Hlálegt

24.7.2025 | 10:05

Opal er rammíslenskt jórtursælgæti í töfluformi. Það kom á markað á fyrri hluta síðustu aldar. Í Danmörku heitir það Obal. Ástæðan er sú að einhver danskur grallari varð fyrri til að tryggja sér einkarétt á nafninu Opal á dönskum markaði.

Sagan segir að upphaflega hafi Opal verið pappalím. Menn sem unnu við að líma saman pappakassa sóttu í að jórtra storknað límið. Svo datt þeim í hug að bragðbæta það. Þá varð þetta hið ágætasta nammi. Í kjölfar var stofnað fyrirtækið Opal og opalið selt í töfluformi. Það sló í gegn. Síðar keypti sælgætisgerðin Nói fyrirtækið sem þá var í blóma.

Meginflokkur: Matur og drykkur | Aukaflokkar: Spaugilegt, Spil og leikir, Viðskipti og fjármál | Facebook

Athugasemdir

Það hefur þá verið gert fleira við límið en að "sniffa" það.......

Jóhann Elíasson, 24.7.2025 kl. 10:30

Jóhann, límið virðist vera fjölnota!

Jens Guð, 24.7.2025 kl. 11:32

Stjórnarandstaðan límdi sig saman með heimskulegu og tilgangslausu málþófi. Það skilar sér nú í umtalsverðu fylgishruni samkvæmt skoðanakönnunum. Bragðlaust og hvimleitt lím sem heldur ekki og þjóðin hafnar.

Stefán (IP-tala skráð) 24.7.2025 kl. 12:09

Stefán, fólk þarf að passa sig á líminu!

Jens Guð, 24.7.2025 kl. 15:13

Sakna ennþá bláa Opalsins.

Sigurður I B Guðmundsson, 24.7.2025 kl. 16:36

Sigurður I B, margir eru sama sinnis. Vandamálið er að það innihélt klóriform. Það er bannað - eins og margt gott.

Jens Guð, 24.7.2025 kl. 16:49

Ég get heldur betur komið með upplýsingar úr innsta hring um þetta. Það var bróðir langömmu minnar sem stofnaði Opal ásamt tveimur félögum sínum árið 1944, Jón Guðlaugsson. Hann varð næstum 100 ára, vantaði örfá ár uppá og hann var rólfær og hress lengi frameftir aldri, heimsótti okkur á Digranesveginn oft og gaf okkur börnunum nammi.

Hann var maður heilsunnar og jákvæðninnar þótt sælgætisgerð sé kennd við óhollnustu, eins skrýtið og það er.

Ég vissi ekki þetta með pappalímið. Hann talaði ekki um það. En ég man að hann talaði um allt mögulegt og var fróður og ég veit líka að hann vildi að þetta væru hálstöflur upphaflega við kvefi og eitthvað heilsusamlegt en ekki nammi. Hann var þannig maður.

Líka þetta efni sem var í bláa Ópalinum, það var í hófi. Það hefur áhrif til að hreinsa nefgöng held ég og minnka sýkingar í hófi.

Jafnvel þótt sagan um storknaða límið geti verið sönn þá segir það ekki að Opalinn hafi verið óhollur.

Hafið þið heyrt um smáskammtalækningar?

Þær felast oft í því að eitur sem er gefið í nógu litlum skömmtum eflir ónæmiskerfið og er hollt, býr til hreysti og ónæmi fyrir sjúkdómum.

En hann var góður maður. Ég held að hann hafi ekki viljað gera fólk háð nammi, og Opalinn átti vissulega að vera heilsuvara upphaflega.

En ég vissi að hann þekkti sérfræðinga sem gerðu tilraunir með svona matvæli erlendis og las útlend blöð og þessvegna var þetta vísindalegt hjá honum.

Ég held að hann hafi farið með leyndarmálið að bláa Ópalinum í gröfina og þessvegna hefur aldrei tekizt að endurgera hann aftur.

En í minningunni var hann mjög góður og blíður maður. Ég hitti hann einusinni á elliheimilinu. Þá var hann orðinn horaður en mundi eftir mér, og talaði hátt. Hann hló, held ég orðinn 95 ára eða 96 ára.

Beztu kveðjur.

Ingólfur Sigurðsson, 24.7.2025 kl. 16:58

Ingólfur, bestu þakkir fyrir þennan góða fróðleik.

Jens Guð, 24.7.2025 kl. 19:15