Viðbjóðsmatur

29.10.2023 | 14:13

Ég átti erindi í matvöruverslun. Fyrir framan mig í langri röð við afgreiðslukassann var hávaxinn grannur eldri maður. Hann hélt á litlu laxaflaki á frauðplastsbakka. Um hann var vafin glær plastfilma.

Maðurinn sló takt með bakkanum; bankaði honum í læri sér. Við ásláttinn losnaði um plastfilmuna. Að því kom að laxaflakið hrökk út úr bakkanum og veltist um skítugt gólfið og endaði með roðið upp. Úti var snjór og slabb. Fólk bar óhreinan snjó inn með sér. Á blautu gólfinu flaut blanda af ryki, sandi og mold.

Til að tapa ekki stöðu sinni í röðinni stóð gamlinginn áfram á sínum stað en teygði fót að flakinu. Honum tókst að krækja skítugu stígvéli fyrir flakið og draga eftir drullunni til sín. Hann reyndi að strjúka óhreinindin af því. Kjötið var laust í sér. Óhreinindin ýttust ofan í það.

Mér þótti þetta ólystugt og sagði: "Ég skal passa fyrir þig plássið í röðinni á meðan þú sækir annað flak."

Það hnussaði í honum: "Maður hefur látið annað eins ofan í sig án þess að verða meint af. Maginn á togarajaxlinum er eins og grjótmulningsvél. Tekur við öllu án þess að slá feilpúst!"

Maðurinn náði að troða laxinum á bakkann, leggja plastfilmuna yfir og sagði hróðugur: "Ég smjörsteiki kvikindið heima. Bakteríurnar þola ekki hita og drepast!"

Meginflokkur: Matur og drykkur | Aukaflokkar: Heilbrigðismál, Spaugilegt, Viðskipti og fjármál | Facebook

Athugasemdir

Framundan er harður vetur hjá skuldugum íslendingum sem eru kúgaðir af bönkum og ríkisstjórn og hjá ellilífeyrisþegum sem búa við glæpsamlegar skerðingar og mannréttindabrot, þá geta jafnvel skítug laxaflök komið til bjargar.

Stefán (IP-tala skráð) 29.10.2023 kl. 14:51

Stefán, allt er hey í harðindum!

Jens Guð, 29.10.2023 kl. 15:42

En efnahagur Færeyja blómstrar m.a. af því að moka úrvals fiski ofan í stríðsóða rússa.

Stefán (IP-tala skráð) 29.10.2023 kl. 16:10

Stefán (#3), Færeyingar kunna þetta! Ég mæli eindregið með því að fólk fletti upp á þáttaseríu á RÚV sem sýnd er á laugardögum. Hún heitir "Andri á Færeyjaflandri".

Jens Guð, 29.10.2023 kl. 17:23