Jólatiktúrur afa - 3ji hluti

  Afi keypti ekki jólakort fyrr en á milli jóla og nýárs.  Þá fékk hann þau á góðum afslætti í Kaupfélaginu á Sauðárkróki.  Hann hældi sér af því hvað hann náði að kýla verðið niður.  Jafnframt sagði hann:  "Ég ætla ekki að spandera jólakorti á einhvern sem sendir mér ekki kort.  Það kemur ekki til greina!"  

  Eftir borðhald á heimilinu,  uppvask og frágang voru pakkar opnaðir.  Um það leyti fékk afi alltaf spennufall - eftir margra daga stanslausa tilhlökkun.  Hann hnussaði og hneykslaðist yfir öllum gjöfum.  Það var skemmtiefni fyrir okkur hin að fylgjast með fussinu í afa:  "Hvaða endemis rugl er þetta?  Hvað á ég að gera með bók?  Ég hélt að allir vissu að ég væri löngu hættur að lesa.  Ég á ekki einu sinni bókahillu.  Ég hef ekkert geymslupláss fyrir bækur!"  

  Ein jólin fékk afi pakka með sokkum og nærbuxum.  Hann ætlaði að springa úr vanþóknun:  "Hvaða fíflagangur er þetta?  Hvað á ég að gera við stuttar nærbuxur?  Ég hef aldrei á ævi minni farið í stuttar buxur.  Þetta eru unglingabuxur.  Þvílíkt og annað eins.  Er fólk að tapa sér?"

  Við gátum ekki varist hlátri er afi dró upp úr næsta pakka forláta síðar nærbuxur.  "Þú hefur verið bænheyrður," skríkti mamma í stríðni.  Afi hafði ekki húmor fyrir þessu:  "Hverjum dettur í hug að ég fari að ganga í útlendum bómullarbuxum?  Ég hef aldrei klæðst nema íslenskum prjónanærbuxum.  Ég breyti því ekki á grafarbakkanum.  Hvað eiga svona heimskupör að þýða?"  

  Ég man ekki hvort það var úr næsta eða þar næsta pakka sem afi fékk dýrindis prjónanærbuxur.  Mamma hrópaði:  "Þetta er þitt kvöld.  Þú ert stöðugt bænheyrður."

  Afi varð vandræðalegur.  Hann skoðaði buxurnar í bak og fyrir;  stóð upp og mátaði við sig stærðina og annað.  Allt virtist eins og best var á kosið.  Pabbi grínaðist með þetta:  "Þetta eru söguleg tíðindi.  Það er ekkert að buxunum."

  Afi hafði ekki sagt sitt síðasta:  "Hverjum dettur í hug að hafa svona frágang á buxnaklaufinni?  Hún er hneppt eins og skyrta.  Ég hélt að allir vissu að á prjónanærbuxum á að vera áfast stykki sem er hneppt þvert yfir til hægri.  Á þessum buxum er eins og hálfviti hafi verið að verki.  Þvílíkt klúður!  Það er eins gott að fólk sjái mig ekki í þessari hörmung.  Ég yrði að athægi!"

Athugasemdir

[Sigurður I B Guðmundsson, 24.12.2023 kl. 11:53]

 Það er ekki ónýtt að hafa einn svona afa á jólunum! En hvað fannst honum um jólasveina? Já, og Gleðileg Jól og þakka þér fyrir þín dásamlegu blogg. Bloggið væri alveg litlaust án bloggana frá þér. 

[Bjarni (IP-tala skráð) 24.12.2023 kl. 13:06]

Þakkaðu fyrir að kallinn mátaði ekki naríurnar á staðnum.  Hefði væntanlega drepið jólastemminguna, Free willy er OK á viðeygandi sólarztrönd, en varla í fjölskylduboði fyrir framan börn og barnabörn.

Jólakveðja

[Jens Guð, 24.12.2023 kl. 13:51]

  Sigurður I B,  afi trúði ekki á jólasveininn.  Var hann þó trúaður og afar trúgjarn. 

  Gleðileg jól og takk fyrir samskiptin á liðnum árum.  Bloggið mitt væri mun litlausara án kommenntana frá þér! 

[Jens Guð, 24.12.2023 kl. 13:52]

Bjarni,  segðu!  Og gleðileg jól!

[Sigurður Kristján Hjaltested, 24.12.2023 kl. 18:12]

Frábær og skemmtileg lesning.

Það þarf enga jólasveina þegar menn eiga 

svona afa.

Gleðileg jól og farsælt komandi ár. 

[Jens Guð, 25.12.2023 kl. 08:40]

Sigurður Kristján,  takk fyrir það og gleðileg jól!