Ofsahræðsla

  Um síðustu helgi keypti erlendur ferðamaður í Færeyjum sér nesti og nýja gönguskó.  Tilefnið var að hann hugðist rölta upp fjallshlíð nyrst í Norðureyjum.  Fjallið heitir Borgarinn og er á Kalsey.  Það nýtur vinsælda meðal útivistarfólks.  Útsýni er stórfenglegt og hlíðin ekki brött en lögð þægilegum göngustíg.  Enda var leiðin greið upp hana.  

  Er karlinn hugðist hreykja sér í miðri hlíð brá svo við að hann var gripinn ofsahræðslu.  Þegar hann horfði niður hlíðina sundlaði hann af lofthræðslu.  Í taugaveiklun tók hann að góla tryllingslega og baða út höndum ótt og títt.  Nærstaddir skildu ekki hvað hann kallaði af því að hann gólaði á útlensku.  Svo fór þó að einn maður áttaði sig á vandamálinu.  Hann greip fjallgöngugarpinn föstum tökum og rölti með hann niður á jafnsléttu.  Þar jafnaði hann sig hægt og bítandi,  Náði úr sér skjálftanum að mestu og fékk aftur lit í kinnar.

  Til að hlífa samborgurum mannsins við háði og spotti er þjóðernið ekki gefið upp.   

Athugasemdir

[Sigurður I B Guðmundsson, 1.4.2022 kl. 08:56]

Hver kjaftaði frá???

[Jens Guð, 1.4.2022 kl. 09:15]

Sigurður I B,  vitnin að atvikinu toguðust á um að vera fyrst til að kjafta frá. 

[Þorsteinn Briem, 1.4.2022 kl. 09:29]

Það er eins gott að Færeyingar (Fjáreyingar) verði ekki skelfingu lostnir þegar þeir sjá rollur, eins og mörg dæmi eru um hér á Klakanum.

Ísbirnir í Svínadal reyndust kindur

Jóhann Bessason, bóndi og smiður á Skarði í Dalsmynni, forfaðir undirritaðs í fjórða lið, smíðaði meðal annars Laufás í Eyjafirði og Flateyjarkirkju á Skjálfanda.

Vorið 1882 var Jóhann Bessason að smíða hákarlaskálm í smiðju sinni þegar hvítabjörn birtist í smiðjudyrunum.

Jóhann mundaði hákarlaskálmina og gekk á móti hinum óboðna gesti þannig að hann hörfaði úr dyrunum en Jóhann hrakti hvítabjörninn niður að Fnjóská, þar sem hann stakk sér í vök.

Bóndinn á Skarði

[Jens Guð, 1.4.2022 kl. 09:43]

Þorsteinn,  takk fyrir skemmtilega sögu af Jóhanni!

[Jóhann Elíasson, 1.4.2022 kl. 10:00]

Já það er margt að varast þegar óvanir ætla sér á fjöll.........

[Stefán (IP-tala skráð) 1.4.2022 kl. 14:19]

Íslensk stjórnmálakona klifraði á toppinn og situr þar föst. Skilur ekki kjósendur sína sem hún skildi eftir á jörðu niðri. Hún veit ekki hvernig hún á að ná jarðsambandi við  ,, fólkið sitt ,, aftur. Það er kallt á toppnum. 

[Jens Guð, 1.4.2022 kl. 17:52]

Jóhann,  svo sannarlega!

[Jens Guð, 1.4.2022 kl. 17:55]

Stefán,  kannski er hún of lofthrædd til að þora niður. 

[Helga Kristjánsdóttir, 1.4.2022 kl. 21:51]

Eg stærði mig oft af því að eiga svona djarfan forföður sem Johann Bessason var.

[Jens Guð, 2.4.2022 kl. 06:24]

Helga,  þú ert þá frænka Þorsteins Briem?

[Stefán (IP-tala skráð) 5.4.2022 kl. 14:13]

Íslenska stjórnmálakonan sem nefnd er hér að ofan, já sú sem situr föst á toppnum og unir sér þar vel sem hvít forréttinda valdakona. Hún kippir sér ekki upp við hrokafull rasísk ummæli náins samstarfsmanns. Er hún haldin ofsahræðslu á toppnum og þorir ekki að stíga niður til almennings ? Þykir henni of vænt um völd sín til að þora að gagnrýna sína nánustu, eða er hún kannski líka rasísk þessi hvíta forréttinda valdakona, sem eins og segir í kvæðinu góða ,, grettir sig og bara hlær ,,.    

[Stefán (IP-tala skráð) 8.4.2022 kl. 17:22]

Valdasjúka stjórnmálakonan er fastari á fjallinu en nokkru sinni fyrr. Þorir ekki niður vegna ofsahræðslu ... við almenning.