Vandræðalegt hlutverk götulistamanns

  Böskarar er það fólk kallað sem spilar, syngur og skemmtir almenningi að öðru leyti á götum úti.  Áhorfendur/áheyrendur kunna vel að meta.  Skemmtikraftarnir hafa fyrir framan sig hatt eða opna tösku.  Þangað kasta vegfarendur smápeningum.  Þetta er vinsælt í erlendum stórborgum.  Hérlendis má stundum rekast á útlendinga spila á harmóniku fyrir utan stórmarkaði.

  Í Brighton á Englandi starfar böskari að nafni Shane Dyer.  Hann kann að syngja og spila á gítar eitt lag.  Aðeins eitt lag.  Það er "Streets of London".  Sívinsælt lag eftir Ralf McTell.  Best þekkt í flutningi Rogers Withakers og Anti-Nowhere Leaque.  Orri Harðarson hefur sungið það með íslenskum texta eftir Ómar Ragnarsson.

  Ég hef séð náungann standa með gítarinn sinn úti á götu.  Hann hvorki syngur né spilar.  Að honum streymir þó fólk og kastar peningi í töskuna hans.  Um leið tilkynnir það honum að þetta sé greiðsla fyrir að hann flytji ekki lagið næsta hálftímann á meðan viðkomandi sinnir sínum erindum í nálægum verslunum.

  Shane játar að honum þyki þetta vandræðalegt og niðurlægjandi.  Hann telur flutning sinn á laginu vera frambærilegan.  Hinsvegar grunar hann að fólk sé með óþol gagnvart laginu.  Kostur er að hann þénar meira fyrir að spila ekki heldur en á meðan hann spilaði.

  Kannski ætti hann að læra annað lag.  Hann gæti fengið fé fyrir að spila það ekki.  Gæti tvöfaldað innkomuna. 

     

Athugasemdir

[Sigurður I B Guðmundsson, 30.7.2023 kl. 15:08]

Þetta minnir mig á CCR: But if you gota nickel, won´t you lay your money down?

[Jens Guð, 30.7.2023 kl. 16:22]

Sigurður I B,  nákvæmlega!

[Jóhann Elíasson, 31.7.2023 kl. 03:00]

Kannski er þarna komið "tækifæri" fyrir ýmsa tónlistarmenn sem hafa ofurtrú á eigin ágæti.... 

[Jens Guð, 31.7.2023 kl. 09:04]

Jóhann,  svo sannarlega!

[Bjarni (IP-tala skráð) 31.7.2023 kl. 09:48]

Ætti að spila eitthvað með Wham, "wake me up before you gogo" eða "last christmas".

Svo gæti Madonna komið sterk inn með "Material girl" Allt lög sem ég myndi glaður borga fyrir að heyra aldrei aftur.

Hinsvegar er "Streets of London" flott lag og sérstaklega í flutningi Anti-Nowhere League sem ég hélt að væri öllum gleymd.

[Jens Guð, 1.8.2023 kl. 09:15]

Bjarni,  góður!