Lán í óláni

  Kunningi minn er á áttræðisaldri.  Hann á orðið erfitt með gang.  Þess vegna fer hann sjaldan úr húsi.  Nema ef frá er talið rölt í matvörubúð.  Hann býr við hliðina.  Tilvera hans er fábrotin.  Sjón hefur dofnað.  Hann les ekki lengur.  Bækur voru honum áður besti félagsskapur.

  Fyrr í þessum mánuði ákvað hann að rjúfa einangrun sína.  Hann fékk sér sjónvarp og sjónvarpspakka,  internet,  ráder,  myndlykil,  prentara,  snjallsíma og allskonar.  Hann kunni ekkert á þetta.  Hann fékk ungan mann til að tengja allt og kenna sér á helstu aðgerðir.  

  Ekki gekk þjónustumaðurinn vel um.  Hann skildi eftir á gólfinu hrúgu af snúrum af ýmsu tagi.  Á dögunum vaknaði gamlinginn utan við sig.  Hann flæktist í snúrunum;  sveif á hausinn og rotaðist.  Það síðasta sem hann man var að horfa á eftir stóra flatskjánum skella á næsta vegg.

  Margar snúrur höfðu aftengst.  Með aðstoð 8007000 tókst honum að tengja þær upp á nýtt.  Honum til undrunar stóð flatskjárinn af sér höggið.  Hann virkar.  Ekki nóg með það;  myndin á skjánum er ennþá skýrri og litir skarpari en áður.  Jafnframt örlar núna á þrívídd.

  Allra best þykir honum að sjónvarpsdagskráin á skjánum er betri en fyrir óhappið.

 

    

 

 

 

Athugasemdir

[Sigurður I B Guðmundsson, 31.12.2023 kl. 12:40]

Er möguleiki að hann hafi rekið sig í fjarstýringuna í fallinu og lent á 0 = Arineldinn sem er það skásta sem er í sjónvarpinu!!

[Jens Guð, 31.12.2023 kl. 12:53]

Sigurður I B,  það er líklegt!

[Jóhann Elíasson, 31.12.2023 kl. 20:23]

Það kemur þessu máli kannski ekki við en ég get sagt alveg dagsanna sögu í sambandi við "græjumál.  Þannig er mál með vexti að eldri sonur minn er heilmikill græjukarl og gamall maður í Innri Njarðvík fékk fréttir af þessu að strákurinn væri ansi "lunkinn" í sambandi við sjónvörp og farstýringar.  Kallinn fékk símanúmerið hjá stráknum og einhvern veginn vildi það til að það voru alltaf að koma upp vandræði í sambandi við fjarstýringuna og sjónvarpið og alltaf hringdi kallinn í strákinn til að redda málunum og alltaf virtist ástæðan vera sú að kallinn "hrærði" svo í fjarstýringunni að allt fór í klessu.  En hann vildi ekki viðurkenna eitt né neitt.  Það endaði með því að strákurinn varð svo leiður á þessu veseni að hann gerði flesta takkana á fjarstýringunni óvirka nema kallinn gat skipt um rásir á + og - tökkunum hækkað og lækkað og eitthvað sem var bráðnauðsynlegt að hafa.  Síðan þetta var hefur allt gengið vel með sjónvarpið og fjarstýringuna og síðast þegar ég vissi var kallinn alveg hæstánægður.....

Að lokum vil ég óska þér og þeim sem heimsækja bloggið þitt árs og friðar og þakka fyrir góð blogg á árinu sem er að líða.

[Jens Guð, 1.1.2024 kl. 01:54]

Jóhann,  takk fyrir skemmtilega söhu.  Ég þakka sömuleiðis fyrir ánægjuleg samskipti á árinu.

[Rafn Haraldur Sigurðsson, 2.1.2024 kl. 12:09]

Góðar sögur hjá ykkur Jóhanni. Ég hef einnig tekið eftir því að tæknin fer oft fram úr sjálfri sér eins og Jóhann sagði frá. Maður kaupir oft fullkomið tæki með allskonar möguleikum og flóknu viðmóti, en endar svo með eiföldustu stillingunni. 

[Jens Guð, 2.1.2024 kl. 19:13]

Rafn Haraldur,  ég kannast við það!