Afmælisveisla aldarinnar

  Guddi ákvað að halda upp á sjötugsafmæli sitt með stæl.  Hann talaði um það sem afmælisveislu aldarinnar.  Hann bauð sínum bestu vinum.  Þeir voru foreldrar mínir og hjónin á Hólkoti í Unadal í Skagafirði.  Fleiri yrðu ekki í veislunni.  Þeir myndu bara flækjast fyrir.  Veislan yrði á Hótel Mælifelli á Sauðárkróki.  Ekkert til sparað:  Dýrustu forréttir,  dýrustu aðalréttir,  dýrustu desertar,  dýrasta koníakið,  dýrustu vindlarnir.   

  Guddi stóð við sitt og stýrði veisluhöldum með glæsibrag. Eftir desertinn pantaði Guddi dýrustu vindla á línuna.  Gestirnir afþökkuðu vindlana.  Hann fékk sér hinsvegar rándýran vindil.  Þjónninn benti honum á að bannað væri að reykja vindil inni.  Guddi sýndi því skilning.  Sagðist bara bregða sér út og reykja vindilinn þar.  Sem hann og gerði.  Nema hann skilaði sér ekki aftur inn.  

  Þegar ekkert bólaði á Gudda í langan tíma tóku gestir að ókyrrast.  Að lokum fór pabbi út að leita að honum.   Þar var enginn Guddi. 

  Sem betur fer voru gestirnir með ávísanahefti og gátu gert upp við Mælifell.  Annað hefði orðið vandræðalegt. 

  Næstu misseri varð Gudda tíðrætt um veislu aldarinnar.  Sagði hverjum sem heyra vildi frá henni.  Ekki síst þótti honum gaman að rifja upp við gestina og spyrja hvort að þetta hafi ekki verið veisla aldarinnar.  Mamma spurði hvers vegna hann hafi stungið af úr veislunni.  Guddi svaraði:  "Veislan var búin og þá fóru náttúrulega allir heim til sin." 

 

  

    

Athugasemdir

[Þorsteinn Briem, 21.8.2020 kl. 00:22]

Englar alheimsins á Hótel Sögu - Myndband

[sigurður bjarklind (IP-tala skráð) 21.8.2020 kl. 06:25]

 Framsýnn maður hann Guddi. Hann hefur reiknað með fyrirtækjakostun enda er sagan komin á prent fyrir alþjóð þótt seint sé.

[Jens Guð, 21.8.2020 kl. 13:29]

Steini,  takk fyrir þessa snilldarklippu!

[Jens Guð, 21.8.2020 kl. 13:29]

Sigurður Bjarklind,  svo sannarlega!

[Tobbi (IP-tala skráð) 22.8.2020 kl. 14:23]

Ertu nokkuð að tala um Guðjón Bjarna Sveinsson sem var í Miðhúsum? Við unnum saman í nokkrar vikur og er hann mér mjög minnisstæður.

[Jens Guð, 22.8.2020 kl. 16:33]

Tobbi,  jú,  sá er maðurinn.

[Stefán (IP-tala skráð) 23.8.2020 kl. 14:06]

Ráðherrar kýla út vambir sínar á dýrum veitingastöðum, væntanlega með einkabílstjórum sínum og sjálfsagt fylgir koníak og feitir vindlar með. Þjóðin borgar reikningana. Guddi kunni greinilega ekki síður að gera vel við sig á kostnað annara. Jói Fel fetar hins vegar enn sóðalegri slóðir við að komast hjá greiðslum herma nýlegar fréttir. 

[Jens Guð, 23.8.2020 kl. 16:45]

Stefán,  það er ljótur leikur að stela frá starfsmönnum sínum.  Nú veit ég hvar á ekki að kaupa brauðmeti.

[Stefan (IP-tala skráð) 23.8.2020 kl. 21:33]

Sumir eru bara litilmenni þegar a reynir.

[Jens Guð, 26.8.2020 kl. 18:05]

Stefán,  kappinn hefur heldur betur fallið í áliti. 

[Stefán (IP-tala skráð) 26.8.2020 kl. 18:45]

Er bara orðinn að deigi sem aldrei verður kaka.