Afi hótar bónda

  Afi var mikill flakkari.  Alveg til dauðadags. Hann lét gönguerfiðleika ekki aftra sér.  Vegna brjóskeyðingar í mjöðmum var hann skakkur og skældur;  gat ekki rétt úr sér og staulaðist áfram með tvo stafi.  Hann var seigur að snapa far,  hvort heldur sem var til og frá Sauðárkróki,  Svarfaðardal,  Reykjavík eða eitthvert annað.   

  Þegar ég var 7 eða 8 ára var ég í fámennum barnaskóla í Hjaltadal.  Skólastofan var rúmgóð stofa á bóndabæ.  Það hentaði afa.  Hann fékk far með mjólkurbílnum frá Sauðárkróki til skólans.  Þaðan fékk hann far með skólabílnum heim í Hrafnhól.  Þar bjuggum við.

  Eitt sinn í lok skóladags stóðum við krakkarnir og afi úti á hlaði og biðum eftir bílnum. Skyndilega birtist bóndinn á bænum,  gekk að eldri bróður mínum og sakaði hann um að hafa brotið rúðu.  Strákur neitaði sök.  Bóndinn greip um hálsmál hans,  felldi hann á bakið,  settist yfir honum með hnefa á lofti.  Hótaði að berja úr honum játningu.  Afi brá við skjótt;  hóf annan staf sinn á loft og hrópaði:  "Slepptu drengnum eða ég læt stafinn vaða af fullu afli í hausinn á þér!"

  Bóndanum brá.  Hann þaut eins og eldibrandur inn í hús.  Lengi á eftir hældi afi sér af því við hvern sem heyra vildi hvað bóndinn varð hræddur við hann.  Bætti svo við:  "Verst hvað kvikindið var snöggt að flýja.  Ég hefði vilja dúndra í hausinn á honum!" 

 

Athugasemdir

[Sigurður I B Guðmundsson, 16.6.2021 kl. 22:30]

En þá hefði stafurinn líklega brotnað og karlinn þurft að staulast áfram með einn staf!!

[Jens Guð, 17.6.2021 kl. 00:55]

  Sigurður I B,  kallinn hefði verið sáttur við þann fórnarkostnað.  Hann var þekktur ofbeldismaður frá barnsaldri.  Lét aldrei tækifæri til átaka ónotað. 

[Sigurður (IP-tala skráð) 17.6.2021 kl. 07:20]

Málin leyst á hlaðinu og engir eftirmálar. Ef þetta hefði gerst í dag væri strákurinn hjá sálfræðingi, bóndinn á Hólmsheiði og afi á lokaðri réttargeðdeild.

[Jens Guð, 17.6.2021 kl. 10:21]

Sigurður (#3),  pottþétt rétt hjá þér!

[Vigfús Ingvar Ingvarsson (IP-tala skráð) 17.6.2021 kl. 14:30]

Leiðinlegt hvernig fólk ruglar saman orðmyndunum eftirmál (kvenkyn, fleirtala) í merkingunni "atburðarás sem hlýst af tilteknum atburði" og hinsvegar: eftirmáli/ eftirmálar, þ.e. viðbótarkafli/kaflar aftast í bók. Afsakið að kerfið tekur ekki íslenskar gæsalappir.

Vigfús

[Jens Guð, 17.6.2021 kl. 16:23]

Vigfús,  þetta er snúið.

[Sigurður (IP-tala skráð) 17.6.2021 kl. 18:01]

Þakka þér fyrir leiðréttinguna Vigfús. Reyni að vanda mig betur næst.

[Jens Guð, 17.6.2021 kl. 18:18]

Sigurðurn (#7),  þetta er allt í góðu.

[Magnús Sigurðsson, 17.6.2021 kl. 20:53]

Já ég verð að taka undir að hér er allt í góðu. Þetta er góð leiðrétting við góða athugsemd við góðan pistil. 

[Jens Guð, 17.6.2021 kl. 21:36]

Magnús,  takk fyrir það.

[Sigurður I B Guðmundsson, 19.6.2021 kl. 11:20]

En var stóri bróðir sekur? Svar óskast ekki!!!