Íslenskar hljómsveitir þátttakendur í alþjóðlegri hljómsveitakeppni

  Í ár verður í fyrsta sinn haldin á Íslandi undankeppni fyrir alþjóðlegu hljómsveitakeppnina Wacken Metal Battle. Wacken er nafn á bæ í Norður-Þýskalandi sem á hverju sumri umturnast í einn allsherjar risa þungarokksbæ þegar Wacken:Open:Air hátíðin er haldin.

  Í ár munu 20 þjóðir halda undankeppnir í sínu landi og er Ísland ein af þeim. Sigursveit hvers lands fyrir sig fær þátttökurétt í lokakeppninni sjálfri á Wacken hátíðinni. Það er ekki amalegt að hugsa til þess að loksins mun íslensk hljómsveit stíga á svið á þessari goðsagnakenndu þungarokkshátíð.

  Sigurvegarar undankeppna eru valdir af dómnefnd.  Á meðal dómara á Íslandi verður blaðamaður frá Hollandi, sem skrifar fyrir stærsta þungarokkstímarit Beneluxlandanna, Aardschok Magazine. Þessi maður er með sitt eigið bókunar- og umboðsskrifstofufyrirtæki.  Það verður því mikill ávinningur að fá hann til landsins.  Líklegt má telja að hann uppgötvi einhverja snillinga hér og bjóði þeim umboðssamning.

  Sökum þess að undankeppnin mun fara fram síðar en áætlað var, hefur umsóknarfresturinn verið framlengdur til 1. febrúar en hann átti upphaflega að vera 15. janúar. Keppnin verður að öllum líkindum í apríl (í stað mars), en nánari dagsetning verður auglýst síðar.

  Leitið upplýsinga hjá Þorsteini Kolbeinssyni hjá Restingmind Concerts,  sími 823 4830.  Restingmind hefur staðið fyrir hópferðum á Wacken:Open:Air undanfarin 5 ár í samvinnu við Livescenen í Danmörku. Í fyrra fóru næstum 100 manns á þessa hátíð frá Íslandi en nú er svo komið að það er hvorki meira né minna en uppselt á hátíðina í ár hjá söluaðilum úti - og hátíðin er ekki fyrr en í ágúst! Þó er eitthvað af miðum ennþá til hjá hópferðinni en hún tryggði sér miða áður en uppselt varð.

Athugasemdir

[Ari (IP-tala skráð) 15.1.2009 kl. 02:02]

Búinn að heyra af þessu. Almennilegt framtak! Hef farið 6 x á Wacken Open Air annars. 2001-2006. Stundum með téðum kunningja mínum Þorsteini Kolbeins, eða meistara TottaK eins og gárungarnir vilja kalla hann.

[Jens Guð, 16.1.2009 kl. 23:47]

  Ari,  þú ert ótrúlega duglegur að sækja rokkhátíðir í útlöndum.

[Ari (IP-tala skráð) 17.1.2009 kl. 01:03]

Takk haha. Ég stefni á G-festival held ég í sumar, langar að breyta til og heimsækja "frændurna".

[Jens Guð, 17.1.2009 kl. 01:24]

  G!Festivalið sveif í gjaldþrot í fyrra.  Það var verulega dapurlegt dæmi.  Fyrstu árin var G!Festival gert út af rokksambandinu Grót.  Grót var félagsskapur þar sem áhugafólk bókaði hljómleika rokksveita þvers og kruss um Færeyja.  G!Festival óx þeim félagsskap yfir höfuð.  Dæmið varð svo stórt og varð áhættusamt.  Forsprakkinn,  Jón Tyril (gítarleikari Clickhaze),  afgreiddi það þá á sinn reikning.  Sumir skilgreindu þá dæmið þannig að hann væri að skara eld að sinni köku.  Sem var mjög fjarri raunveruleika.  Þetta var hans hugsjón og hann hefur nákvæmlega engan áhuga á fjárhagslegum ávinningi af dæminu.  Enda sveif það allt í gjaldþrot.  En Jón spriklar áfram með þetta.  Búinn að tapa öllu sínu en G!Festival heldur vonandi áfram.  Einhver frábærasta rokkhátíð sem ég sæki reglulega.   

[Ari (IP-tala skráð) 17.1.2009 kl. 16:51]

Heldur vonandi áfram? Ég sé ekki betur en að Jón Tyril (Tyrlas) sé búinn að tilkynna að það verði. Það á bara eftir að tilkynna fyrstu böndin. Sjá: http://www.kjak.org/viewtopic.php?f=8&t=1123

Hér er hin meistaralegi aðgöngumiði í ár: