Ótrúleg ósvífni

  Kunningi minn,  Nonni,  bætti við sig áfanga í skóla fyrir nokkrum árum.  Til að fagna  ákvað hann að blása til matarveislu.  Sá hængur er á að hann kann ekki að matreiða.  Vandamálið er ekki stærra en svo að á höfuðborgarsvæðinu eru ótal veitingastaðir.  Þar á meðal einn asískur í göngufæri frá vinnustað Nonna. 

  Hann mætti á staðinn og spurði eftir yfirmanni.  Sá birtist brosandi út að eyrum og einstaklega góðlegur á svip.  Hann sagðist heita Davíð og vera eigandi.

  Nonni bar upp erindið;  hann væri að leita tilboða í 20 manna veislu.  Davíð brosti breiðar og sagði:  "Þú þarft ekki að leita tilboða.  Ég gef þér tilboð sem undirbýður öll önnur veitingahús.  Þú velur einn tiltekinn rétt fyrir hópinn og ég gef þér 50% afslátt!  Til að það gangi upp erum við að tala um pappírslaus viðskipti."

  Nonni gekk að þessu.  Þeir innsigluðu samkomulagið með handabandi og Davíð knúsaði þennan nýja vin sinn.

  Nokkrum dögum síðar mætti Nonni með gesti sína.  Þeim var vísað til sætis og matur borinn fram:  Væn hrúga af hrísgrjónum og örfáir munnbitar af svíni í sósu.

  Afgreiðsludaman tilkynnti ítrekað að gestir með sérrétt mættu ekki fá sér af nálægu hlaðborði.

  Í lok máltíðar grínuðust menn með að vera enn glorhungraðir eftir þennan litla "barnaskammt".  Nonni hnippti í afgreiðsludömuna og spurði hvort möguleiki væri á ábót fyrir þá sem væru ennþá svangir.  Hún tók erindinu vel.  Snaraðist inn í eldhús og sótti stóran hrísgrjónapott.  Spurði hvort einhver vildi aukaskammt af hrísgrjónum.  Einhverjir þáðu það en nefndu að löngun væri meiri í kjötbita.  Það var ekki í boði. 

  Með ólund rétti Nonni afgreiðsludömunni 29000 kall.  "Nei,  pakkinn er 58000 kall,"  mótmælti daman.  "Davíð samdi um 50% afslátt,"  útskýrði hann.  Hún fullyrti á móti að það væri aldrei gefinn afsláttur.  Eftir þref bað hann dömuna um að hringja í Davíð.  Nonni skildi ekki asíumálið en þótti undarlegt að konan hló og flissaði.   Eftir símtalið sagði hún Davíð ráma í að hafa boðið 10% afslátt.Nonni þyrfti því að borga "aðeins" 52200 kall.

  Þungt var í Nonna er hann gekk heim.  Hann er sannfærður um að Davíð hafi sviðsett leikrit.  Ekki síst núna þegar Davíð er opinberlega sakaður um mansal og fleiri glæpi. 

Athugasemdir

[Jóhann Elíasson, 28.5.2024 kl. 09:45]

Nonni hefur bara verið heppinn að lenda ekki í uppvaskinu hjá "vini" sínum Davíð.... 

[Vagn (IP-tala skráð) 28.5.2024 kl. 09:59]

Ert þú viss um að þessi Nonni þinn hafi ekki frekar verið að ná bílprófinu loksins eftir þrjár misheppnaðar tilraunir?

[Stefán (IP-tala skráð) 28.5.2024 kl. 10:18]

Þessi saga fær mig til að rifja upp svikin loforð Katrínar, t.d. gagnvart ellilífeyrisþegum sem svo grípa í tómt. 

[Jens Guð, 28.5.2024 kl. 10:27]

Jóhann,  góður punktur!

[Jens Guð, 28.5.2024 kl. 10:28]

Vagn,  ég er ekki viss.

[Jens Guð, 28.5.2024 kl. 10:29]

Stefán,  það er samhljómur!

[Ómar Geirsson, 28.5.2024 kl. 16:55]

Blessaður Jens.

Er þetta ekki frekar hið fornkveðna að það sem er of gott til að vera satt, er eiginlega aldrei satt.

En hins vegar má ekki gleyma að sá er oft hrekklaus sem var alinn upp við þau gildi að orð væru ígildi samninga, ef menn sögðu eitthvað þá stóðu menn við það.

Breyttur heimur en það hafa fleiri en Nonni kunningi þinn brennt sig á þeim breytingum.

Þeir brenndu eiga hins vegar að upplýsa okkur hin til hindra að fleiri brenni sig. Þó þeir mæti aulahúmor.

Kveðja að austan.

[Sigurður I B Guðmundsson, 28.5.2024 kl. 18:10]

Ætti ekki Nonni vinur þinn að fara á matreiðslunámskeið í Asískum réttum þó aðallega hrísgrjónaréttum og halda svo útskriftarhátíð fyrir vini og vandamenn???

[Jens Guð, 28.5.2024 kl. 18:19]

Ómar,  takk fyrir áhugaverðar vangaveltur.

[Jens Guð, 28.5.2024 kl. 18:20]

Sigurður I B,  svo sannarlega frábær uppástunga!

[Stefán (IP-tala skráð) 28.5.2024 kl. 21:17]

Verð bara að koma eftirfarandi að hérna á þessari skemmtilegu bloggsíðu: Var að horfa á sjónvarpsstöðina Samstöðin þar sem fimm forsetaframbjóðendur sátu fyrir svörum í Kolaportinu og héldu framboðsræður. Vil bara benda öllum sem hafa aðgang að þessari ágætu sjónvarpsstöð ( líka hægt að finna útsendinguna á vefnum ) að hlusta á mögnuðustu ræðu sem ég hef heyrt lengi. Þ.e. ræðu Steinunnar Ólínu sem ég veit að Katrín vill alls ekki heyra, enda sniðgengur hún Samstöðina, Útvarp Sögu og sjálfsagt fleiri fjölmiðla sem eru hennar elítu ekki samboðnir. Nonni og Davíð ( Viðarsson ? ) eru annars gott innlegg í þessa kosningabaráttu þar sem elítan veður yfir sauðsvartan og prettaðan almúgann. 

[Jens Guð, 28.5.2024 kl. 22:13]

Stefán (# 11),  ég slæddist inn á útsendingu þessarar sjónvarps -eða útvarpsstöðvar í kvöld.  Heyrði Steinunni Ólínu, Ástþór Magnússon syngja útlrndksn dlsgsts "Heyr mína bæn".  Ljómandi gott.  Þó hefði farið betur á að syngja íslensksekt ættjarðarljóð.  Nei,  annars.  Þetta var alveg flott svona. 

[Stefán (IP-tala skráð) 29.5.2024 kl. 08:39]

Á Seltjarnarnesi kjökrar Bubbi og situr sveittur yfir skilaboðum. Bara smá æfing áður en hann fer að veiða eldislax upp úr ám. Hver leyfði allar þessar norsku laxeldisstöðvar Bubbi og hver er ávinningur íslendinga ?? Hannes Hólmsteinn mun eflaust koma vini sínum og skoðanabróðir til hjálpar og bjóða honum með til Brasilíu. Væri ekki sætt að sjá myndbönd af þeim í diskódansi ?