Plötuumsögn

 - Titill:  Haré! Haré!

 - Flytjandi:  Högni

 - Einkunn:  ****1/2

  Haré! Haré! er þriðja sólóplata færeyska tónlistarmannsins Högna Lisberg.  Fyrsta sólóplata hans,  Most Beautiful Thing,  var lágstemmd kassagítarplata.  Öll lögin róleg,  látlaus og falleg.  Næsta plata,  Morning Dew,  var mun fjölbreyttari.  Þar voru ýmsir músíkstílar í gangi og sum lögin hröð, kraftmikil og rokkuð. Nokkur lög af  Morning Dew  urðu vinsæl hérlendis og Högni heimsótti okkur í tvígang og hélt nokkra hljómleika.  

  Áður en Högni hóf sólóferil var hann trommuleikari fyrstu og einu alvöru súper-grúppu Færeyja,  trip-hopp hljómsveitarinnar Clickhaze.  Sú hljómsveitin spilaði á nokkrum hljómleikum á Íslandi 2002 við góðar undirtektir.  Söngkonan,  Eivör,  varð í kjölfarið súperstjarna á Íslandi.   

  Haré! Haré!  er ólík fyrri plötum Högna.  Raddbeiting Högna er önnur og Prince-legri.    Hljóðheimurinn er sömuleiðis sérstæður.  Það er Prince-keimur af honum í bland við Beck eins og hann hljómaði í Looser  laginu.  Í sumum lögum merlar á funk-hrynjanda og öðrum trip-hoppinu sem kennt er við Bristol (Massive Attack,  Portishead,  Tricky...). Einnig er eins og örli á arabískri stemmningu.  Nafn plötunnar og letur undirstrikar austurlensku áhrifin.  Heildaráferð plötunnar er sterk og samstæð.  Lögin eru samt mishröð og miságeng.  Það skiptast á rokk og rólegheit.  Greinilega hefur verið nostrað mjög við hljóðblöndun.  Sum lögin hljóma dálítið eins og "remix" fyrir plötusnúða diskóteka með hörðum og vélrænum trommutakti.  

  Það sveif færeysk stemmning yfir fyrri plötum Högna.  Haré! Haré! er hinsvegar mjög "erlendis".  Sem fyrr er Högni höfundur laga og texta,  syngur og sér að mestu um allan hljóðfæraleik.

  Platan hljómar vel strax við fyrstu spilun.  Samt er hún frekar seintekin að því leyti að laglínur eru ekki grípandi né auðlærðar.  Við fyrstu spilanir renna lögin dálítið saman í eitt.  Það besta er að platan venst afskaplega vel.  Það er hægt að endurspila hana ótal sinnum án þess að fá nóg af henni. 

  Enn sem komið er fæst  Haré! Haré!  ekki í íslenskum plötubúðum.  Fyrri plöturnar fást í Pier í Korputorgi og glerturninum við Smáratorg.  Hægt er að panta  Haré! Haré!  í pósti á www.tutl.com.  Stutt er í að Kimi Records dreyfi  Haré! Haré!  hérlendis.

  Vert er að geta sérstæðrar umslagshönnunar.  Það er allt úr pappa.  Þegar það er opnað sprettur upp pappírsvöndull sem réttir manni diskinn.  Magnað.

  Á þessu myndbandi flytur Högni lagið  Been Out of Town.  Þarna 2007 hljómar lagið afskaplega nakið í samanburði við flutninginn á  Haré! Haré!:

www.hogni.com

www.myspace.com.hogni       

          

Athugasemdir

[Ómar Ingi, 10.3.2009 kl. 00:18]

Já þú segir nokkuð vert að athuga þennan aðeins meira , en miðað við lagið hérna Been Out of Town. Mætti kallinn alveg fara að læra enskuna betur fyrst hann er á annað borð að syngja á því máli !.

Takk

[Jens Guð, 10.3.2009 kl. 01:11]

  Ómar,  fyrir röskum aldarfjórðungi heimstótti mig hollensk kona sem var að skrifa bók um rokkmúsík (minnir mig fremur en ritgerð).  Hún hélt því fram að enskuframburður Skandinava sé auðþekkjanlegur.  Hún sagðist alltaf heyra strax hvers lenskur söngvarinn sé.  Ég prófaði þetta á henni.  Spilaði fyrir hana plötur frá Svíþjóð,  Noregi,  Danmörku og Íslandi.  Ég var varla búinn að setja plötu af stað þegar konan nefndi réttilega hvers lenskur söngvarinn var.  Ég man að íslensku plöturnar voru með Pelikan, Icecross og Hljómum.

  Kanadískur vinur minn segist alltaf þekkja enskuframburð Íslendinga.  Honum þykir enskuframburður íslenskra söngvara krúttlegur og,  ja,  hann notar orðið barnalegur.  Honum þykir þetta gera músíkina skemmtilega.  Eitt sinn þegar hann kom til Íslands spilaði ég fyrir hann fyrstu sólóplötu Högna. Hann hélt að Högni væri íslenskur vegna enskuframburðarins.  Kannski er þetta ekki ókostur.  Ég veit það ekki.  Högna vegnar vel á alþjóðavettvangi.  Hann gerir út frá Danmörku og hefur nóg að gera sem atvinnutónlistarmaður. 

  Fyrir nokkrum árum var ég staddur í Sviss og heyrði þar í útvarpi lag með honum spilað.  Þegar ég spurðist fyrir könnuðust Svisslendingar við hann sem "færeysku poppstjörnuna".   

[Ómar Ingi, 10.3.2009 kl. 11:33]

Já rétt er það jens að það heyrist ávallt bara mismikið en í þessu lagi fer Högni alveg með það

En sumum finnst það eflaust krúttlegt eða bara töff , væri til í að heyra tölvupoppið hans hehe

[Sigurður Jóhann (IP-tala skráð) 10.3.2009 kl. 16:42]

ef ég rek við á færeysku, fæ ég þá 5 stjörnur?

[Jens Guð, 10.3.2009 kl. 22:54]

  Ómar,  það hefur orðið mikil viðhorfsbreyting til enskuframburðar í músík síðasta aldarfjórðung.  Sennilega vegna þess að áður voru yfir 99% af vinsælustu lögum heims sungin af fólki með ensku sem móðurmál.  Á þessu hefur orðið breyting.  Margir sem ekki hafa ensku sem móðurmál eiga lög á vinsældalistum.  Einnig hefur jamaísk enska orðið áberandi í vinsælum lögum. 

  Söngvarar eru ekki lengur að vanda sig við að syngja ensku sem hljómar eins og menn sé innfæddir Bretar,  Norður-Ameríkanar,  Ástralir...  Danni Pollock sagði frá því í blaðaviðtali að hann lagðist gegn því að Utangarðsmenn reyndu við enskumælandi markað.  Danna þótti enskuframburður Bubba ekki boðlegur.  Danna finnst hinsvegar svoleiðis framburður í söng vera flottur í dag.  Færeyskst tölvupopp - eða teldugrót - er alltaf flott.

[Jens Guð, 10.3.2009 kl. 22:59]

  Ómar,  Högni skrifaði mér áðan.  Var að lesa sig í gegnum þessa umræðu.  Hann segist ekkert vera að rembast við að þykjast vera enskur.  Einfaldlega vegna þess að hann er ekki enskur. 

[Jens Guð, 10.3.2009 kl. 23:00]

  Sigurður,  í guðanna bænum ekki láta reyna á það!