Að bjarga sér

  Upp úr miðri síðustu öld lenti heilsulítill bóndi í tímahraki með heyskap.  Þetta var fyrir daga heyrúllunnar.  Framundan var blautt haustveður en mikið af heyi ókomið í hlöðu.  Unglingur af öðrum bæ var sendur til að hlaupa undir bagga.  Kona bóndans var fjarri vegna barneignar.  10 ára sonur hennar tók að sér matseld í fjarveru hennar.

  Er nálgaðist hádegi sá unglingurinn dökkan reyk leggja frá eldhúsinu.  Í sömu andrá sást stráksi hlaupa út úr húsinu með rjúkandi pott.  Pottinn gróf hann með hröðum handtökum ofan í skurð.  

  Unglingurinn ók dráttarvélinni að pjakknum og spurði hvað væri í gangi.  Hann svaraði:  "Ég veit ekki hvað fór úrskeiðis.  Ég var að sjóða brodd og gerði alveg eins og mamma.  Ég hellti broddinum í sömu plastkönnu og hún.  Ég sauð hana í sama potti og hún. Það næsta sem gerðist var að kannan bráðnaði og allt brann við!"

  Unglingurinn vissi þegar í stað að pilturinn hafði ekki áttað sig á að kannan átti að fljóta í vatni í pottinum.

  Þegar kaffitími nálgaðist kallaði strákur á bóndann og unglinginn.  Sagðist ver búinn að hella upp á kaffi og útbúa meðlæti.  Meðlætið var heimalagað kremkex.  Kexið var sett saman í samloku með kakósmjörkremi á milli.  Þetta bragðaðist illa.  Var eins og hrátt hveitideig.  Stráksi sagði:  "Ég veit ekki hvað fór úrskeiðis.  Ég gerði alveg eins og mamma;  hrærði saman smjöri,  kakói,  hveiti og vanilludropum."

  Smjörkrem er ekki hrært með hveiti heldur flórsykri.  Hann er hvítur eins og hveiti en er sykurduft.

   

     

Athugasemdir

[Jóhann Elíasson, 27.8.2024 kl. 09:52]

Stundum þarf að fylgjast betur með, þegar menn ætla sér að læra........ 

[Jens Guð, 27.8.2024 kl. 10:06]

Jóhann,  heldur betur!

[Stefán (IP-tala skráð) 27.8.2024 kl. 11:14]

Það mætti halda að sama uppskrift hafi verið notuð þegar núverandi ríkisstjórn var sett saman, svo kexrugluð sem sem hún er.

[Sigurður I B Guðmundsson, 27.8.2024 kl. 11:35]

Góð auglýsing fyrir Frónkex og svo var það maðurinn sem sá að konan hans var að horfa á matreiðsluþátt í sjónvarpinu og sagði hvað ertu að glápa á þú sem kannt ekki að elda? Nú þú horfir nú á klámmyndir sagði konan!!

[Jens Guð, 27.8.2024 kl. 12:31]

Stefán,  það er margt til í því!

[Jens Guð, 27.8.2024 kl. 12:32]

Sigurður I B,  nú hló ég upphátt!

[Wilhelm Emilsson, 27.8.2024 kl. 23:20]

Frábær saga og athugasemdir! Ég sé þennan tíu ára strák fyrir mér!

Varðandi hið skemmtilegs orð "kexrugluð" þá dettur mér í hug orð sem ég lærði af Sigurði Árnasyni heitnum, bassaleikara og upptökustjóra, þegar ég vann með honum á Blindrabókasafni Íslands. Hann notaði orðið "kolkreisí", sem mér fannst fyndið. Ég spurði hann nú aldrei hvort hann hefði búið það til eða hvort þetta væri hluti af einhverri fornri rokkmállýsku. Ég hef aldrei heyrt þetta orð fyrr né síðar.

[Jens Guð, 28.8.2024 kl. 07:21]

Wilhelm,  takk fyrir hlý orð.  Mér dettur í hug að fyrirmynd "kolkreisí" sé orðið "kolvitlaus"

[Wilhelm Emilsson, 28.8.2024 kl. 19:51]

Ég held að það sé rétt!

Kær kveðja,

Wilhelm