Skemmtileg bók

 - Titill:  Glaðlega leikur skugginn í sólskininu

 - Höfundur:  Steinn Kárason

  Sögusviðið er Skagafjörður á sjöunda áratugnum.  Segir þar frá ungum dreng -  10 - 11 ára - á Sauðárkróki.  Bakgrunnurinn er sjórinn,  sjómennska og sveitin í þroskasögunni.  Inn í hana blandast kaldastríðið,  Kúbudeilan og Bítlarnir.  Steinn kemur andrúmslofti þessara ára vel til skila.  

  Ég ætla að stór hluti sögunnar byggi á raunverulegri upplifun höfundar.  Ég kannast við suma atburði sem sagt er frá.  Ég var barn í Skagafirði á þessum tíma.  Fyrir bragðið var sérlega gaman fyrir mig að rifja upp bernskubrekin.  Bókin er þar fyrir utan líka skemmtileg og fróðleg fyrir fólk sem veit ekki einu sinni hvar Skagafjörður er.  Mörg brosleg atvik eru dregin fram.  En það skiptast á skin og skúrir.  Ógeðfelldir atburðir henda sem og mannlegur breyskleiki í ýmsum myndum.

  Þetta er stór og mikil bók.  Hún spannar 238 blaðsíður.  Káputeikning Hlífar Unu Bárudóttur er flott.

  Steinn Kárason er þekktur fyrir fræðibækur,  blaðagreinar,  tónlist og dagskrárgerð í ljósvakamiðlum.   

Athugasemdir

[Þorsteinn Briem, 16.10.2022 kl. 05:52]

Þegar undirritaður kom fyrst í Skíðadal, sem nú er í Dalvíkurbyggð, var ekki búið að leggja þangað rafmagn, notaðir voru olíulampar og eldað á gasi.

Lífið í dalnum byggðist á kaupfélaginu, Framsóknarflokknum, súru slátri og hræringi.

Allt var pantað úr kaupfélaginu á Dalvík og peningaseðlar voru einungis notaðir af "glóbalistum", aðallega til að kaupa einhvern óþarfa í Amaro á Akureyri og graðga í sig hamborgara og franskar í andskothans Bauthanum.

Peningaseðlar urðu hins vegar fljótt verðlitlir í margra tuga prósenta verðbólgu á ári hverju.

Og þegar sjónvarpið kom í dalinn var fyrstu árin svo mikil "snjókoma" á skjánum að Skíðdælingar urðu að ímynda sér hvað væri í sjónvarpinu hverju sinni.

[Stefán (IP-tala skráð) 16.10.2022 kl. 09:44]

Kaupfélag Skagfirðinga hefur þá væntanlega átt þennan Stein eins og annað í Skagafrði. Það hefur því verið Steinn undir Kaupfélaginu.

[Jens Guð, 16.10.2022 kl. 10:20]

Þorsteinn,  lífið í Skíðadal hefur verið glettilega líkt því í Hjaltadal. 

[Jens Guð, 16.10.2022 kl. 10:28]

Stefán,  það er allavega langt síðan hann flutti til Reykjavíkur.

[Sigurður I B Guðmundsson, 16.10.2022 kl. 15:16]

Eina sem ég veit um Skagafjörð er að þar bý einhver Þórófur Gíslason!!

[Jens Guð, 16.10.2022 kl. 17:23]

Sigurður I B,  það er yfirdrifið nóg að vita af Þórólfi!

[Stefán (IP-tala skráð) 16.10.2022 kl. 17:53]

Einn stakur Steinn úr Skagafirði er svo stór, að sjálf drottningin Drangey og Þórólfur fölna við hliðina á honum. 

[Jens Guð, 16.10.2022 kl. 18:30]

Stefán (# 7).  það er hið besta mál. 

[Stefán (IP-tala skráð) 17.10.2022 kl. 20:41]

Ágætis countryslagari sem fylgir þarna með af YouTube, en hver er söngkonan ?