Hrakfarir

  Sumir eru heppnir.  Þeir eru lukkunnar pamfílar.  Aðrir eru óheppnir.  Þeir eru hrakfallabálkar.  Flestir eru sitt lítið af hvoru. 

  Nokkra þekki ég sem eru eins og áskrifendur að óhöppum.  Til að mynda drengurinn sem brá sér á skemmtistað.  Þar var stappað af fólki.  Allir sátu við borð hjá öllum óháð því hvort þeir þekktust áður. 

  Drengurinn kom auga á gullfallega stúlku.  Hún þáði dans.  Hann var í þykkum ódansvænum leðurjakka, fór því úr honum og setti á stólbak.  Hann bað borðfélaga að gefa honum auga.  Stúlkan setti tösku sína á jakkann.

  Er skötuhjúin snéru af dansgólfinu til að kasta mæðunni kom babb í bátinn.  Borðfélagarnir voru á bak og burt.  Sömuleiðis jakkinn og veskið.  Hvorutveggja geymdi kort, skilríki og peninga.  Sem betur fer var drengurinn með lyklakippu sína festa við beltið.  Hann bauðst til að skutla dömunni heim.  

  Daginn eftir ætlaði hann að kíkja á sandspyrnu.  Hann bauð dömunni með. 

  Á leiðinni varð bíllinn bensínlaus.  Stúlkan settist undir stýr á meðan hann ýtti bílnum.  Það gekk hægt og erfiðlega.  Alltof langt í næstu bensínstöð.  Að lokum gafst hann upp,  hringdi í föður sinn, bað hann um að kaupa dráttartaug og draga bílinn að bensínstöð.

  Allt tók þetta langan tíma og stutt eftir af sandspyrnunni.  Allir héldu því bara heim til sín.  Til að bæta fyrir klúðrið bauð kauði stelpunni út að borða næsta kvöld.  Veitingastaðurinn var í göngufæri frá heimili hennar.  Þau ákváðu að hittast klukkan sex á staðnum.

  Drengurinn lagði sig fyrir kvöldmat.  Er hann vaknaði gleymdi hann matarboðinu og fór í tölvuleik.  Hann lifði sig inn í leikinn.  Seint og síðar meir kíkti hann á símann sinn.  Þá sá hann sms og "missed call" frá stelpunni.  Hún var pirruð er hann hringdi í hana.  Sagðist hafa setið eins og illa gerður hlutur í heilan klukkutíma á veitingastaðnum.  

  Til að gera gott úr þessu bauð hann henni í bíó.  Kvöldið var ungt.  Með semingi féllst hún á þetta.  

  Drengsi stríddi við bólur í andliti.  Hann faldi þær daglega með húðlitum farða.  Bíómyndin var hryllings-spennumynd.  Í taugaveiklun fiktaði hann ósjálfrátt við bólurnar án þess að taka eftir því.  Hann klæjaði líka smávegis í þær.  Það var svo heitt í salnum.  Hann nuddaði farðann af bólunum,  reif ofan af sumum þeirra.  Blóð sem vætlaði úr þeim dreifði hann um húðina.  

  Er ljós kviknuðu í hléi rak stelpan upp óp.  Hún horfði með hryllingi á blóðrisa andlitið.  Skipaði honum reiðilega að þvo ndlitið.  Þegar hann snéri aftur var hún farin.  Síðan hafa þau ekki verið í neinu samandi og hún eyddi honum af vinalista á Facebook.            

   

Athugasemdir

[Sigurður I B Guðmundsson, 2.5.2022 kl. 09:13]

Ég hef verið að segja sögur af sjálfum og næst verður Vesturver tekið fyrir. Er þetta eitthvað í líkindum við það!!!

[Grímur Kjartansson, 2.5.2022 kl. 09:39]

Sami maður hefur sjálfsagt keypt sér hlutabréf í norsku kauphöllinni síðasta fötudag og þegar hann klukkan 10 í morgun hringdi í stúlkuna til að grobba sig af því
þá gerðist þetta

[Jens Guð, 2.5.2022 kl. 09:44]

Sigurður I B,  ég hef einmitt verið að lesa sögurnar þínar og haft gaman að.  Hlakka til að lesa um Vesturverið.

[Jens Guð, 2.5.2022 kl. 09:44]

Grímur,  góður!

[Sigurður I B Guðmundsson, 2.5.2022 kl. 10:45]

Var að skoða myndbandið alvöru hrakfallabálkar þarna á ferð og þó maður finni til með mörgum þá var ekki annað hægt en hlæja. 

[Jóhann Elíasson, 2.5.2022 kl. 15:43]

Þessi drengur hefur verið alveg ótrúlega óheppinn.  Ekki veit ég hvort það er algilt en ég hef heyrt, að menn sem eru  svona seinheppnir, séu alveg sérstaklega geðgóðir og það þurfi mikið að ganga á svo þeir skipti skapi.....

[Jens Guð, 2.5.2022 kl. 15:51]

Sigurður I B (# 5), ég varð að hafa þetta myndband með.  Ég hló svo mikið þegar ég sá það fyrst.  

[Jens Guð, 2.5.2022 kl. 15:57]

Jóhann,  svo sannarlega á þetta með góða skapið við um drenginn.  Hann kippir sér ekkert upp við mótlæti.  Eitt sinn var hann á rölti með vini sínum er hann rann til og skall á magann í poll.  Hann spratt á fætur og hélt áfram göngu eins og ekkert væri.  Vinur hans spurði hvort hann vilji ekki skottast heim og hafa fataskipti.  Hann svaraði:  "Nei,  þetta skiptir engu mál.  Fötin þorna á mér."