Hamborgarhryggur

Algjör lúxusútgáfa af sígildum rétti.  Hentar best á aðfangadagskvöldi en næst best á öðrum jóladögum.  Það verður enginn hryggur sem fær lúxusútgáfu af hamborgarhrygg um jól og áramót.

1 stk	Hamborgarhryggur
2 l	Rammíslenskt kranavatn
4 flöskur	Rauðvín
1 stk	Laukur
1 stk	Sellerístilkur
10 stk	Svört piparkorn
4 stk	Negulnaglar

• Setjið hamborgarhrygginn í vatn ásamt 2 dl af rauðvíni, gróft söxuðu grænmeti, pipar og negul. Látið suðu koma rólega upp og sjóðið við vægan hita í 38 mín.  Sötrið 2 - 3 glös af rauðvíni á meðan.
• Takið hrygginn úr soðinu, látið kólna í 22 mín og sötrið 1 - 2 glös af rauðvíni á meðan.

Hunangsgljái

2 msk	Sætt sinnep
2 msk	Hunang
2 msk	Púðursykur
1 msk	Edik

• Blandið hráefnunum í hunangsgljáann og penslið hrygginn með honum. Setjið í 180°C heitan ofn í 16 mín.  Sötrið 1 glas af rauðvíni á meðan.
• Berið fram með rauðvínssósu, brúnuðum kartöflum, rauðkáli og rauðvíni.

Rauðvínssósa

7 dl	Soð úr potti
40 g	Hveiti
40 g	Smjörlíki
1 dl	Rauðvín
1 msk	Rauðvínsedik
1 msk	Rifsberjahlaup
1 dl	Rjómi

Svínakjötskraftur

• Fleytið og sigtið soðið. Látið suðuna koma upp.
• Lagið smjörbollu úr smjörlíki og hveiti. Hrærið soðið rólega út í.
• Bætið út í rauðvíni, ediki, rjóma og hlaupi. Látið sjóða í nokkrar mín.
• Bragðbætið með svínakjötskrafti ef þurfa þykir.
• Sötrið rauðvín af yfirvegun á meðan sósan er löguð og á meðan veislunnar er neytt en af áfergju eftir það.

Athugasemdir

[Björgvin R. Leifsson, 24.12.2008 kl. 13:09]

Hvað ertu að gera með allan þennan mat með rauðvíninu?

[Egill (IP-tala skráð) 24.12.2008 kl. 13:50]

Það heitir HAMBORGARHRYGGUR, Jens. Hann á ekkert skylt við hamborgara.
Þú hefur greinilega notað copy/paste á uppskriftina, því þar stendur hamborgarhryggur, en fyrirsögnin er röng. Þetta er kennt við borgina Hamborg, ekki hamborgara. Gleðileg jól!

[Heidi Strand, 24.12.2008 kl. 13:55]

Er þetta ekki bara áfengismisnotkun?

Gleðileg jól!

[Halldór E. (IP-tala skráð) 24.12.2008 kl. 14:04]

Egill, þeir sem búa í Hamborg eru Hamborgarar og þetta er þeirra æti.

....ekki satt?

[Óskar Þorkelsson, 24.12.2008 kl. 14:36]

Það heitir HAMBORGARHRYGGUR, Jens. Hann á ekkert skylt við hamborgara.

Þú hefur greinilega notað copy/paste á uppskriftina, því þar stendur hamborgarhryggur, en fyrirsögnin er röng. Þetta er kennt við borgina Hamborg, ekki hamborgara. Gleðileg jól!

Ég sem kjötiðnaðarmaður get upplýst Egill að þetta er ekki alrangt hjá þér.. en hamborgarar eru líka kenndir við Hamborg.. og nafnið hamborgarhryggur hefur frekar óljósan uppruna.. en sennilega á það hliðstæðu í okkar fræga Londonlambi.. sem ekki einn einast íbúi þeirrar stórborgar hefur heyrt um eða mundi þekkja í sjón eða bragði.. það vantaði eitthvað flott nafn á fyrirbærið.. 

Reyktir svínahryggir náðu fótfestu á íslandi upp úr 1970 þegar Tolli í síld og Fisk markaðsetti þá fyrir jól.. en annarstaðar á norðurlöndum er þetta sumarmatur frekar en hátíðamatur.. þá skorið í sneiðar og grillað.. sommarkoteletter..  

annars er ég með familieribbe um jólin.. ekkert reykt kjöt í dag. 

[Ómar Ingi, 24.12.2008 kl. 14:59]

4 stk Rauðvín stendur uppúr

Jólin Jens minn

[Sóldís Fjóla Karlsdóttir, 24.12.2008 kl. 15:03]

Gleðilega hátíð.....Jens.

[Jens Guð, 24.12.2008 kl. 15:23]

  Björgvin,  maður lifir ekki á víni einu saman heldur þarf líka örlítið af trefjum.  Gleðileg jól!

  Egill og Dóri,  hef ég verið að misskilja eitthvað?  Hefur þetta þá ekkert með hljómsveitina HAM að gera?  Gleðileg jól!

  Heidi,  þetta heitir áfengisnotkun.  Gleðileg jól!

  Óskar,  takk fyrir fróðleikinn.  Gleðileg jól!

  Ómar,  rauðvínið stendur alltaf upp úr allsstaðar.  Gleðileg jól!

  Sóldís Fjóla,  gleðileg jól!

[Ásdís Sigurðardóttir, 24.12.2008 kl. 15:37]

Takk og gleðileg jól kæri vin.

