Nauðsynlegt á degi íslenskrar tungu

  Ég átti leið um vesturbæinn í dag.  Ók rólega og yfirvegað með útvarp í gangi.  Heyri þá að verið er að tala um dag íslenskrar tungu.  Mér skilst að það sé dagurinn í dag.  Ég ákvað að styðja yfirskrift dagsins með stæl.  Ég brá við skjótt og ók rakleiðis í Melabúðina.  Þar keypti ég nýsoðinn sviðakjamma.  Ég reif úr honum tunguna og snæddi hana.  Það var mér ljúft og skylt að innbyrða glóðvolga íslenska tungu á degi íslenskrar tungu.  Því næst sporðrenndi ég auganu úr sviðakjammanum.  Það er full ástæða til að hafa auga með íslenskri tungu.  

Athugasemdir

[Anna Ólafsdóttir (anno) (IP-tala skráð) 16.11.2007 kl. 23:39]

Svið eru ógeðsleg - en meðan ég þurfti að láta mig hafa það að borða þau reddaði tungan mér, hún var það eina sem ég kom niður án þess að skila herlegheitunum aftur - en að því sögðu: Góður

[Jenný Anna Baldursdóttir, 16.11.2007 kl. 23:53]

[Fríða Eyland, 17.11.2007 kl. 00:01]

Þú seigir nokkuð Jguð, með hverju skolaðir þú svo tungunni niður  ?

[Fríða Eyland, 17.11.2007 kl. 01:04]

[ari (IP-tala skráð) 17.11.2007 kl. 01:31]

Þú lýgur því. En við skulum hafa það sem skemmtilegra reynist.

[Steini Briem (IP-tala skráð) 17.11.2007 kl. 02:41]

Sökum nærsýni held ég að þú hafir ruglast á sviðakjömmunum og ömmunum í Melabúðinni, Jensinn minn. Og fyrr má nú vera sleikurinn að rífa út úr þeim tunguna og éta hana!

[Sigurður Þór Guðjónsson, 17.11.2007 kl. 15:53]

Ertu þá ekki farinn að tala tungum tveim? 

[Árni Gunnarsson, 17.11.2007 kl. 16:40]

Tvítyngdur?

[Jens Guð, 17.11.2007 kl. 19:51]

  Takk fyrir skemmtileg "kommentin",  þið öll.

  Anna,  ég var eitt sinn staddur í matsalnum á BSÍ.  Þar kom franskt sjónvarpsfólk og keypti sviðakjamma.  Þulur las inn á upptökugræjurnar pistil um sviðakjammann.  Ég skil ekki frönsku og veit ekki hvað hann sagði.  En af og til benti hann með hníf á augað á kjammanum,  eyrað eða lyfti vörum til að sýna tennur kjammans. 

  Eftir að tökumenn höfðu slökkt á græjunum héldu Frakkarnir áfram að skoða sviðakjammann.  Þeim hryllti öllum við og voru með skelfingarsvip.  Ef ég hefði ekki verið nýbúinn að borða og verið pakksaddur hefði ég glaður viljað sýna þeim hvernig Íslendingur rífur í sig sviðakjamma.

  Tungan er víst hollasti biti af allri kindinni og sterkasti vöðvi hennar.  En mér þykir augað best.  Sérstaklega augasteinninn.

  Fríða ég drakk rammíslenskt jólamalt með tungunni.

  Benedikt,  vegna þess að valið stendur á milli 15 laga þá verður niðurstaðan ekki fullkomlega marktæk fyrr en 1500 atkvæði hafa verið greidd.  Það þýðir að hvert lag hafi tekið með sér að meðaltali 100 atkvæði).  Rúdolf með Þeysurum er komið með örugga forystu.  Lagið hefur þegar fengið um 200 atkvæði af 1331.  Ég er frekar að reyna að gæta sanngirni gagnvart þeim lögum sem hafa fengið fæst atkvæði.  Þau lög eru enn að skiptast á sætum vegna þess að þeim munar um hvert atkvæði á meðan þau hafa aðeins fengið um og innan við 20 atkvæði.

[Steingrímur Helgason, 17.11.2007 kl. 22:01]

Snilldargóð færsla, & gott hjá þér að hafa auga með túngunni ...

Sjálfur er ég meira fyrir eyrað & selfosshnakkaspilið ..

S.