 kl. 18:01]

Þegar ég var búinn að lesa þessa ágætu sögu fór ég að hlusta á Útvarp Sögu í bílnum og þá lenti ég í fyrsta skipti í jarðaför undir stýri, því að þar voru þeir Pétur Gunnlaugsson og Magnús Þór Hafsteinsson að jarða Viðar Guðjohnsen í umræðum um sjávarútvegsmál og útgerðir, en ég brast ekki í grát út af því heldur þvert á móti. 

[Jens Guð, 18.6.2020 kl. 18:24]

Stefán,  ég þarf að tékka á þættinum.  

[Jens Guð, 18.6.2020 kl. 20:48]

Þetta er hinn áhugaverðasti þáttur.  Ég sé ástæðu til að pósta slóðinni:  https://www.utvarpsaga.is/kvotinn-sjavarutvegur/  Maggi kann og veit.  Hann kenndi Óla Palla að hlusta á The Clash 1977.  

[Stefán (IP-tala skráð) 19.6.2020 kl. 08:01]

Magnús og Pétur voru málefnalegir og flottir, en ég hef tekið eftir því að fólk lítur á Viðar sem kjánalegan spaugara og tekur ekki mark á neinu sem hann hefur að segja. Hann hringir reglulega í símatíma Bylgjunnar til þess eins að láta hlæja að bullinu í sér. Svo var framboð hans álíka ,, trúverðugt ,, og framboð Guðmundar Franklín núna.   

[Jens Guð, 20.6.2020 kl. 18:30]

Stefán,  ég þarf að tékk á símatíma Bylgjunnar.