Breskir strompar

  Á dögunum þurfti ég að vera heimavið í nokkra daga.  Til að stytta mér stundir tók ég upp á því að horfa á sjónvarp úr hófi fram.  Meðal þess sem fyrir augu bar var breskur raunveruleikaþáttur,  Love island.  Hópi glæsilegra ungmenna á þrítugsaldri er komið fyrir i reisulegri villu á eyju.  Þar er dekrað við hópinn í mat og drykk.  Dömurnar spranga um á bikiní og drengirnir á sundskýlu.  Enda nýta þau sér sundlaugina.

  Leikurinn gengur út á að fólkið pari sig.  Þeim sem mistekst er sparkað af eyjunni.  Aðrir koma í staðinn.  Þeir þurfa að sprengja upp parasamband til að mynda nýtt par.  Nóg er að horfa á einn þátt.  Þeir eru allir eins.  Fátt ber til tíðinda.

  Eitt vekur athygli umfram annað.  Það er hvað hátt hlutfall þátttakenda keðjureykir.  Ég kannaði málið.  Í ljós kom að fjórðungur Breta reykir.  Til samanburðar eru Íslendingar ekki að standa sig.  Aðeins sjöundi hver reykir. 

   

Athugasemdir

[sigurður bjarklind (IP-tala skráð) 23.9.2020 kl. 06:54]

Það er klárlega betra að reykja ketið eftir að skepnan er dauð en ekki á meðan hún er enn á fæti.

[Jens Guð, 23.9.2020 kl. 06:59]

 Sigurður Bjarklind,  þú talar eins og fagmaður!

[Stefán (IP-tala skráð) 23.9.2020 kl. 09:24]

Það þykir eðlilegt ( t.d. hér á landi ) að reykingafólk taki reykingapásur upp á kanski klukkutíma á dag, en ef þeir sem ekki reykja taka pásur með þeim, þá kallar það á skammir yfirmanna. Reykingafólk er að mörgu leyti forréttindahópur. 

[Þorsteinn Siglaugsson, 23.9.2020 kl. 10:47]

Það er kannski tækifæri til nýsköpunar að fara að byggja upp tóbaksmarkaðinn að nýju. Þá geta fleiri fengið vinnu við að selja tóbakið, lækna reykingamennina og grafa þá svo á endanum. Reykingapásur aukast, nýting vinnuaflsins minnkar, og þá þarf að ráða fleiri í allskonar störf. 

Annars sá ég einhversstaðar að það væri minni hætta á að fá kóvít ef maður reykti. Veit ekki hvað er til í því. 

[Sigurður I B Guðmundsson, 23.9.2020 kl. 10:47]

Fjórir Bítlar og einn Jens með "sígó"!!!

[Jens Guð, 26.9.2020 kl. 16:24]

Stefán,  yfirmenn nota hvert tækifæri sem gefst til að skamma starfsfólkið. 

[Jens Guð, 26.9.2020 kl. 16:29]

Þorsteinn,  góð hugmynd!.  Um kóvít:  Ég heyrði í útvarpinu að fólk með D-vítamínskort fari verst út úr veirunni.  Það kallar á Lýsisþamb. 

[Jens Guð, 26.9.2020 kl. 16:32]

Sigurður I B,  Bítlarnir voru og eru mér svo mikil fyrirmynd að ég apa ósjálfrátt eftir þeim.  Að upplifa feril þeirra - Bítlaæðið og það allt - í rauntíma voru forréttindi.  Meiriháttar forréttindi.