Bráðnauðsynlegt að vita og kunna

  Hangikjöt hefur verið þjóðarréttur Íslendinga lengur en elstu menn muna.  Ennþá lengra er síðan hangikjöt varð þjóðhátíðarréttur Íslendinga.  Samt er það svo að Íslendingar eru rétt nýbyrjaðir að átta sig á hvernig best er að matreiða hangikjöt.  Frumskilyrði þess að útkoman heppnist er að hangikjötið sé alvöru hangikjöt.  Ekki eitthvað helvítis saltsprautað plat hangikjöt.  Gangið úr skugga um að hangikjötið sé kofareykt eða taðreykt.

  Hangilæri er best.  Frampartur er næst bestur.  Þannig er staðið að matreiðslunni:

• Hangikjötið er sett í pott.  Potturinn þarf að vera það stór að hangikjötið komist ofan í hann.  Hellið með gusugangi ísköldu kranavatni (alls ekki kolsýrðu vatni úr flösku) yfir þar til það hylur kjötið.  Setjið pottinn á nálæga eldavélahellu.  Stillið á lágan styrk.  Látið suðuna koma rólega og æsingslaust upp á klukkutíma og 7 mínútum.  Lesið ævisögu Önnu á Hesteyri á meðan. Slökkvið eldsnögg á hellunni um leið og suðan kemur upp.
• Látið kjötið kólna í pottinum undir loki.  Látið einhvern annan ganga úr skugga um að vatnið í pottinum sé orðið kalt.  Þó ekki kaldara en inni í eldhúsinu.  Þá er kjötið tilbúið til neyslu.  Reyndar er kjötið best daginn eftir.  En svangir magar hafa ekki þolinmæði til að bíða.  Síst af öllu þegar ilmandi hangikjötslyktin æsir upp hungrið. 

• Berið hangikjötið fram og til baka með uppstúf, soðnum kartöflum, grænum baunum, rauðkáli, laufabrauði og 12 kippum af vel kældum jólabjór.

Uppstúf

52 g	smjör
49 g	hveiti
1 l	mjólk
½ tsk	salt
1-3 msk	sykur (fer eftir því hvað matskeiðarnar eru stórar)
ögn	hvítur pipar

• Bræðið smjörið í potti, hrærið hveitinu saman við, þannig að úr verði smjörbolla.
• Bætið mjólkinni ofur varlega í og hrærið uns leðjan er kekkjalaust. Látið sjóða í nokkrar mínútur og hrærið ofsafengið í á meðan.
• Kryddið með salti, sykri og pipar. 
   

Athugasemdir

[Tobbi (IP-tala skráð) 31.12.2008 kl. 23:36]

Þetta er gott og blessað þangað til kom að partinum með Önnu á Hesteyri.  Í þeirri bók er svo ferleg gloría að ég hefi ekki aðra eins augum litið í bók sem gefur sig út fyrir að vera fræðandi og uppbyggileg.  Og ef þú, sem ert oft á minnstur í bókinni, hefur ekki rekið þig á gloríuna þá bendi ég á að hún er á bls. 65.  Og ef þú sérð hana ekki í fljótu bragði þá bendi ég á að skoða myndatextann og bera saman við myndina.  Svo legg ég málið í dóm!

[Siggi Lee Lewis, 31.12.2008 kl. 23:36]

Hangiketið er gott kalt með kartöflum og rúgbrauði, en ég kýs kalkúninn og lambið fremur. nautið lendir þó í fyrsta sæti að mínu mati. Tala ekki um Texas Rib Eye eða Tennessee T-Bone.

500gr Nautalundirnar frá Íslandsnauti klikka ekki heldur.

[Jens Guð, 1.1.2009 kl. 01:12]

  Tobbi,  bókinni um Önnu er ekki ætlað að vera fræðandi og uppbyggileg heldur lýsa merkilegri konu.  Það er vissulega klaufalegt að kindin á myndinni sé kölluð hrútur.  Skrásetjarinn hefur klárlega ekki verið í sveit.  Bókin er samt rosalega skemmtileg.

  Siggi Lee,  ég hef aldrei vitað fólk snæða hangikjöt með kartöflum og rúgbrauði.  Þú sagðir mér um daginn frá einhverju öðru sem þú borðar með rúgbrauði.  Man ekki hvað það var.  En það var eitthvað sem ég hafði ekki heyrt um að væri snætt með rúgbrauði. 

  Það eru tilteknir dagar sem fólk á alltaf að borða hangikjöt á:  Nýársdagur,  þorrinn eins og hann leggur sig,  2.  í páskum og 2.  í hvítasunnu,  svo og á jóladag.  Annar matur er ágætur á öðrum dögum.

[Heidi Strand, 1.1.2009 kl. 12:13]

Danskur sælkerakokkur var með bernessósu og spergilál bæði með hangikjöt og  saltkjöti, og það passar mjög vel saman.

[Siggi Lee Lewis, 1.1.2009 kl. 14:44]

Guð: Hangiket er snilld. En af hverju ætti maður að borga fyrir og hakka í sig hangiketi þegar maður hefur tæpt kíló af úrvals afgangi af gamlárskveldi?

[Jens Guð, 1.1.2009 kl. 15:29]

  Heidi,  þetta hljómar spennandi blanda.

  Siggi,  afgangurinn frá gamlárskvöldi er snæddur um helgina en hangikjötið í dag.  Ef gleymdist að versla inn hangikjöt er reyndar lítið við því að gera.  Allt lokað.

[Siggi Lee Lewis, 1.1.2009 kl. 15:55]

Kæei Jens: Ég hef takmarkaða lyst á að borða mat sem var eldaður á miðvikudagskveldi, á laugardegi. Hann er ferskari á fimmtudegi.

Hangiketið geturðu keypt í 10/11 í dag. Það er alltaf opið í 10/11. Var að kaupa mér vindla þar rétt áðan.

[Egill (IP-tala skráð) 2.1.2009 kl. 11:17]

Jens, þú klikkar alvarlega á uppstúfinu!

Það er miklu betra fyrir magann (sérstaklega fyrir þá sem eru viðkvæmir) að sjóða upp mjólkina og hræra svo hveiti í vatni útí.  Síðan læturðu suðuna koma aftur upp og skellir smjörlíkinu útí. Þá kryddarðu síðan með salti og sykri (msk. er sérstök mælieining, það á ekki að nota misstórar matskeiðar úr hnífaparaskúffunni). En... svo bullar þú að það eigi að sulla pipar út í þetta, en það er arfavitlaust, eins og svo margt hjá þér!!! Það á að setja örlítið af múskat útí og ekki söguna meir.

Gleðilegt ár!

[Jens Guð, 2.1.2009 kl. 23:24]

  Egill,  bestu þakkir fyrir þennan fróðleik.  Ég kann bara norðlensku uppskriftina sem við brúkuðum í Skagafirðinum með ágætum árangri.  Það var ekkert múskat til á mínum uppvaxtarárum í útjaðri Hóla í Hjaltadal.  Bara pipar.

[Sirry Hallgrimsdottir (IP-tala skráð) 22.1.2009 kl. 09:56]

 Thad er naudsynlegt ad setja sykur á hanikjotid medan thad sidur, tharf ekki nema 1 mtsk, eda svo. Nammi namm:)