Kenning Gudda

13.8.2020 | 03:28

Guddi keðjureykti. Sennilega áttu reykingarnar einhvern þátt í miklum hóstaköstum sem hann fékk í tíma og ótíma. Oftar í ótíma.

Guddi slóst í hóp með systkinum mínum er þau skelltu sér á dansleik í Varmahlíð. Er dansleik lauk sýndu gestir á sér fararsnið. Þar á meðal Guddi og systkinin. Líka piltur sem sýndi systir minni áhuga. Gudda þótti hann full ágengur. Hann snöggreiddist, greip þéttingsfast um hálsmálið á kauða og reiddi hnefann til höggs. Í sama mund fékk hann langt og heiftarlegt hóstakast. Hnefinn lak niður. En Guddi sleppti ekki takinu á hálsmálinu. Né heldur rauf hann augnsambandið. Hann starði heiftúðlegum augum á drenginn á meðan hann hann hóstaði og hóstaði. Gaurinn sýndi engin viðbrögð. Starði bara í forundran á Gudda. Hann var töluvert stærri og kraftalegri en Guddi.

Er hóstakastinu linnti var Guddi búinn á því. Hann sleppti takinu og bað systkinin um eitthvað að drekka. Hann yrði að væta kverkarnar eftir svona hóstakast.

Guddi var alltaf eldfljótur til svars. Hann, ég og pabbi vorum að stinga út úr fjárhúsum. Guddi lét reykingar sinar ekki trufla vinnuna. Hann hélt sígarettum á milli vara og hafði hendur lausar til athafna.

Bróðir minn, 4ra eða 5 ára, spurði Gudda: "Af hverju reykir þú svona mikið?"

Guddi svaraði þegar í stað: "Þeir sem vinna mikið þurfa að reykja mikið!"

&nbsp;

Meginflokkur: Spaugilegt | Aukaflokkar: Lífstíll, Spil og leikir, Vinir og fjölskylda | Facebook

Athugasemdir

Hann hefði betur bara átt að taka hressilega í nefið.

sigurður bjarklind (IP-tala skráð) 13.8.2020 kl. 07:56

Nú er ég hættur að vinna og reykja svo Guddi var þá kannski ekki alvitlaus! En leitt að systir þín skildi missa af "sjansinum"!

Sigurður I B Guðmundsson, 13.8.2020 kl. 15:56

Sigurður Bjarklind, sammála.

Jens Guð, 13.8.2020 kl. 19:43

Sigurður I B, ég harma það ekki. Nokkru síðar eignaðist ég nefnilega góðan mág til 45 ára eða svo og væntanlega til lífstíðar.

Jens Guð, 13.8.2020 kl. 19:48

Guddi hefði nú verið flottur á Klausturbarnum forðum, að tuskast við þetta kjaftfora lið.

Stefán17 (IP-tala skráð) 13.8.2020 kl. 19:51

Stefán, hann hefði smellpassað í hópinn.

Jens Guð, 13.8.2020 kl. 20:12

Mér sýnast Vigga Hauks liggja eins og vindlaus flatsæng eftir vindhögg í allar áttir. Minnir mig eitthvað á baráttu Don Kikoti við vindmillur. Guddi virðist hinsvegar hafa staðið allar árásir af sér.

Stefán (IP-tala skráð) 14.8.2020 kl. 23:16

Stefán (# 7), já, er hún í striðsham þessa dagana, blessunin?

Jens Guð, 15.8.2020 kl. 21:46