Furðulegur ágreiningur

  Tveir vinir mínir hafa ólík sjónarmið til margra hluta.  Eitt sinn voru þeir ágætir vinir.  Nú andar köldu á milli þeirra.  Einmitt vegna ólíkra viðhorfa.

  Gulli starfaði lengst af sem sendibílstjóri í forföllum leyfishafa bílsins.  Þegar leyfishafinn kom aftur til starfa fór Gulli í sjálfstæðan rekstur.  Allt gekk á afturfótunum.  Reksturinn sveif á hliðina.  Hann tapaði leiguíbúð sinni.  Í kjölfar fékk hann tímabundið inni hjá Halla vini sínum.  Sá rak fyrirtæki á Selfossi en bjó heima hjá sér í Reykjavík um helgar.  Þó sjaldan lengur en frá laugardagskvöldi og fram á mánudagsmorgun.

  Gulli hóf leit að ódýrri leiguíbúð.  Leitin bar árangur.  Hann bað Halla um að lána sér sendibíl hans í örfáa daga svo hann gæti flutt búslóð sína.  Halli sá engin vandkvæði á því.  Þeir yrðu þó að skottast á bílnum til Selfoss morguninn eftir.  Þaðan gæti hann reddað sér fari í bæinn um næstu helgi. 

  Þetta gekk eftir.  Gulli settist undir stýri "til að kynnast bílnum."  Er þeir renndu í hlað fyrir utan fyrirtæki Halla sagði Gulli ákveðinn:  "Þetta er 20 þúsund kall."

  Halli spurði hvað hann ætti við.  Gulli svaraði:  "Skutlið hingað kostar 20 þúsund kall!"

  Halli varð ringlaður og sagði:  "Bíddu við,  þetta er minn bíll sem ég er að lána þér og þú býrð frítt heima hjá mér..."

  Það fauk í Gulla.  Hann æsti sig og hrópaði:  "Það skiptir engu máli hver á bílinn.  Fjöldi sendibílstjóra og leigubílstjóra á ekki bílinn sem þeir aka og það skiptir engu andskotans máli.  Taxtinn fyrir skutl til Selfoss er 20 þúsund kall.  Reyndu ekki að búa til vesen.  Þú vilt ekki kynnast mér reiðum. Komdu með þennan 20 þúsund kall og ekkert rugl!"

  Halli var ennþá ringlaður.  Honum var jafnframt brugðið við æsinginn í Gulla.  Eiginlega ósjálfrátt kippti hann 20 þúsund kalli upp úr vasa sínum.  Þeytti honum í Gulla og kallaði um leið og hann stökk út úr bílnum:  "Verði þér kærlega að góðu!"

  Halli var afar ósáttur er hann sagði mér frá þessu.  Ég spurði Gulla út í söguna.  Það var þungt í honum:  "Halli er svo heimskur að hann fattar ekki að sendibílstjóri undir stýri er að vinna.  Það breytir engu um hver á bílinn.  Ég eyddi næstum 2 tímum í Selfossskutlið.  Ég stóð í flutningum og hafði nóg annað að gera við tímann!"   

Athugasemdir

[Jóhann Elíasson, 12.9.2025 kl. 10:20]

Lærdómur sögunnar er "AÐ SJALDAN LAUNAR KÁLFURINN OFELDIÐ".......

[Jens Guð, 12.9.2025 kl. 10:24]

Jóhann,  algjörlega!  

[Stefán (IP-tala skráð) 12.9.2025 kl. 11:19]

,, Vinátta er viðkvæm eins og glas, þegar það er brotið er hægt að laga það, en það verða alltaf sprungur ,,. 

[Jens Guð, 12.9.2025 kl. 11:30]

Stefán,  vel og skáldlega mælt.

[Stefán (IP-tala skráð) 12.9.2025 kl. 18:41]

Góðir forstjórar eru vinir starfsfólks síns og njóta trausts þess. Forstjóri Play hefur reynslu af örðru, vanur maður þar á ferð. 

[Grímur Kjartansson, 12.9.2025 kl. 18:53]

Þegar ég bjó í Svíþjóð þótti sjálfsagt að borga bensínpening ef maður fékk far

svo voru sumir sem ýttu fram peningarkrús til að rukka kaffið

svíar eru með á hreinu að þetta kostar allt og afhverju ættu þeir að gefa þér af því sem þeir hafa þurft að vinna fyrir?

[Jens Guð, 12.9.2025 kl. 19:20]

Stefán (#5),  ég þekki ekki til þarna hjá Play.  Vonandi gengur vel þar á bæ.

[Jens Guð, 12.9.2025 kl. 19:21]

Grímur,  takk fyrir fróðleiksmolana.  

[Bjarni (IP-tala skráð) 13.9.2025 kl. 17:02]

Rukka gesti fyrir kaffið! Verður varla flokkað sem gestrisni. Hvað ef gesturinn er bara að heimsækja vin eða ættingja og kærir sig ekki um kaffi. Rukka svíar fyrir það líka? Taxti sálfræðings?

[Jens Guð, 13.9.2025 kl. 17:20]

Bjarni,  þetta er snúið.

[Stefán (IP-tala skráð) 13.9.2025 kl. 19:54]

Ég bjó alveg nógu lengi í Svíþjóð til að geta sagt að svíar eru almennt ekki eins fégráðugir og íslendingar, lítum bara á glæpsamlega verðlagningu út um allt hér í ferðaþjónustunni. Hinsvegar misstu svíar alla stjórn á gengndarlausum innflutningi á glæpsamlegum innflytjendum, nokkuð sem Kata Jak og hennar ríkisstjórnir öpuðu svo eftir.

[Jens Guð, 14.9.2025 kl. 07:36]

Stefán,  takk fyrir innleggið.  

[Stefán (IP-tala skráð) 14.9.2025 kl. 14:45]

En hvað er að ske í Færeyjum núna Jens ? Færeyingar eru jú þekktir fyrir gestrisni, en nú bregður svo við að ferðamenn bara hverfa.

[Jens Guð, 14.9.2025 kl. 17:10]

Stefán (#13),   útlenskum ferðamönnum hættir til að vanmeta hættur í Færeyjum.  Þeir rúlla niður brattar hlíðar og hrasa í björgum.  Af og til leiðir það til dauðsfalla.  

[Stefán (IP-tala skráð) 14.9.2025 kl. 17:14]

Rétt eins og útlenskum ferðamönnum hættir til að vanmeta glæpsamlega verðlagningu á Íslandi og koma svo staurblankir heim. 

[Jens Guð, 14.9.2025 kl. 17:52]

Lika má líkja þessu við útlenda ferðamenn í Reynisfjölu.