Bestu Bítlaplöturnar

  Breska hljómsveitin Bítlarnir (The Beatles) hætti fyrir meira en hálfri öld.  Plötuferill hennar spannaði aðeins sex ár.  Samt er ekkert lát á vinsældum hennar.  Aðdáendahópurinn endurnýjar sig stöðugt.  Í útvarpi má iðulega heyra spiluð lög með Bítlunum og umfjöllun um Bítlana.  Skammt er síðan Gunnar Salvarsson rakti sögu hljómsveitarinnar í þáttaseríu á Rúv.  Gerðar hafa verið leiknar kvikmyndir um Bítlana,  sem og heimildarmyndir og sjónvarpsþættir.  Núna síðast hefur Disney+ verið að sýna átta tíma heimildarþátt um gerð plötunnar "Let it be".  

  Það segir margt um stöðu Bítlanna að í hálfa öld hafa 3 plötur hennar verið að skiptast á að verma efstu sæti lista yfir bestu plötur allra tíma.  Það eru "Sgt Pepper´s...",  "Revolver" og "Abbey Road".  

  Til gamans:  Hér til vinstri á þessari síðu hef ég stillt upp skoðanakönnun um uppáhalds Bítlaplötuna.  Vinsamlegast takið þátt í leitinni að henni. 

  Breska tímaritið Classic Rock hefur tekið saman lista yfir bestu og áhrifamestu Bítlaplöturnar.  Staða þeirra er studd sannfærandi rökum.  Þannig er listinn:

1.  Revolver (1966)

  Þarna voru Bítlarnir komnir á kaf í ofskynjunarsýruna LSD og indverska músík.  Það tók almenning góðan tíma að melta þessa nýju hlið á Bítlunum.  Platan seldist hægar en næstu plötur á undan.  Hún sat "aðeins" í 8 vikur í 1. sæti breska vinsældalistans.  Því áttu menn ekki að venjast.  Í dag hljóma lög plötunnar ósköp "venjuleg".  1966 voru þau eitthvað splunkunýtt og framandi. Plötuumslagið vakti mikla athygli.  Í stað hefðbundinnar ljósmyndar skartaði það teikningu af Bítlunum.  Hönnuðurinn var Klaus Woorman,  bassaleikari sem Bítlarnir kynntust í Þýskalandi.  Hann spilaði síðar á sólóplötum Lennons.  Umslagið fékk Grammy-verðlaun.  

 

2.  Sgt. Pepper´s Lonely Hearts Club Band (1967)

  Bítlarnir gengu ennþá lengra í tilraunamennsku og frumlegheitum.  Gagnrýnendur voru á báðum áttum.  Sumir töldu Bítlana vera búna að missa sig.  Þeir væru komnir yfir strikið.  Tíminn vann þó heldur betur með Bítlunum. 

3.  Please Please Me (1963)

  Sem jómfrúarplata Bítlanna markaði hún upphaf Bítlaæðisins - sem varir enn.  Hún var byltingarkenndur stormsveipur inn á markaðinn.  Ný og spennandi orkusprengja sem náði hámarki í hömlulausum öskursöng Lennons í "Twist and Shout".  Þvílík bomba!   

4.  Abbey Road (1969)

  Síðasta platan sem Bítlarnir hljóðrituðu.  Þeir sönnuðu að nóg var eftir á tanknum.  George á bestu lög plötunnar.  Hin lögin eru þó ekkert slor.    

 

5.   Magical Mistery Tour (1967)

 

6.  Rubber Soul (1965)

7.  Hvíta albúmið (1968)

8.  With The Beatles (1963)

9.  A Hard Day´s Night (1964)

  Þrjár plötur ná ekki inn á þennan lista:  Beatles for sale (1964),  Help (1965),  Yellow Submarine (1969).  Allt góðar plötur en skiptu ekki sköpum fyrir tónlistarþróun Bítlanna og heimsins.

Athugasemdir

[Sigurður I B Guðmundsson, 17.12.2021 kl. 14:53]

Allt eru þetta frábærar plötur og erfitt að gera upp á milli þeirra þó svo að Revolver kemur fyrst upp í hugann. 

[Jens Guð, 17.12.2021 kl. 15:48]

Sigurður I B, það er tilfellið.  Allar plötur Bítlanna eru virkilega góðar. 

