Sparnaðarráð

  Gott og hagstætt getur verið að kunna sparnaðarráð.  Einkum þegar verðbólga geisar,  stýrivextir eru óþægilega háir,  bankavextir eru ennþá óþægilegri og framundan er tollastríð út um allar grundir.  Hér kemur ráð sem kemur sér vel:

  Þegar silungur eða bleikja eru smjörsteikt á pönnu þá er fátt betra en steikja möndlumylsnu með.  Vandamálið er að hún er dýr.  Hana má drýgja með því að ydda framan af blýanti, mylja yddið í smátt og blanda saman við möndlumylsnuna.  

  Brýnt er að brjóta blýið og henda því.  Blý er óholt.

Athugasemdir

[Jóhann Elíasson, 2.4.2025 kl. 10:34]

Ég er alveg hættur að borða bleikju, aðallega vegna verðsins.  En ekki lýst mér vel á þetta sparnaðarráð með yddið ég gæti trúað að þetta geti nú orðið nokkuð dýrt þegar upp er staðið.......

[Sigurður I B Guðmundsson, 2.4.2025 kl. 10:34]

Þetta minnir mig á..... Kona var spurð um allar þessar bensínhækkanir og hún svaraði: Mér er alveg sam hvað þeir hækka bensínið oft því ég tek bara alltaf bensín fyrir þúsund kall!!!

[Jens Guð, 2.4.2025 kl. 13:28]

Jóhann,  fiskur er orðinn svakalega dýr.  Ekki síst blessuð bleikjan.

[Jens Guð, 2.4.2025 kl. 13:28]

Sigurður I B,  frábært viðhorf hjá kellu!

[Stefán (IP-tala skráð) 2.4.2025 kl. 15:31]

Það er nú einhver framsóknarfnykur af þessu sparnaðarráði, samanber það að bera endalaust ónýtt malbik á vegi (í sparnaðarskyni)

,, Vegurinn inn á Sprengisand er ljós í fyrstu, en verður svo hægt og hægt dekkri. Þannig er líka vegurinn að dauðanum ,,.     

Sá meistari Gyrðir Elíasson fram í tímann þegar hann orti þetta ?  Þ.e. að Framsóknarflokkurinn skröltir holótta vegi í átt að dauðanum ( rétt eins og VG ) og mælist jafnlítill og Sósíalistaflokkurinn í dag. 

[Guðmundur Ásgeirsson, 2.4.2025 kl. 15:33]

Ritblý er þrátt fyrir heitið reyndar ekki gert úr frumefninu blýi, heldur úr blöndu af leir og grafíti sem er ákveðið form af frumefninu kolefni. Þrátt fyrir efnið sé ekki eitrað er þó sennilega ekki skynsamlegt að innbyrða það, enda eru blýantar ekki framleiddir við aðstæður sem falla undir sömu skilyrði um hreinlæti og matvælaframleiðsla.

[Jens Guð, 2.4.2025 kl. 16:24]

Stefán,  Gyrðir kann að orða hlutina.

[Jens Guð, 2.4.2025 kl. 16:25]

Guðmundur,  takk fyrir fróðleikinn.

[Guðmundur Ásgeirsson, 2.4.2025 kl. 16:33]

Til frekari fróðleiks má geta þess að grafít hefur ekkert næringargildi. Ef það kemst inn í meltingarveginn getur það þvert á móti hamlað upptöku næringarefna. Það er því sannarlega óhollt og neysla þess ekki æskileg.

[Jens Guð, 2.4.2025 kl. 18:20]

Guðmundur (#9),  takk fyrir það.