Neyðarlegt

19.8.2024 | 10:40

Á unglingsárum vann ég í álverinu í Straumsvík. Þar vann einnig maður sem seint verður kallaður mannvitsbrekka. Hann var barnslegur einfeldningur. Hann átti sextugs afmæli. Hann bauð völdum vinnufélögum í afmælisveislu heima hjá sér. Hann átti ekki nána fjölskyldu. Veislan var fámenn og einungis sterkt áfengi í boði. Allt gott um það að segja. Ég hef verið í fjörlegri veislu. Þó var gripið í spil og leiðinleg músík spiluð af segulbandi.

Er á leið sagði kallinn okkur frá trillu sem hann átti. Jafnframt átti hann ofan í kjallara hið fallegasta trilluhús. Hann sýndi okkur það stoltur á svip. Hann mátti vera það. Húsið var með opnanlegum gluggum og ýmsu skrauti. Meðal annars skemmtilega útskornu munstri og táknum úr norrænni goðafræði.

Eftir að allir höfðu hlaðið lofsorði á húsið varð einum að orði: "Hvernig kemur þú húsinu út úr kjallaranum?" Eina sjáanlega útgönguleið úr kjallaranum voru þröngar steinsteyptar tröppur upp á jarðhæð.

Kallinn varð vandræðalegur og tautaði niðurlútur: "Það er vandamálið. Ég gleymdi að hugsa út í það. Ég kem þessu ekki út úr kjallaranum. Það er grábölvað."

Meginflokkur: Spaugilegt | Aukaflokkar: Matur og drykkur, Spil og leikir, Viðskipti og fjármál | Breytt s.d. kl. 18:42 | Facebook

Athugasemdir

"BEST ER KAPP MEÐ FORSJÁ", því miður virðast ekki allir hugsa áður en þeir framkvæma...........

Jóhann Elíasson, 19.8.2024 kl. 13:38

Jóhann, það er svo mikið rétt hjá þér!

Jens Guð, 19.8.2024 kl. 16:10

Margur hefur líka málað sig út í horn og það hafa t.d. vinstri græn gert af mikilli elju undanfarin ár. Á flokksráðsfundi vinstri grænna héldu þeir uppteknum hætti og lögðu lokahönd á vinnuna við að mála sig svo út í horn að það er ekki útgönguleið frekar en hjá manninum í sögunni hér að ofan. Fyrrverandi formaður vinstri grænna stökk líka frá borði af sökkvandi skipinu og fór í svo dýrt forsetaframboð að framboðið er stórskuldugt og kallar á hjálp ,, hjálpið mér upp ég get það ekki sjálf, hjálpið mér upp mér finnst ég vera að drukkna í skuldum ,,.

Stefán (IP-tala skráð) 19.8.2024 kl. 19:48