[Gardar (IP-tala skráð) 17.12.2021 kl. 19:46]

Please please me,   risti dýpst hjá mér ,.

[Jens Guð, 18.12.2021 kl. 03:58]

Garðar,  þú hefur þá sennilega kynnst henni í rauntíma,  eins og ég.  Þau kynni voru rosaleg upplifun.  

[Ingólfur Sigurðsson, 18.12.2021 kl. 06:05]

"Please, please me" var ein síðasta Bítlaplatan sem ég eignaðist, hún er mjög góð eins og hinar. Það er ótrúlegt að John Lennon var kvefaður þennan dag sem hún var tekin upp og má heyra það í sumum lögum, en samt syngur hann af gríðarlegum krafti og innlifun. Ótrúlegir tónlistarmenn. 

 

Þeir sömdu svo mikið af lögum fyrstu árin að þeir hefðu getað haft öll lögin frumsamin á þeim plötum, fram til 1966. Þá var það bara venjan að eigin tónsmíðar svo ungra manna væru ekki taldar góðar eða merkilegar. Samt gáfu þeir lög vinum sínum sem urðu vinsæl einnig þannig. 

 

Fullþroskaðir höfundar dægurlaga 1963 eins og Bob Dylan var orðinn fullþroskaður höfundur mótmælasöngva þá. Frábær árangur hjá þeim. 

 

Býsna gott að Revolver er í fyrsta sæti á þessum lista. Hún breytti miklu.

 

Það hefði verið gaman að vera fæddur á þessum tíma, en ég upplifði pönkið í rauntíma.

[Jens Guð, 18.12.2021 kl. 06:18]

Ingólfur,  takk fyrir þínar vangaveltur og takk fyrir þitt skemmtilega blogg!

[Jóhann Elíasson, 18.12.2021 kl. 15:05]

Allar Bítlaplöturnar eru mjög góðar en ég tek undir með Sigurði IB að Revolver hefur vinninginn í mínum huga en sem betur fer hafa ekki allir sömu skoðun,  þá yrði nú lítið gaman í henni veröld.....

[Jens Guð, 18.12.2021 kl. 16:47]

Jóhann,  það er dagamunur hjá mér.  Stundum er það "Revolver".  Stundum "Abbey Road".  Ég held að það fari eftir því hvaða músík ég heyrði spilaða næst á undan.  En það eru þessar tvær plötur sem ég spila oftast.   

[Jóhann Elíasson, 18.12.2021 kl. 21:26]

Við hljótum að  vera andlega skyldir "Abbey Road"er pottþétt í öðru sæti hjá mér........... 

[Jens Guð, 19.12.2021 kl. 12:48]

Jóhann,  gaman að því!

[Stefán (IP-tala skráð) 19.12.2021 kl. 19:42]

Á fyrstu árunum eftir The Beatles dældu Rolling Stones, The Who, Pink Floyd og Yes út frábærum plötum. Led Zeppelin kom, sá og sigraði sem besta og mesta hljómsveitin. Í Englandi kom Roxy Music fram sem einstaklega áhugaverð og listræn hljómsveit og vestanhafs komu frábærar og metnaðarfullar plötur frá Steely Dan. David Bowie og Tom Waits fóru alveg á kostum í áratugi. The Smiths komu fram á sjónarsviðið sem fullsköpuð og metnaðarfull hljómsveit, en þeir stoppuðu of stutt við. Það var svo ekki fyrr en með Radiohead að kom fram hljómsveit sem gerði fjölda einstaklega metnaðrafullra meistaraverka í röð ... en The Beatles hafa ekki verið toppaðir. Persónulega finnst mér skemmtilegast að hlusta á plötur þeirra þar sem öll lögin eru frumsamin. 

[Jens Guð, 20.12.2021 kl. 07:26]

Stefán,  takk fyrir þessa samantekt.

[Stefán (IP-tala skráð) 20.12.2021 kl. 08:55]

Ég verð lika að nefna Bob Dylan og Neil Young sem gerðu svo frábærar plötur eftir Beatles, að þær voru ekki síðri en allra bestu sólóplötur fyrrum meðlima Beatles. Bítlarnir voru lang bestir þegar þeir unnu saman. 

[Jens Guð, 23.12.2021 kl. 20:02]

Stefán,  ég er sammála.