[Linda Linnet Hilmarsdóttir, 24.12.2008 kl. 16:00]

Megi algóður Guð og hans fallegu ljúfu Englakór veita þér elsku vinur minn og þína elsku fallegu ljúfu Fjölskyldu ást,von,trú og yndislegan kærleika um Jólahátíðina og umvefja ykkur notalega hlýju og bros í hjarta og þakklæti fyrir hvern ljúfa dag sem við eigum saman......Stórt knús og hlýr ljúfur og breiður faðmur af Ást og vináttu til þín frá mér og mínum yndislegum dætrum og Húsbandi...........GLEÐI OG FRIÐARJÓL

[Gullvagninn (IP-tala skráð) 24.12.2008 kl. 16:07]

Gleð'og friðar jól - þetta er uppskriftin sem ég nota, en ég gleymdi rauðvíninu.... arg.

[Gunnar Kristinn Björgvinsson, 24.12.2008 kl. 16:12]

Miðað við suðutímann sem þú gefur upp (38 mínútur) geri ég ráð fyrir að þú sjóðir ávallt 780 gramma Hamborgarhrygg, enda er þér eflaust fullkunnugt um að miðað er við að uþb. 5 mínútum á hver 100 grömm við vægan hita.  Rétt að þetta komi fram þar sem ekki er víst að allir hinir séu að sjóða 780 gramma hrygg.

Verði þér að góðu og gleðileg jól.

[Sigurjón Sigurðsson (IP-tala skráð) 24.12.2008 kl. 16:27]

Bara að láta vita af smjörbollu úr íslensku smjöri í stað smjörlíkis. Að minnsta kosti í hátíðarmatinn og helst alltaf. Annað er glæpur. Jólakveðja að norðan.

[Jens Guð, 24.12.2008 kl. 18:03]

  Ásdís,  gleðileg jól!

  Linda,  takk fyrir þessa fallegu jólakveðju.  Jólaknús á þig og þína.

  Gullvagninn,  rauðvínið er ekkert "must".  Það má drekka það síðar.  En muna að drekka þá tvöfaldan skammt.  Gleðileg jól!

  Gunnar Kristinn,  ég var ekki með þetta á hreinu.  Takk fyrir upplýsingarnar.  Gleðileg jól!

  Sigurjón,  hvað er smjörbolla?  Gleðileg jól!

[Óskar Þorkelsson, 24.12.2008 kl. 18:56]

Ein ágæt suðuregla úr kjötiðnaðinum.. en það er mínúta á millimeter.. sem þýðir að ef hryggurinn er 5 cm inn í miðju þá þarf hann 50 mínútna suðu.. en flestir þurfa minni suðu en það.. svo 38 mín er eflaust nóg fyrir meðal úrbeinaðan hrygg.

[Jens Guð, 24.12.2008 kl. 20:07]

  Óskar,  enn og aftur þakkir fyrir góð ráð.

[Sveinn (IP-tala skráð) 24.12.2008 kl. 21:21]

Hamborgari er fínn hvort sem hann er hryggur eða glaður.

[aloevera, 25.12.2008 kl. 01:14]

Hryggurinn frá Kjarnafæði klikkar ekki.  Það má meira að segja borða hann hráan ef nóg er af rauðvíni með.

[Siggi Lee Lewis, 25.12.2008 kl. 01:43]

Ég þarf að Ég þarf að prófa þennan

[Siggi Lee Lewis, 25.12.2008 kl. 01:43]

Við vorum með hrygg í kvöld og hann var svakalegur, en þessi virðist ekki vera síðri.

[Siggi Lee Lewis, 25.12.2008 kl. 01:44]

Já sorry, gleymdi smá commenti......Ég er persónulega hrifnari af lambahrygg, en svínahryggur er snilld. Rauðvínsósan finnst mér bara passa með svínaketi.

[Siggi Lee Lewis, 25.12.2008 kl. 01:45]

Ehh....sorry Jens að ég skuli athugasemdast svona oft, en hvar fékkst þú þessa uppskrift?

[Jens Guð, 25.12.2008 kl. 01:58]

  Siggi,  rauðvínssósa passar með öllu.  Einkum ef hlutfall rauðvínsins er óvenju hátt.  Ég hafði mið af uppskriftinni frá Kjarnafæði en ritskoðaði hana og lagaði að mínum smekk.

[Jens Guð, 25.12.2008 kl. 02:01]

  Orginal uppskriftin er á www.kajrnafaedi.is.

[Jens Guð, 25.12.2008 kl. 02:02]

Sorry,  átti að vera www.kjarnafaedi.is.

[Siggi Lee Lewis, 25.12.2008 kl. 02:18]

Það virðist ekkert koma þegar ég stimpla inn www.kjarnarfaedi.is ...

[Siggi Lee Lewis, 25.12.2008 kl. 02:19]

Jaaáá.... www.kjarnafaedi.is sleppa r-inu. OK.

[Brjánn Guðjónsson, 25.12.2008 kl. 13:37]

hljómar girnilega, uppskriftin. eins er með rauðvínið.

annars verður ekkert rautt drukkið um þessi jól. nú eru hvít jól.

[Jens Guð, 25.12.2008 kl. 14:53]

  Siggi,  það var lagið:  Sleppa r-inu eins og þegar talað er um hvít eða auð jól.

  Brjánn,  upphaflega töluðu Íslendingar um hvít eða auð jól.  Þetta var löngu áður en Íslendingar lærðu að skrifa en skömmu áður en þeir lærðu að lesa.  Þegar einhver sagði:  "Nú eru ekki hvít jól.  Það eru auð jól"  þá heyrðist mönnum sem viðkomandi væri að tala um rauð jól.

[Jens Guð, 25.12.2008 kl. 16:41]

  Tinna,  kjötið er eins og Ísland:  Best ískalt.