Flott plata

 

 

 

 

 

 

 

 

 

 

 

 

 - Titill:  Bláturnablús

 - Flytjandi:  Gillon

 - Einkunn:  ****

  Gillon er listamannsnafn Gísla Þórs Ólafssonar.  Hann er Skagfirðingur,  búsettur á Sauðárkróki.  Hann hefur sent frá sér fjölda ljóðabóka og hljómplatna.  Allt vænstu verk.  Á nýjustu afurðinni,  plötunni Bláturnablús,  eru öll lögin og ljóðin frumsamin.  Gillon syngur að venju og spilar á kassagítar og bassa.  Hans hægri hönd er upptökustjórinn Sigfús Arnar Benediktsson.  Hann spilar á trommur,  rafgítar,  gítarlele og ýmis hljómborð.

  Söngstíll Gillons er "spes".  Hann er í humátt eins og sitt lítið af Megasi,  Bjartmari og Birni Jörundi.  Stíllinn klæðir söngvana prýðilega.  Ljóðin eru í frjálsu formi og súrrealísk.  Sparlegu endarími bregður þó fyrir í einstaka ljóði.

  Platan er frekar seintekin.  Hún þarf nokkrar spilanir áður en fegurð laganna opinberast að fullu.  Kannski spilaði inn í hjá mér að við fyrstu yfirferðir var athyglin á hugmyndaríku og skemmtilegu ljóðunum.  

  Útsetningar og hljóðfæraleikur eru snyrtileg og smekkleg.  Enginn brjálaður hávaði og læti.  Lögin flest róleg eða á hóflegum millihraða.  Það er heldur poppaðra yfirbragð en á fyrri plötum Gillons.  Til að mynda lýkur plötunni á "sing-along" tralli Gillons og þriggja kvenna.  Gott niðurlag á flottri og skemmtilegri plötu.

  Teikning Óla Þórs Ólafssonar á framhlið umslagsins er virkilega "töff".     

 

Athugasemdir

[Bjarni (IP-tala skráð) 23.10.2022 kl. 15:27]

7 mínútur í eitt en ekki tíu mínútur í tvö er auðvitað bylting í auglýsingagerð.  Flott lag og gott að vita til þess að íslensk tónlist er ekki eingöngu einhver úthverfaútgáfa af amerísku glæparappi.

[Jens Guð, 24.10.2022 kl. 13:06]

Bjarni,  ég tek undir þín orð.

[Stefán (IP-tala skráð) 25.10.2022 kl. 13:00]

Þetta lag Tímaglas hljómar vel og segir mér að þessi Gillon geti gert góða tónlist. Það þarf enginn að efast um að Bubbi Morthens getur það líka, enda hefur hann margsannað það á fjörtíu og tveggja ára tónlistarferli. Stundum verður Bubba þó á að segja og gera kjánalega hluti að mínu mati, eins og t.d. núna með því að hjóla með lögmanni í Útvarpsstjóra vegna þess að nýtt lag hans með Auði Tárin falla fær ,, ekki nógu mikla útvarpsspilun ,, á RÚV, vaáá. Getur verið að þarna sé um ákveðið dómgreindarleysi að ræða hjá Bubbanum ? Mér finnst að einhverntíma áður hafi orðið vart við slíkt hjá honum, eða hvað ? Tárin falla allavega ekki hjá mér þó að ég muni aldrei heyra þetta lag. 

[Jens Guð, 25.10.2022 kl. 13:30]

Stefán,  ég var ekki búinn að frétta þetta með Bubba og lögmann.  Flest er nú til.

[Stefán (IP-tala skráð) 25.10.2022 kl. 18:29]

Þoldi Bubbi ekki gagnrýnina og skreið inn í skel spyr fólk sig þegar kappinn hefur nú lokað Tvitter reikningi sínum.

[Jens Guð, 26.10.2022 kl. 07:03]

Stefán,  þú segir fréttir.  Ég fylgist ekki nógu vel með.  Í fljótu bragði stend ég í þeirri trú að engin útvarpsstöð sé skyldug til að spila eitthvað tiltekið lag.  Síst af öllu með þeim rökum að lagið sé vinsælt á Spotify.