Maður sem hatar landsbyggðina

  Kunningi minn er um áttrætt.  Hann hefur andúð á landsbyggðinni;  öllu utan höfuðborgarsvæðisins.  Hann er fæddur og uppalinn í miðbæ Reykjavíkur.  Foreldrar hans ráku þar litla matvöruverslun.  Það var hokur. Ungur byrjaði hann að hjálpa til.  Honum þótti það skemmtilegt.  

  Fjölskyldan tók aldrei sumarfrí.  Stráksi stækkaði og tók bílpróf þegar aldurinn leyfði.  1974 var hringvegurinn opnaður.  Yfir því ríkti mikill ævintýraljómi.  Þá keypti hann ódýran bíl og fékk samþykki foreldranna til að taka stutt frí og aka hringinn.

  Hringvegurinn var einbreiður malarvegur,  alsettur holum og "þvottabrettum".  Ökuþórinn fékk hræðslukast af áhyggjum yfir heilsu bílsins.  Auk þess fylltist óþéttur bíllinn af ryki.  Ekki bætti úr skák að framboð á gistirými var lítið en rándýrt.  Sama var með veitingasölu.

  Okkar maður kom hvergi auga á hið rómaða landslag sem hann hafði heyrt af.  Fjöll voru hvert öðru líkt og ekki samkeppnishæf við Esjuna.  Út um allt mátti sjó óspennandi tún, beljur og annað. 

  Á leið frá Skagafirði til Akureyrar hvellsprakk dekk undir bílnum.  Varadekk og önnur dekk voru í bágu ásigkomulagi.  Þetta var um helgi.  Ökuþórinn leitaði uppi eigendur dekkjaverkstæða.  Enginn var til í að opna verkstæði fyrr en á mánudeginum.  Hann sannfærðist um að óliðlegheitin væru vegna þess að hann var utanbæjarmaður. 

  Til að spara pening svaf hann í rykugum bílnum.  Eftir að gert var við dekk hætti hann við við hringferð.  Hann brunaði aftur til Reykjavíkur og sór þess eið að fara aldrei aftur út á land.  Í kjölfar óx andúðin á "sveitavarginum".  Hann liggur ekki á skoðun sinni um að landsbyggðin sé afæta á samfélaginu.  Hann snöggreiðist undir fréttum af fyrirhugaðri gangagerð eða öðrum samgönguúrbótum.

  Eitt sinn var Hagkaupum synjað um innflutning á hollenskum kartöflum.  Kallinn hætti alfarið að borða kartöflur.  Þannig mótmælti hann "ofríki bændamafíunnar".  Síðan borðar hann bara hrísgrjón,  spagettí eða brauð með mat.

  Hann hætti líka að borða mjólkurvörur.  Smyr sitt brauð með smjörlíki og setur útlent mjólkurduft út á kaffið.

      

Athugasemdir

[Jóhann Elíasson, 13.8.2023 kl. 13:33]

"HVER HEFUR SINN DJÖFUL AÐ DRAGA"........

[Jens Guð, 13.8.2023 kl. 13:52]

Jóhann,  já heldur betur!

[Sigurður I B Guðmundsson, 13.8.2023 kl. 15:28]

Svona snillingur er vandfundinn í dag!

[Jens Guð, 13.8.2023 kl. 16:58]

Sigurður I B,  þeim fækkar ört!

[Stefán (IP-tala skráð) 13.8.2023 kl. 18:48]

Sérvitur þverhaus sem sennilega er líka erfiður í umgengni. Svona fúll á móti.

[Hrannar Gestsson (IP-tala skráð) 13.8.2023 kl. 21:28]

Æ,

Elsku hjartans lesendur, hættið að kvarta, það eru allt of margar Karen sem ganga laus.

[Jens Guð, 14.8.2023 kl. 10:16]

Stefán,  það er rétt að kallinn er dáldið svona Fúll á móti. 

[Jens Guð, 14.8.2023 kl. 10:20]

Hrannar,  er ekki bara gaman?

[Sigurður I B Guðmundsson, 14.8.2023 kl. 17:42]

Svo er til maður sem hatar bíla!!

[Sigurður I B Guðmundsson, 14.8.2023 kl. 17:50]

Átti að vera: Maður sem hatar bíla alla DAGA.

[Jens Guð, 14.8.2023 kl. 19:10]

Sigurður I B,  ég kannast við einhverja þannig!